Ídaba san lagumucha wuribu luma anarimeni?

LAGUMUCHUBA BUNGIU LAU HARÚEIHAN GÜRIGIA

Lagumuchuba Bungiu lau sun harúeihan gürigia lidan aban wuribu le unbei tagúara Bíbülia Arümahedón (Arufudúni 16:16).a Lídanme dan ligía, “sun urúeigu [o gumadimatiña] ha ubouagubaña” hóundarawaguba lubá “wuribu le lánina óunwenbu luéyuri Bungiu le Suntigabafu” (Arufudúni 16:14). Lidan Arümahedón, lagumuchuba Bungiu lau sun wuribu.

Lagidarubei Bungiu sun harúeihan gürigia ani ábame líchuguni Larúeihan leweñegua. Lagumadihaba siélugiñe ani úabei lunti lagumuchaguagüdüni (Danieli 2:44). Anúadira láali Bungiu, Hesukrístu le Lisaani, kei Lurúeite Larúeihan (Isaíasi 9:6, 7; Matéu 28:18). Anihán Arúeihanib le úagubei layanuhan Hesusu dan le larufudahabei houn lani disipulugu ida luba lan hafuríeidun (Matéu 6:9, 10). Lábugiñebaña Arúeihani le sun gürigia, ani Hesusuba alidihei.

Mítaranbei Hesusu kei gumadimatiña ha ubouagubaña, mayusurun lubéi lubafu lun lubuidun guánarügü. Kei aban lubéi Urúei le richati ani úati himei lan aban gürigia luéi aban, buídubei lóuseruniña sun gürigia. Masufurirunbei ni aban ladüga lídangiñeti lan ítaga rasa o ladüga fulasu le ñéingiñe lubéi liabin (Isaíasi 11:3, 4). Mageindagun hañame gürigia luagu haricha ladüga líchugubei Hesusu sun le hemegeirubei gürigia houn. “Lesefurubaña gudemetiña ha ayumuragubaña, hamá giñe ha míderawagunbaña […]. Lesefurubei habagari gudemetiña. Lesefurubaña hawéi ha óuseragubaliña” (Sálumu 72:12-14).

Lagünrinchaguboun Larúeihan Bungiu sun árüma, to adügüboun lun hóunwegun saragu gürigia (Mikeasi 4:3). Lagumuchúba giñe hau sun gürigia ha ganigibaña wuribu, luma hau ha mígirunbaña lun ñein lan darangilaü (Sálumu 37:9, 10). Dandu wügüriña, würiña hama irahüñü hasandiraguba houngua lau ichouruni ñein lumuti houdin (Esekiéli 34:28).

Buídubei ibagari lábugiñe Larúeihan Bungiu. Lagumuchúba lau turobuli le adügübei lun ñein lan ageindaguni, gudemei, ilamaü luma túan muna. Súnwandan ñeinbei lan saragu éigini semeeti houn súngubei. Gábanbaña sun gürigia, ani buídubei hasandiragun houngua tidan (Sálumu 72:16; Isaíasi 65:21-23).

Lagumuchuba Larúeihan Bungiu lau sun katei wuribati le lanügübei wuribu. Ani mámarügübei buleseiti luma igarigu le lanügübei wuribu agidarúa. Lagidarubei giñe igarigu le lígirubei. Háguyuguba ha óunwegubaña lunya hawinwandun ubouagu (Isaíasi 25:8; 26:19; 35:5, 6). Hóundaraguba iduheñu lidan aban ani habulieidubei sun luriban aritaguni le lígirubei wuribu (Arufudúni 21:4).

LAGUMUCHUBA BUNGIU LAU FIGÓU

Ladügüba Larúeihan Bungiu lun háhuduragun sun gürigia lau úarani lun Heowác, Bungiu le inarüniti, “le lánina darangilaü luma ínsiñehabu” (2 Korintuna 13:11). Hafurendeiruba gürigia awinwanda lau darangilaü hámagua (Isaíasi 2:3, 4; 11:9). Sun ha awinwandubalin le hafurendeirubei hesefuruba lídangiñe sun katei wuribati le lanügübei figóu (Rómana 8:20, 21).

LAGÜNRINCHAGUBEI BUNGIU SATANÁSI HAU SUN LUMAFIANU

Lagünrinchagubei Larúeihan Bungiu Satanási hau sun lumafianu ani siñá háalime hínchahaniña gürigia lun houndin awuribuha (Arufudúni 20:1-3, 10). Kei úaali lanme Satanási ni lumafianu, ñeinbei “saragu darangilaü” (Sálumu 72:7).

Chóuruti lagunfulirubei lan Bungiu sun le füramase lubéi lun lagumuchun lau wuribu luma anarimeni, lugundun gayara lumuti adüga ani busenti ladügüni.

• Gabafuti Bungiu lun lagumuchun lau wuribu luma anarimeni ani subudi lumuti ida luba lan ladügüni (Hobu 9:4). Úati ni kata le lásiñarubei adüga (Hobu 42:2).

• Gáriti lun Bungiu larihiniña gürigia asufurira (Isaíasi 63:9). Ani “iyereegutiña [sun] ha hínsiñehabubaña lun anarimeni lun” (Sálumu 11:5).

• Súnwandan lagunfulirun Bungiu lau le füramase lubéi ladüga siñá lan leyeehan (Isaíasi 55:10, 11; Titu 1:2).