Derebugu lan wakipuruni wemenigin

1. Ka emenigini líchugubei Heowá woun?

RÚHALI Heowá aban lubuidun emenigini woun le lánina ibagari magumuchaditi. Fiu hádangiñe lubúeingu Bungiu agurabatiña hawinwandun lun sun dan sielu kei sífirigu móunwedaditiña (1 Ko. 15:50, 53). Gama lumoun hiibe-agei hádangiñe agurabatiña hawinwandun ya ubouagu lun sun dan lau aban lubuidun átuadi (Aruf. 21:3, 4). Sun wagía gúndaatiwa lau wemenigin meberesenga anhein yaaba lubéi ubouagu wawinwanda o sielu lan.

2. Ka lébunabei emeniginibei, ani ka uagu?

² Dan le tayanuhan Bíbülia luagu emenigini, gayaraati wachoururuni lasusereda lan katei buiti. Ligíati, chouru wamuti lagunfuliruba lan emenigini le ladüga lúmagiñe Heowá liabin (Rom. 15:13). Subudi wamuti le füramase lubéi Heowá ani subudi wamuti giñe súnwandan lan lagunfuliruni le füramase lubéi (1 Lur. 23:19). Chouru wamuti busén lan Heowá ani gayara lan ladügüni sun le úagubei lariñaga ladügübei lan. Mama lídangiñe wasaminan liabin wemenigin ni lídangiñe le wabusenrubei lun lasuseredun, lídangiñe katei le wasubudirubei inarüni lan ñéingiñe liabin wemenigin.

3. Kaba wariha lidan aturiahani le? (Sálumu 27:14).

³ Hínsiñetiwa lun Wáguchi Bungiu le siélubei ani busenti lun wafiñerun luagu (aliiha huméi Sálumu 27:14). Anhein derebugu lubéi wemenigin luagu Heowá gayaraabei wawanduni óuchawaguni luma lun wagagibudagun lau ganigi luma lau ugundani luma le lunbei liabin ámuñegü. Lidan aturiahani le warihibei ida luba lan lóunigiruniwa emenigini. Furumiñe ariha waméi ka lan uéigiñe wariñaga ítara liña lan wemenigin kei aban óunguru o kei aban lubunidin súdara. Ani lárigiñe warihiba ida luba lan wakutihani emenigini le.

ÍTARA LIÑA WEMENIGIN KEI ABAN ÓUNGURU

4. Ka uagu ítara liña lubéi emenigini kei aban óunguru (Ebüréu 6:19).

⁴ Tidan gárada to labürühaboun Pábulu houn ebüréuna agoubaguagüda lumuti emenigini luma aban óunguru (aliiha huméi Ebüréu 6:19). Súnwandan laweiyasuhan Pábulu baranahagiñe, ligíati subudi lubalin adüga lan óunguru lun mabareihalanu barana waporu. Luagu aban dan, dan le laweiyasunhabei tidan aban waporu, aban ladagarun aban lanarime liñawan dan. Lidan dan ligía, aba larihini hachüürüni mádulungu óunguru lun moudin tan waporu ábugucha luagu dübü (Adü 27:29, 39-41). Ítara kei ladügün aban óunguru lun mabareihan lanu garabali aban waporu adügati giñe wemenigin lun madisedun wamá luéi Heowá dan le wagagibudagun luma turobuli le ítarabei kei aban lanarime liñawan dan baranaha. Lau aban emenigini buiti ani le derebuguti luagu yarafa madise lan liábinburiba lan dan buíduburiti líderagubadiwa lira lun wagagibudagun luma turobuli le lánina ibagari le ítarabei kei durumandei. Haritagua wamá ariñaga lan Hesusu wéibaahouba lan (Huan 15:20). Ligíati, lau wararamagun asaminara luagu afayeiruahaü le füramase lubéi Heowá woun líderagubadiwa lun wasigirun eseriwida lun.

5. Ida liña lágüdahani emenigini Hesusu dan le lagagibudagunbei luma óunweni?

⁵ Ariha waméi ida liña lan líderaguni emenigini Hesusu lun úaragua lan subudiga lun lasufurira lan aban óunweni gáriti. Lidan weyu Pentekosutesi lidan irumu 33 lidaaniwagu Kristu íridati Féduru aban profesía lídangiñeti Sálumu le arufudubalin lidan aban igaburi buiti darangilaü luma afiñeni le lasandirubei Hesusu, lariñaga lidan Sálumu: “Labagariduba sun núgubu lau emenigini, ladüga mígirun bubadina lidan umúahaü, mígirunbadibu lun lañaladun lúgubu bubuein le sándubei! Barufudubei lémeri ibagari nun, ani bagundaaragüdübadina lau biñuarü” (Adü. 2:25-28; Sal. 16:8-11). Íbini subudi lani meha Hesusu luagu lóunweba lan chóuruti meha lemenigin luagu láguyuguagüdübei lan Bungiu ani lagiribuduba lan sielun lumoun Lúguchi (Ebü. 12:2, 3).

6. Ka lariñagubei aban íbiri luagu emenigini?

⁶ Ídehaali hemenigi kristiánugu lun gayara lan wawandun saragu hádangiñe óuchawaguni. Ariha waméi le asuseredubei lun aban íbiri úaraguati gíriti Leonard Chinn, le meha awinwandubei Ingülatéra. Lidan Furumiñeti Wuribu Wéiriti, aba hadaürüni ladüga maha lan lasudarahan. Aba hígiruni bián hati lábugua, lárigiñe aba híchuguni lun lawadigimaridun saragu ani le dereti. Dan lárigiñe abürühati: “Arufudahati sügǘ ligía nun, súdini lan emenigini lun gayaraabei lan nawandun. Dandu lani Hesusu hénpulu, hani apostolugu luma hani profetagu ítara kei lubuidun füramasei le tídanbei Bíbülia ruti aba lubuidun emenigini lubá ámuñegü luma erei lun wawandun”. Ítara liña emenigini lun Leonard, kei aban óunguru ani gayaraati giñe ítarameme lan woun.

7. Ida liña lederebugudun wemenigin dan le wásügürün lídangiñe óuchawaguni? (Rómana 5:3-5; Santiagu 1:12).

⁷ Aba derebugu lan wemenigin dan le wawandun óuchawaguni ani ariha wamuti burí ida liña lan líderaguniwa Heowá luma gunda lan wau (aliiha Rómana 5:3-5; Santiagu 1:12). Ítara liñati derebugutima lan wemenigin guentó sügǘ luéi dan meha le wasubudirunbalin inarüni. Busenti Satanási lun ladiheridagüdüniwa turobuli, lau lídehan Heowá gayaraati wagagibudagun luma kada aban lídangiñe.

ÍTARA LIÑA EMENIGINI KEI ABAN LUBUNIDIN SÚDARA

8. Ka uagu ítara liña lubéi emenigini kei aban lubunidin súdara? (1 Tesalónikana 5:8).

⁸ Ariñagatu Bíbülia ítara liña lan wemenigin kei aban lubunidin súdara (aliiha huméi 1 Tesalónikana 5:8). Ladaürübalin aban súdara lubunidin lun lóunigiruni lábulugun, lun madaga lan lagayuahan lágani luagu lichügü. Lidan wawuribuhan luma Mafia lunti wóunigiruni wasaminan luéi. Yúsuti ámuñegueinarügü katei lun lóuchaguniwa luma burí saminaü mabuidunti lun lagadeiruni wasaminan. Ítara kei lóunigiruni bunidi lábulugun aban súdara, ítara liña giñe lóunigiruni emenigini wasaminan lun úaraguameme wamá lun Heowá.

9. Ka asuseredubei dan le memenigin hamá gürigia?

⁹ Líderagubadiwa emenigini lánina ibagari magumuchaditi lun wanúadirun buidu. Ánhawati asaminara luágurügü le wayumahabei, gayaraabei ledebilidun wemenigin. Samina wamá luagu le asuseredubei houn hádangiñe kristiánugu ha lídanbaña binadu uburugu Korintu. Féridi hamaali meha hafiñen luagu aban füramasei súdiniti le ladügübei Bungiu, luagu ñeinbei lan águyuguni (1 Ko. 15:12). Ariñagati Pábulu ha lan mafiñenbaña lun arufudahani le hawinwanduña lan lúnrügü hadügüni le hayumahabei (1 Ko. 15:32). Uguñe weyu añahein saragu gürigia ha mafiñentiña luagu füramasei le ladügübei Bungiu, ligíati hadügünbalin sun hayaraati lun hawinwandun lúnrügü hadügüni hagundan guánarügü. Ánheinti wagía afiñetiwa luagu füramasei lubéi Bungiu lubá ámuñegü. Ítara liña hemenigin kristiánugu kei aban bunidi le hayusurubei súdaragu, góunigi lumuti wasaminan ani íderagualawa lun masaminarun wamá wawouguounrügü ladüga gayaraati lagadeiruni katei le wamadagua luma Heowá (1 Ko. 15:33, 34).

10. Ida luba líderaguniwa emenigini luéi saminaü mabuidunti?

¹⁰ Góunigi lumutiwa emenigini luéi saminaü le, mala lan wáfaagun lun wagundaaragüdüni Heowá. Kei hénpulu, gayaraati hamuga lasaminarun aban gürigia: “Meresibirubaadina ibagari magumuchaditi. Wuribati nigaburi. Siñá nubéi agunfulira le lagurabubei Bungiu hámagiñe lubúeingu”. Haritagua wamá luagu Elifási, aban hádangiñe hagübüri lumadagu Hobu, le ariñagubei aban katei líbeina le: “Úatiña gürigia harumatiña”. Ariñagayati luagu Bungiu “Míchugun lumuti lafiñen ni íbini hawagu ánheligu, íbini sielu wíyeti ligibugiñe lagu” (Hob. 15:14, 15). Ma lanarime iyeeni! Haritagua waméi Satanási lan busenbei lun wasaminarun ítara. Subudi lumuti ánhawa lan asigira asaminara luagu burí katei le murusun murusun eferidireina luba wemenigin. Ligíati, áfaagua wamá lun metenirun wamá lun iyeeni le ani teni wamá lun le füramase lubéi Heowá. Ani chouru waméi busén lan Heowá lun hawinwandun lubúeingu lun súnwandan ani líderagubadiwa lan lun wibihini (1 Tim. 2:3, 4).

IDA LUBA DEREBUGU LAN WAKIPURUNI WEMENIGIN

11. Ka uagu lunti lubéi gaguraasun wamá sunme ánhawa lan agurabahei weyu lun lagunfulirun wemenigin?

¹¹ Mama súnwandan lun ménrengun lan lun wakipuruni wemenigin. Gayaraati weferidiruni waguraasun sun awanha lan agurabahei lagunfulirun le füramase lubéi Bungiu. Kei gabagari lan Heowá lun súnwandan marihin lumuti dan kei warihini (2 Fe. 3:8, 9). Lagunfulirubei sun le labusenrunbei ladügün, gama lumoun, mama lidan dan le wagurabubei. Kaba san íderaguawa akipurei wemenigin derebuguñu luma lun gaguraasun wamá sunme awanha lan agurabei weyu lun lagunfuliruni Bungiu le füramase lubéi? (Sant. 5:7, 8).

12. Según Ebüréu 11:1, 6, ka lánibei emenigini luma afiñeni?

¹² Ánhawa akipuragua woungua yarafañu lun Heowá derebugubei wafiñen lugundun ligía achoururagüdübalin woun lagunfuliruba lan. Agoubaguagüda tumuti Bíbülia emenigini luma afiñeni luagu anihein lan Heowá ani líchugubei lan “hafayeiruáha ha áluahabalin” (aliiha huméi Ebüréu 11:1, 6). Anhein afiñe wabéi anihein lan Heowá, wafiñeratimaba luagu lagunfulirubei lan sun le füramase lubéi. Ariha waméi ka lan lunbei wadügüni lúntima wabuiduragüdüni wamadagua luma, ítara luba here lan wakipuruni wemenigin.

13. Ida luba gayara lan gamadagua wamá luma Bungiu?

¹³ Furíei wamá lun Heowá ani aliiha wamóun Lererun. Inarüni siñá lan warihini Heowá lau sun lira gayaraati lumadagu wamá. Gayaraati wayanuhan luma dan le wafurieidun lun lau afiñeni laganbubadiwa lan (Her. 29:11, 12). Gachansintiwa waganbuni dan le waliihanu Lererun luma dan le wararamagun asaminara luagu le waliihabei. Dan le waliiha ida liña lan lóunigiruniña Heowá lubúeingu ha úaraguabaña ha lánina binadu dan ábatima lederebugudun wemenigin. “Sun le ariñawagúbei tidan Lererun Bungiu lúmagiñe binarü, lun larufudahóun woun labürühóua; bürüwati meha dimurei burí ligía lun wanügün gurasu luma dǘgüdaguaü lídangiñe, gayara láamuga wemenigidúntima luagu Bungiu” (Rom. 15:4).

14. Ka uagu buidu lubéi lun wararamagun asaminara luagu le gayara lubéi ladügün Heowá hawagu amu?

¹⁴ Ráramagua wamá asaminara luagu lagunfuliruni Heowá le füramase lubéi. Samina wamá luagu le ladügübei Abüraámü tuma Sara. Ladüga derebugu haña lan siñá meha gasaanigu hamá, gama lumoun aba füramase lan Bungiu houn gasaanigubaña lan aban irahü (Agu. 18:10). Ida liña lóunabun Abüraámü? Ariñagatu Bíbülia: “Afiñeti Abüraámü [...] háguchibei lan saragu néchanigu” (Rom. 4:18). Íbini ibidiñe lan meha lun Abüraámü ida luba lan lagunfulirun Heowá le füramase lubéi lun, afiñeti meha Abüraámü lagunfulirubei lan Heowá le füramase lubéi lun. Meyeedun lumuti Bungiu wügüri úaraguati le, lugundun ligía tau sun lani weiriou aba gasaani hamá aban irahü (Rom. 4:19-21). Abahüdaguni libe le súnwandan larufudahan woun gayara lan wafiñerun aban lan Bungiu gúnfuliti Heowá lau lererun, íbini genege lan woun hénrengubei lan lagunfulirun.

15. Ka uagu lunti lubéi wasaminarun luagu le adüga laalibei Bungiu wawagu?

¹⁵ Samina wamá luagu le adüga laalibei Heowá wawagu. Ráramaguaadiwa san asaminara luagu lagunfulirun lidan wakesin fiu füramase le tídangiñebei Lererun Bungiu? Kei hénpulu füramaseti Hesusu líchugubei lan Lúguchi le wemegeirubei woun lun wawinwandun (Mat. 6:32, 33). Ariñagati giñe Hesusu líchuguba lan Heowá sífiri sandu woun anhein wamuriaha luma (Luk. 11:13). Gúnfuli laali Heowá füramasei burí le. Ani chóuruti ñübuin lan wachügüwagun ámuya füramasei le agunfulirubei lidan wakesin, kei burí feruduna lániwa Bungiu, líchugun dǘgüdaguaü woun luma lau líchugun ariñahani woun le ítarabei kei éigini (Mat. 6:14; 24:45; 2 Ko. 1:3). Ánhawa araramagua asaminara luagu le adüga laalibei Bungiu wawagun, derebugubei wafiñen luagu le lunbei ladügüni ámuñegü.

GUNDA HUMÁ LUAGU EMENIGINI

16. Ka san uagu aban lubéi idewesei gebegiti emenigini?

¹⁶ Aban idewesei gebegiti lúmagiñeti Bungiu emenigini lánina ibagari magumuchaditi. Wayumahaña lun lachülürün lubuidun weyu ligía ani chouru wamuti lachülürüba lan. Ítara liña emenigini kei aban óunguru lugundun íderagua lumutiwa lun wagagibudagun luma óuchawaguni, luma éibaahouni íbini luma óunweni. Ítara liña giñe kei lubunidin súdara ladüga góunigi lumuti wasaminan ani íderagua lumutiwa lun wamaharun lun le wuribabei luma lun wárügüdün luagu le buídubei. Íderagua lumutiwa emenigini le tídanbei Bíbülia lúntima wayarafadun lun Bungiu ani ligía aban katei le íchugubei ichouruni woun luagu lanarime ínsiñeni le lasandirubei wawagu. Buídubei wadüga wakipuruni wemenigin derebuguñu.

17. Ka uagu ladüga wemenigin lun wagundaarun?

¹⁷ Tidan gárada to labürühaboun apostolu Pábulu houn kristiánugu ha Rómabaña ariñagati: “Abagarida humá gúndaañu lau emenigini le huágubei” (Rom. 12:12). Gayaraati meha lagundaaragun Pábulu ladüga chouru lumuti leresibiruba lan ibagari magumuchaditi sielu anhein meha asigira úaragu lun Heowá. Gayaraati giñe wagundaarun luagu wemenigin ladüga chouru wamani lagunfulirubei lan Heowá le füramase lubéi. Kei lariñaguni aban abürühati sálumu: “Fuleseiwatiña [...] ha íchugubalin hemenigin luagu Bungiu” lugundun úaraguati súnwandan (Sal. 146:5, 6).