Chülüti dan lun lagumuchun sun lénrengunga

Ménrengunti ladügün lénrengunga lun weferidiruni waguraasun, dántima le ladurarun saragu dan. Subudi lumuti meha Dawidi madurabei lan liturobulin luma Saulu lun súnwandan ani lachülürüba lan dan lun ábanbei lan urúei, ítara kei füramase lani Heowá lun (1 Sa 16:13). Afiñeni le luágubei Dawidi, íderagua lumuti lun gaguraasun lan luma lun lagurabahan lun laranseruni Heowá sun katei.

Dan le wásügürün lídangiñe lénrengunga, gayaraati wóuserun lau duari luma lichú aau, yusu wameime wachügü lun wabuiduragüdüni léibugun katei (1 Sa 21:12-14; Ari 1:4). Lau sun lira, anihein turobuli le maranserunti íbini wadügüni sun wayaraati lun waransehani lau wafalaruni adundehani le tídanbei Bíbülia. Lidan burí kesi le, mosu gaguraasun wamá ani aguraba wagíame lun laranseruni Heowá sun katei. Yarafa madise, lagumuchuba Heowá lau sun katei le adügübei lun wasufurirun ani “laragahabei sun háguira” gürigia (Aruf 21:4). Gayaraati lagumuchun waturobulin ladüga lan yebe Heowá lan agidarubalin o ladüga burí amu resun, le chóurubei: lagumuchuba lan waturobulin. Ruti gurasu woun wasubudiruni katei le.

LÁRIGIÑE HARIHINI BIDÉU GÜRIGIA LIDAN ÚARANI LIDAN ABAN UBÓU BUIN LAU FÁNREINGUAÜ, ÓUNABA HUMÉI ÁLÜGÜDAHANI BURÍ LE:

• Ka lénrengunga úmabei hagagibudagua saragu gefentiña luagu Heowá ha meha lídanbaña suru libiti Meriga?

• Ida liña harufudun gurasu luma ínsiñeni?

• Ka katei súdinitimabei houn íbirigu? (Fili 1:10).