Sigí wamá apurichiha tau Garüdia Awisahatu tuma Agaguduabá!

Lúmagiñe irumu 2018, luágurügüñein ábanmeme katei tayanuha kada Garüdia Awisahatu tuma Agaguduabá! to wayusuruboun lun wapurichihan. Kei tídangiñetu lan agumeiraguagüdüni tótima wayusuruboun lun warufudahan, gayaraati wayusurunu lidan apurichihani. Gayaraati giñe wanügün fiu tídangiñe wámagua dan le woudin agañeiha luma dan le waweiyasuhan. Lau sun mama lan lun wíchugun aturiahani tídangiñeti Bíbülia tadügǘwa Garüdia Awisahatu tuma Agaguduabá!, gayaraati tahuudun lun tínchahaniña gürigia lun habusenrun hasubudirunitima Bungiu.

Danme hayanuhan luma somu gürigia, aliiha humá aban bérusu tídangiñeti Bíbülia lun ani írida humá aban lídangiñe katei le uágubei layanuhóua tidan somu Garüdia Awisahatu o Agaguduabá!, le uágubei hasaminara gayaraabei lan ladügün lun busén lan gürigia ligía laliihanu. Kéiburi hamuga anhein gaduheñu lubéi gürigia ligía, o hiru lan, o gibe lan katei lun lichügü, gayaraati hariñagun lun: “Málügili lúmagiñe naliihan aban ariñahani luagu katei le. Gayaraati narufuduni hun?”. Anhein arufuda gürigia busén lan lafurendeirun, gayaraati hederegerun aban garüdia lun o hóunahan aban lun luéigiñe Internet. Gayaraati hadügüni lira, íbini lidan furumiñeti hayanuhan hama gürigia. Lau sun mámatima lan lun wafanreinhan agumeiraguagüdüni wapurichiha, gayaraati tahuudun Garüdia Awisahatu tuma Agaguduabá! lun wasubudiruni kátaña lan gürigia busenbaña haganbuni Bungiu (Adü 13:48).

2018

2019

2020