Ida luba san wafurieidun lun laganbuniwa Bungiu?
Tidan Bíbülia, ariñawagúati lun Bungiu: “Aganba bumuti afurieiduni” (Sálumu 65:2). Gayaraati wayanuhan luma Bungiu meberesenga halíañadiwa lan ni ka lan oura, lidan lan yebe umalali héreti o maniñu. Busenti Heowá wáwarun lun Wáguchi. Ani ligía Úguchili buídutimati le gayaraabei Gáguchi wamani (Matéu 6:9). Arufuda lumuti Heowá woun lau ínsiñehabuni ida luba lan wafurieidun lun lun laganbuniwa.
FURÍEI WAMÁ LUN BUNGIU HEOWÁ LIDAN LIRI HESUSU
“Líchugubei [...] Núguchi sun le hamuriahan lidan niri luma, hun” (Huan 16:23).
Arufudati le lariñagubei Hesusu busén lan Heowá lun lúnrügü lan wafurieida luma lun wadügüni lidan liri Hesukrístu, mayusurunga guáriua, sandu, ánheligu ni waduheñu ha hilaguaañabaña. Dan le wafurieidun lidan liri Hesusu, warufuduñein lun Bungiu subudi wamani aganba lániwa seremei le ladügübei Hesusu wawagu. Ariñagati Hesusu: “Úati achülürüti lumoun Bungiu Úguchili anhein mama lubéi nuéigiñe” (Huan 14:6).
AYANUHA WAMÁ LUN TÍDANGIÑE SUN WANIGI
“Hadimureha lidan furíeigi lau sun hemenigin” (Sálumu 62:8).
Dan le wayanuhan luma Heowá, lunti wadügüni kamá wayanuhaña luma aban úguchili le hínsiñehabubei woun. Moun lumuti waliihani wafurieidun tídangiñe somu líburu ni wariñaguni lídangiñe wachügü, lunti wayanuhan luma Bungiu lau inebesei ani tídangiñe sun wanigi.
KATEIRÜGÜLÁ LE AUBEI LAGUNDAARA BUNGIU WAMURIAHA
“Ánhawa [...] amuriaha furumiñeguarügü katei keisi lugundan, laganbubadiwa” (1 Huan 5:14).
Ariñaga lumuti Bungiu woun tidan Bíbülia kaba lan ladüga wawagu luma ka lan lagurabubei wámagiñe. Lun laganbuni Bungiu wafurieidun, lunti wadügüni “keisi lugundan”. Lun wadügüni ítara, gasu wasagarun dan lun waturiahanu Bíbülia, ítararügübei buídutima lan wasubudiruni. Ítarati, laganbubadiwa lau sun lugundan.
KA BURÍ KATEI UÁGUBEI GAYARA LAN WAFURIEIDUN?
Furíei wamá luagu le wemegeirubei. Gayaraati wamuriahan luma Bungiu lun líderaguniwa ibihei létima wemegeirubei kéiburi éigini, daüguaü luma halíaba lan wawinwanda. Gayaraati giñe wamuriahan luma lun líderaguniwa anúadira buidu, ru ligíame erei woun lun wawandun lénrengunga. Gayaraati giñe wayumuragun lun lun feruduna lániwa, lun líchugun lanwoun wafiñen luma lun lóunigiruniwa (Lúkasi 11:3, 4, 13; Santiagu 1:5, 17).
Amuriaha wamá hawagu amu. Hínsiñeti houn agübürigu ha buítiña lun hínsiñegua hamá hasaanigu hámagua. Kei Wáguchi lan Heowá, busenti lun wóunigiragun wámagua. Buiti lubeiti lun wafurieidun hawagu waduheñu hama wamadagu, kéiburi lafurieidun wügüri tuagu lani weiriou, würi luagu tani weiriei, agübürigu hawagu hasaanigu... Ariñagati disipulu Santiagu lunti lan wafurieidun hawagu amu afurieida hagíame amu wawagu (Santiagu 5:16).
Ru wamá eteingiruni. Bungiu adügübaliwa ani ariñagatu Bíbülia adüga lan katei buiti wawagu: “Ruti huya woun luma alubahani buiti, ru ligía éigini buídurügüti woun, belugüda lumuti ugundani tidoun wanigi” (Adügaü 14:17). Ánhawa asaminara luagun sun buiti le adüga láalibei Bungiu wawagu, busenbadiwa weteingiruni. Mosu giñe warufuduni geteingiradi wamá lun lau gaganbadi wamá lun Lilurudun (Kolosana 3:15).
GAGURAASUN WAMÁ ANI SIGÍ WAMÁ AFURIEIDA
Anihein dan gayara lan wasandirun maguraasuni dan warihini mounabúniwa lan wafurieidun lau lóufudagun. Ladüga funa san meberesen lan Bungiu wau? Uá. Ariha wamá fiu kesi le arufudubalin woun anihein lan dan mosu lan wasigirun afurieida.
Ayanuhatiwa lidan furumiñeti arütíkulu luagu Steve. Sigiti abahüdagua woun: “Lun hamuga meha masigi nan afurieida, lüha hamuga neferidiruni nemenigin luagu nagundaarayaba lan”. Ka íderagubalin? Aba lagumeserun aturiahoun Bíbülia ani furendeiti mosu lan lasigirun afurieida. Ariñagati: “Teinki numuti Bungiu luagu ídemuei luma ínsiñehabuni le neresibirubei hámagiñe numadagu, gúndaatimahadina guentó”.
Kati asuseredubei tun Jenny, to meha saminaboun madüna tan lun laganbuni Bungiu tafurieidun? Ariñagatu: “Lidan dan le hénrengutimabei nun lidan nibagari, aba nayumuragun lun Bungiu lun líderagunina gunfurandei ka lan uagu lanarimebei luriban nasandiragun nungua”. Ida liña líderagunu tafurieidun? “Íderagua lumutina nayanuhan luma Bungiu lun naríagun nungua kei larihinina. Aba níchugun fe íbini lan dan le tíchugun nanigi nidurun, madügün lani Bungiu. Íderagua lumutina giñe furíei lun mábürühan lan narüna”. Ka lanügübei lira tun? “Íderagua lumutina furíei arihei Heowá kei aban umadaü úaraguati, kei aban Úguchili hínsiñehabuti luma kei aban Bungiu inarüniti. Ánhana áfaagua lun nadügüni le hínsiñebei lun, númabei súnwandan ani líderagubadina”.
“Narihini gunda lan libagari nisaani lau sun danima lan, ligía óunabagülei buídutimabei lun nafurieidun”, tiña Isabel.
Guentó, ariha waméi le asuseredubei tun Isabel. Dan le tadageinadunbei, aba hariñagun surusiagu tun danimabei lan irahü le lunbei nasirua lan tun. Ítagaraü yebe tounwen! Añahein ariñagutiña tun lun taragachuni irahü, ariñagatu: “Lidoun meha dan ligía, sanditina meha kamá hamuga nounwe le lanarime nigarigu”. Kati tadügübei? “Furíeitina lun Bungiu saragu wéiyaasu lun líderagunina”. Lau lásügürün dan, aba gasaani tani Gerard ani inarüni danima lan. Sanditu san Isabel óunaba lani Bungiu tafurieidun? Anha. Ida liña ladügüni? “Katourusu irumu lau Gerard guenlé ani ligía abiniruni wéiritimabei lidan nibagari. Narihini gunda lan libagari nisaani lau sun danima lan, ligía óunabagülei buídutimabei lun nafurieidun”.
Adügati lubuidun burí dimurei le lun waritaguni le lariñagubei aban abürühati sálumu lun Heowá: “Aganba bumuti hafurieidun ha ǘnabugubaña rútibu gurasu houn, teni buguya houn” (Sálumu 10:17). Ma inarüni anihein lan resun wama lun wasigirun afurieida?
Tidan Bíbülia, gayaraati waliihan saragu lídangiñe furíei le meha ladügübei Hesusu. Le larufudahabei houn lánigu disipulu subudiwatimabei lídangiñe súngubei. Ka gayaraabei wafurendeiruni lídangiñe?