Aturiaha wamá lun warihin kaba lan wafurendeira

Danme le waransehaña lan lun waturiahan, másiñati wálügüdagun woungua: “Kaba san nafurendeira lídangiñe le lunbei naturiahani?” Íbini buidu lan wabusenrun wafurendeirun, súdiniti lun warihini kaba lan iseri katei labusenra Heowá larufudahan woun. Ida luba gayara lan wadügüni?

Amuriaha wamá lichú aau luma Heowá. Ua lan buídurügü lan woun le furendei wamaalibei (Ari. 3:​5, 6). Amuriaha wamá luma Heowá lun líderaguniwa asubudirei ka lan labusenrunbei lun wafurendeiruni lidan dan ligía (Sant. 1:5).

Ígira wamá lun tadundehani Lererun Bungiu wabagari. “Wínwantu Lererun Bungiu” (Ebü. 4:12). Anhoun waliiha lun warihini kaba lan wafurendeira tídangiñe, gayaraabei tarufudahan iseri katei woun ani gayaraabei giñe tíderaguniwa lidan ámuñegueinarügü igaburi.

Ru wamá seremei lun Heowá luagu sun le líchugubei woun. Ítara liña ariñahani le líchugubei Heowá woun kei “lubuidun-agei éigini semeeti” (Isa. 25:6). Masaminara wamá mínsiñebei lan ariñahani le ítarabei kei “éigini” woun. Wafurendeiruba saragu katei buiti lídangiñe ani lahuuduba woun.