Le lanügübei wuribu luma anarimeni woun súngubei
“Lárigiñe libiaman wuribu wéiriti, gíbetimahali ageindaguni ubouagu, ani hawinwanduña wein-seingü hádangiñe kada san gürigia—2,000 míñunu gürigia— lidan burí fulasu le ñein lubéi turobuli le”.
Amina Mohammed, vicesecretaria general tani Óundaruni hani néchani, 26 lidan eneru, irumu 2023.
Gayaraati lagumeserun wuribu luma anarimeni lidan burí fulasu le ñein lubéi darangilaü furumiñeguarügü oura. Ligíati, íbini wawinwanduña lan lidan fulasu le ñein lubéi ua lan ageindaguni, súfuritiña gürigia ladüga wuribu le asuseredubei lidan amu ageiraü. Ani dan le lagumuchun ageindaguni, súfuritiña gürigia luagu saragu dan. Ariha wamá fiu hénpulu:
Lilouguan éigini. Ariñagatu áfisi to arihiboun lau éigini lidan sun ubóu, “ageindaguni lan lébunabei ñein lan ilamaü, lugundun 70% hádangiñe gürigia ha asufurirubaña ilamaü ubouagu, wínwantiña lidan fulasu le ñein lubéi wuribu luma anarimeni”.
Lisandi ichügü luma amu burí sandi. Gürigia ha awinwandubaña lidan burí fulasu le ñein lubéi wuribu, wínwantiña lau saragu idiheri. Barüti katei le saragu sufuri luma sun luwuyeri sandi houn ani anihein lisandi ichügü laganagua. Lanwoun lira, liibe-agei dan madaritiña halíaba lan lagaranihóua houn.
Hanurahan gürigia ladüga wuribu. Ariñagati wügüri le anügübalin ubaraü tidan Óundaruni hani néchani, lúmagiñe lan nefu-hati, irumu 2003, fósuwatiña lan hóugiñe 114 míñunu gürigia lidan sun ubóu lun hanurahan hageiragiñe. Ani wuribu luma anarimeni lébunabei turobuli burí le.
Turobuli le lánina seinsu. Kamaniti lun laganwoundun turóbuli le lánina seinsu —liñurun lebegi katei— dan le ñein lan wuribu. Dántima gibe lan hagastarun gumadimatiña lidan wuribu, aba lalouguadun seinsu le hayusurubei lun hadügün háspitali tuma burí leskuela, gayaraati lanügün katei le saragu asufuriruni houn ha lábugiñebaña hagumadihan. Ani gíbeti giñe seinsu hagastarun lunya haranseragüdüni ageiraü lárigiñe wuribu.
Lagadeirúniwa ubóu. Súfuritiña gürigia dan le lagünrichawagun sun le geyegubei hau luma le hemegeirubei lun hawinwandun. Gayaraati ladügün lawiyedúniwa múa, duna, luma garabali lun lagadeirun hátuadi gürigia. Denchatu giñe bonba to igirúboun lárigiñe wuribu.
Furanguti seru lan lebegi wuribu ani barüti saragu günringuaü.