Ida buga lariñaga Hesusu lachülürüba lan lagumuchagüle ubóu le?

SAMINA HUMÁ LUAGU BIÁN KATEI LE LARIÑAGUBEI HESUSU:

“Agagudúañu humá, ladüga ibidiñeti hun kaba lan weyu ni kaba lan oura” (MATÉU 25:13).

“Lunti lubeiti aranseñu humá, agagudúañu, [...] ladüga ibidiñeti hun ídaame lan lachülüra oura ligía” (Márükosu 13:33).

Ligíati ibidiñe lubéi lun ni aban ya ubouagu ídaame lan lachülüra lagumuchagüle ubóu le. Anhein Bungiu anúadiraali aban dan, “weyu luma oura” lun liabin lagumuchagüle ubóu le (Matéu 24:36). Mini lan san le luagu ibidiñewabei lan luagu yarafaali lan lagumuchagüle ubóu le? Inó. Ariñagati Hesusu houn lani disipulugu lun hetenirun lun burí fiu sügǘ le lunbei larufuduni luagu yarafaali lan.

SEINI

Sügǘ burí le ligíaba arufudei “liseinin lagumuchagüle ubóu”. Ariñagati Hesusu: “Lageindaguba aban ageiraü luma aban, lawuribuhaba aban fulasu luma aban; ñeinbei ilamaü luma hárabaganali lidan saragu fulasu” (Matéu 24:3, 7). Ariñagati giñe ñeinbei lan burí “sandi” (Lúkasi 21:11). Ariha humuti san lagunfuliruña lan profesía burí le lariñagubei Hesusu?

Uguñe weyu súfuritiña saragu gürigia ladüga lanarime burí wuribu, ilamaü, hárabaganali luma ámuñegueinarügü sandi. Kei hénpulu, lidan irumu 2004 aba ladagarun aban hárabaganali, barana Índiku, adügati lun liabin aban tsunami le agumuchubei lau habagari kéiburi 225,000 gürigia. Lidan ǘrüwa irumu, áfarati sandi COVID-19 hóugiñe 6 míñunu gürigia lidan sun ubóu. Ariñagati Hesusu sügǘ burí lan líbeina le arufudubalin yarafaali lan lagumuchagüle ubóu le.

“LAGUMUHÓUN DAN”

“Lagumuhóun dan” tagúahan Lererun Bungiu lun dan le lubaragiñebei lagumuchagüle ubóu (2 Féduru 3:3, 4). Kei lariñaguni 2 Timotéu 3:1-5, lidoun burí lanme lagumuhóun dan, máhabaña lan gürigia lun lilurudun Bungiu libügürü laruman ibagari (ariha huméi rekuáduru “Murusun dan lubaragiñe lagumuchagüle ubóu”). Ariha humuti san hóunguarügüñein lan gürigia habusenra buiti, furundetiña, hínsiñeti seinsu houn ani wuribati hóuseruniña amu? Arufuda lumuti giñe katei le yarafatimahadiwa lan lun lagumuchagüle ubóu.

Átiribeiti ladurarun lagumuhóun dan? Ariñagatu Lererun Bungiu murusunrügübei lan dan ladurarun. Ábameti lagünrinchaguniña Bungiu “ha agünrinchagubalin ubóu” (Arufudúni 11:15-18; 12:12).

YARAFAALI DAN LUN ÁBANBEI LAN PARAÍSU SUN UBÓU

Seti laali Heowá weyu luma oura lun lagumuchun lau lagübüri ubóu le (Matéu 24:36). Lau sun lira: “Mabusenrunti [Bungiu] lun leferidirun ni aban” (2 Féduru 3:9). Ligíati ruti chansi woun súngubei lun wasubudiruni luma lun gaganbadi wama lun. Ka uagu? Ladüga busén lan lun wásügürün wínwanñu lídangiñe lagumuchagüle ubóu le luma lun wawinwandun lidan iseri ubóu le lunbei ábanbei lan paraísu.

Aransehaali Bungiu aban programa lánina arufudahani lidan sun ubóu lun lachoururuni sun lan wagía gayara lan wafurendeiruni le wemegeirubei wadügün lun wawinwandun lidan iseri ubóu lábugiñe Larúeihan. Ariñagati Hesusu lapurichihóuba lan uganu buiti le luáguti Larúeihan Bungiu “lidan sun ubóu” (Matéu 24:14). Apurichihatiña gefentiña luagu Heowá saragu míñunu oura lidan sun ubóu, arufudaha haméi emenigini le tíchugubei Lererun Bungiu. Ariñagati Hesusu ladügǘba lan wadagimanu lánina apurichihani le lidan sun ubóu lubaragiñe lachülürün lagumuchagüle ubóu.

Lidan murusun dimurei, chülümémeeli dan lun lagünrinchawagun harúeihan gürigia. Lau sun lira, anihein uganu buiti luagu gayara lan wasalbarun lídangiñe lagumuchagüle ubóu le, lunme wawinwandun lidan Paraísu le füramase láalibei Bungiu. Layanuhóuba luagu le lidan le aban fánreinti luagu le lunbei wadügüni lun wawinwandun lidan iseri ubóu.