Gayaraati tíderaguniwa liliburun Hobu dan le wasufuriruña lan

1, 2. Ka uagu buidu lubéi lun waliihanu liliburun Hobu?

ALIIHA humaaru san liliburun Hobu? Íbini barüharu lan líburu to kei burí 3,500 irumu lúmagiñe tabürüdǘniwa, añaheingua gürigia arihoun kei aban tídangiñe líburu to buídutimaboun. Hínsiñeti ligaburi tabürüdǘn líburu to houn gürigia ladüga yúsuti le abürüdübarun dimurei buíduburiti, gabafuti ani le ménrengunti gunfurandawa lan. Inarüni Moisesi lan abürüdübarun líburu to, gama lumoun, lúmagiñe Heowá liabin dimurei buíduburiti le tídanbei (2 Tim. 3:16).

² Aban líburu súdinitu liliburun Hobu. Ka uagu? Luagu aban oubaü, íderagua tumutiwa lun gunfuranda wamani luagu mosu lan hanúadirun dandu ánheligu kei gürigia anhein heseriwiduba lubéi lun Bungiu ladüga ínsiñeni le hasandirubei luagu o luagu liri. Íderagua tumutiwa giñe lun wasubudirun ámuya lubuidun ligaburi Bungiu kei burí ínsiñeni, lichú aau, irichaü luma ubafu. Kei hénpulu, tidan líburu to wáwati lun Heowá saragu wéiyaasu “Suntigabafu”, sügǘ lau tidan amu burí líburu to tídanboun Bíbülia. Óunaba tumuti giñe liliburun Hobu saragu amu álügüdahani luáguti ibagari kei burí ka lan uagu lígira Bungiu lun ñein lan asufuriruni.

3. Ka buiti asagarúbei dan le taturiahóuniwa liliburun Hobu?

³ Gayaraati wariñagun ítara liña lan waliihanu liliburun Hobu kamá hamuga wamudeiruña aban wübü íñuti. Dan le wachülürün lábulugu wübü, gayaraati warihini sun le geyegubei wau. Ítarameme, íderagua tumutiwa liliburun Hobu lun warihini waturobulin ítara kei larihini Heowá. Lidan aturiahani le, warihibei ida luba lan tíderaguniwa liliburun Hobu dan le wasufuriruña lan. Warihaali kaba lan wafurendeira lídangiñe le meha lásügürübei Hobu ani másiñati sagá hamá meha ísüraelina buiti lídangiñe sügǘ ligía. Lakutihóuba giñe ida luba lan layusurúniwa abahüdaguni le lun wíderagun amu.

ÍGIRATI BUNGIU LUN LASUFURIRUN HOBU

4. Ka idan mítaran lan Hobu kei hádangiñe ísüraelina ha awinwandubaña Ehiptu?

⁴ Wínwanti Hobu lóubawagu Usu. Másiñati dariwa lan fulasu le luagu oubaü le ñéingiñe lubéi laboucha weyu luagu Fulasu Füramasewati nórute luagun Arawia, dan le meha idamuni habéi ísüraelina Ehiptu. Seriwiti meha Hobu lau úaraguni lun Heowá sun meha añaha lan meha hádangiñe ísüraelina áhuduragua houn guáriua Ehiptu (Hos. 24:14; Ese. 20:8). Ligía lariñagubei Bungiu luagu Hobu úa lan “ni aban gürigia kei ligía ubouagu” (Hob. 1:8).a Aban meha wügüri rísiti ani ligía wügüri le súdinitimabei ani le inebewatimabei lidan sun ageiraü (Hob. 1:3). Chóuruti gañi lan meha Mafia dan le larihinbalin wügüri subudiwati le ani inebewa ligía eseriwida lun Bungiu lau úaraguni.

5. Ka uagu lígira Heowá lun lasufurirun Hobu? (Hob. 1:​20-22; 2:​9, 10).

⁵ Chóurugüda lumuti Satanási líchugubei lan Hobu lanagan luagun Heowá anhein asufurira (Hob. 1:​7-11; 2:​2-5). Lau dimurei le, adügati lun lachülaagun saragu álügüdahani súdiniti. Íbini hínsiñe lan Hobu lun Heowá, ígirati Heowá lun lóuchaguni Satanási Hobu lun gayaraabei lan larufuduni Hobu anhein linarün lubéi Satanási le lariñagubei o liyeeni lan (Hob. 1:​12-19; 2:​6-8). Ligía ladügünbei Mafia lun leferidiruniña Hobu sun libiñanigu, áfaragua laaña 10 lisaanigu ani óunaha ligía aban lanarime sandi luagu le anügübalin sun lúgubu. Gama lumoun, mibihin lumuti Mafia le labusenrubei libihin lugundun kípuguati Hobu lungua úaraguñu lun Heowá (aliiha huméi Hobu 1:​20-22; 2:​9, 10). Lau lásügürün dan, adügati Heowá lun lareidagun Hobu, lunya risi lan, lunya libihini lubuidun liri ani rúyati 10 isaanigu lun. Biní lumuti Heowá Hobu lau líchugun aban limigifen ibagari lun lugundun wínwanyati 140 irumu, ani ítara liña gayara lubéi larihiniña lirahüñü, libañan, lílawagu hama laguragu (Hob. 42:​10-13, 16). Warihaali ida liña lan másiña lan sagá hamá lubúeingu Bungiu ha lánina binadu dan saragu buiti tídangiñe líburu to. Warihaali giñe kaba lan buiti wasagara tídangiñe.

6. Ida luba hamuga meha líderaguniña abahüdaguni luáguti Hobu ísüraelina? (Ariha huméi giñe dibuhu).

⁶ Buiti le meha gayaraabei hasagaruni ísüraelina. Súfuritiña meha ísüraelina Ehiptu saragu. Samina wamá luagu le lásügürübei Hosué luma Kalebü. Sun dan le ñein habéi Ehiptu idamuni meha hagía ani lárigiñe hígirawagüdüniwa Ehiptugiñe, sügütiña 40 irumu éibugei fulasu mageirawati ladüga maganbadi hamá ha híbiri. Anhein subudi lubéi meha houn ísüraelina luáguti louchawagúniwa Hobu luma ida liña lan lagumuchun sun katei, chóuruti íderagua lániña katei le, dandu hagía kei ha ñǘbuinbaña hárigi, lun gunfuranda hamani kátima lan adügübei lun ñein lan asufuriruni. Lanwoun lira, gayaraati meha giñe gunfuranda hamani buidu ka lan uéigiñe lígira Bungiu lun ñein lan asufuriruni luma súdini lan lun úaragua lan gürigia lun.

7, 8. Ida liña gayara lan tíderaguniña liliburun Hobu gürigia ha asufurirubaña? Abahüdaha humá aban sügǘ.

⁷ Buiti le gayaraabei wasagaruni lídangiñe abahüdaguni luáguti libagari Hobu. Ma lirun añahein lan gürigia lidan wadaani féridi hamaali hafiñen luagu Bungiu ladüga ua lan gunfuranda hamani ka lan uéigiñe lasusereda katei wuribati houn gürigia buítiña. Ligía asuseredubei tun aban würi ruandana gíritu Hazel.b Afiñetu meha luagu Bungiu, gama lumoun aba lasuseredun katei wuribati tun le adügübei lun lasansirun tisaminan. Aba hígiragun tagübürigu, ábati tamarieidun túguchu luma amu wügüri le óuserubarun Hazel wuriba. Dan meha le nibureingiru, aba láguragunu aban gürigia. Dan le táluahanbei Hazel gurasu tidan tani relihión, mibihin tumuti. Aban weyu, aba tabürühan aban gárada lun Bungiu le ñein lubéi tariñaga: “Bungiu Núguchi, furíeihadina bun, áfaaguaadina lun nadügüni le buídubei, gama lumoun fáyeibadina lau asufuriruni. Ligíati, anúadiraadina nígirunibu luma lun nadügüni le buídubei nun lun gayaraabei lan nibihin ugundani”. Gáriti woun saragu warihiniña gürigia kei Hazel, ha afiñebaña luagu le hariñagubei amu Bungiu lan adügübei lun ñein lan asufuriruni.

⁸ Furendeihadiwa tidan liliburun Hobu mama lan Bungiu adügübei lun wasufurirun, Mafia lan adügübei lun wasufurirun. Furendeihadiwa giñe lun masaminarun wamá ha lan asufurirubaña halubahañein lan le hábunagubei. Mítaranti katei le, ladüga ariñagatu Bíbülia “chülüti [lan] dan luma sügǘ le magurabunti houn sun gürigia” (Apur. 9:​11, TNM; Hob. 4:​1, 8). Furendeihadiwa giñe ánhawa lan asigira eseriwida lun Heowá lau úaraguni dan le wagagibudagun luma lénrengunga, wídehaña lun warufuduni marasualugu lan Satanási (Hob. 2:3; Ari. 27:11). Arufudaha taali Bíbülia woun ka lan uagu wasufurira luma ka lan uagu hasufurira waduheñu. Seremei wamuti Bungiu luagu ariñahani le! Kati asuseredubei tun Hazel? Aba tagumeserun aturiahoun Bíbülia hama gefentiña luagu Heowá aba tasubudiruni mama lan Bungiu adügübei lun tasufurirun. Ariñagatu: “Aba nadaarunu nanigi lun Heowá. Aba nariñagun lun dan le lan nariñagunbei lun nígiraali lan, le linarün katei masaminarungubeitina meha nígiruni. Le meha asuseredubei, ibidiñe lan meha Heowá nun. Guenleti, subudi naali luagu hínsiñe nan lun, chülüdüga buga dan lun gunda nan”. Ma gúndaatiwa lau wasubudiruni ka lan uagu lígira Bungiu lun ñein lan asufuriruni? Warihaali ida luba lan líderaguniwa abahüdaguni luáguti libagari Hobu dan le wasufuriruña lan.

IDA LIÑA LÍDERAGUNIWA ABAHÜDAGUNI LUÁGUTI HOBU LUN WAWANDUN

9. Kaba hamuga hariñaga luagu Hobu sun aniha lan asufurira? (Santiagu 5:11).

⁹ Samina wamá ñun liña lan Hobu lábuguarügü buin sun lúgubu lau guméi ani lau gáriti. Hanarimeti lueirin lisandi ani wuriha lúgubu ladüga sandi darí lun léiguahan lǘgürügü. Lau murusun erei le luágubei, ábanrügüñein katei gayara lan ladügüni lañuguchagun lungua lau life sóudieru le bóuguaali le lauti múa luma lamumeha lau gáriti. Mámarügüñein sigirügüti Hobu abagarida, sigiti giñe awanda ani lau úaraguni (aliiha huméi Santiagu 5:11). Ka íderagubalin Hobu lun lakipuragun lungua úaraguñu?

10. Ka arufudubalin gamadagua lan meha Hobu luma Heowá?

¹⁰ Sandiguati Hobu lungua gayara lan ladaarunu lanigi lun labahüdahani sun lásügürün lun Heowá (Hob. 10:​1, 2; 16:20). Kei hénpulu, lidan kapítulu 3 ariha wamuti aba lan lekeharun Hobu lau igarigu luagu sun lamiselu le asuseredubei lun lau labulieidagun asaminara lúmagiñe lan Heowá liabin sun lamiselu le lun. Lárigiñe, dan le layanuhanbei hama ǘrüwa nege lumadagu ayanuhati luéigiñegua richá lan. Dimurei le lariñagubei lun Heowá, arufudati samina lan yebe luagu meha aban dan garichatima lan sügǘ lau Heowá (Hob. 10:​1-3; 32:​1, 2; 35:​1, 2). Gama lumoun, ariñagati giñe ladüga lan layanuhan luéigiñegua ariñaga lan dimurei le moun lumuti (Hob. 6:​3, 26). Lidan kapítulu 31 aliihatiwa busén lan Hobu lun líchugun Heowá arigei lun luma lun lariñagun Heowá madurun lan (Hob. 31:35). Furanguti larihín maricha lan Hobu lun lamuriahan luma Heowá lun lafuranguagüdüni Heowá lun ka lan uagu lasufurira.

11. Ka ladügübei Heowá dan le líchugunbalin óunabagülei lun Hobu?

¹¹ Guentó gunfuranda wamaali layanuhanbei lan Hobu lun Heowá ítara ladüga gamadagua lan luma, afiñeñu lóuserubei lan Heowá lau irichaü. Dan le layanuhanbei Heowá lun Hobu laganagua luriban dan, míchugun lumuti sun ariñahani lun ka lan uagu lasufurira. Madeinhanti Bungiu lun Hobu luagu lariñaguni ligaburi lasandiragun lungua lun o luagu madurun lan. Erereharügüti lun kei lererehan aban úguchili le buiti lun lisaani. Ítara liña laguurunu lanigi, aba líchugun Hobu fe lau ǘnabuguni gébeha lan lisubudin. Ligía lasakürihanbei luagu sun le lariñagubei (Hob. 31:6; 40:​4, 5; 42:​1-6). Sagatiña funa san gürigia ha lánina binadu dan buiti lídangiñe abahüdaguni le ani ida liña líderaguniwa uguñe weyu?

12. Ka meha buiti gayaraabei hasagaruni ísüraelina lídangiñe abahüdaguni luáguti libagari Hobu?

¹² Buiti le meha gayaraabei hasagaruni ísüraelina. Samina wamá luagu Moisesi. Kei meha ligía lubéi alidihabaliña ísüraelina, mosu meha lawandun saragu lénrengunga ani gagibugua ligía luma katei le meha gayaraabei ladügün lun lábürühan larüna luma lun leferidiruni luguraasun. Amu ligaburi Moisesi hawéi ísüraelina, ha meha ekeharubaña saragu wéiyaasu luagu Heowá, ánheinti meha Moisesi, abahüdaguarügü lumuti le adiheridagüdübalin lun Heowá (Afu. 16:​6-8; 1 Lur. 11:​10-14; 14:​1-4, 11; 16:​41, 49; 17:5). Mosu meha giñe lawanduni lererehan Heowá lun. Kei hénpulu, sun añaha lan ísüraelina lidan fulasu mageirawati Kadesi, másiñati lagumuchuña lan 40 irumu le haubei ñein, “aba ladimurehan [Moisesi] masaminarunga” ani míchugun lumuti uéiriguni le yuubei lun Heowá lun (Sal. 106:​32, 33). Adügati lira lun mígirun lani Heowá lun lebelurun lidoun Fulasu Füramasewati (2 Lur. 32:​50-52). Chóuruti gari lan katei le lun Moisesi saragu, gama lumoun, arufudati ǘnabuguni ani ánhati lun ererehóuni ligía. Chóuruti íderagua lániña giñe le lásügürübei Hobu ísüraelina ha ñǘbuinbaña lárigiñe awanda lénrengunga. Ánhaña meha araramagua asaminara luagu abahüdaguni luáguti Hobu, gayaraati meha hafurendeirun abahüdahei le hasandirubei lun Heowá. Líderagubaña meha giñe lun masaminarun hamá garichatima hamá sügǘ lau Bungiu luma lun hánharun lau ǘnabuguni lun lererehan Bungiu.

13. Ida luba gayara lan líderaguniwa abahüdaguni luáguti libagari Hobu lun wawandun? (Ebüréu 10:36).

¹³ Buiti le gayaraabei wasagaruni lídangiñe abahüdaguni luáguti libagari Hobu. Mégeitiwa giñe wagía le kristiánugu lun wawandun (aliiha huméi Ebüréu 10:36). Kei hénpulu, másiñati sándiñadiwa lan o anihein lan aban lanarime íruni wawagu o wásügürüña lan lídangiñe somu lénrengunga o hilá lan somu waduhe o wamada, o hásügürüña lan giñe waduheñu o wamadagu lídangiñe somu lamiselu o másiñati lariñagun o ladügün somu gürigia aban katei le adügübei lúntima wawosudun (Ari. 12:18). Gama lumoun, arufudahatu líburu to woun gayara lan wadaarunu wanigi lun Heowá afiñeñu luagu laganbubadiwa lan (1 Huan 5:14). Magañidunbei danme le wariñagun dimurei le moun lumuti dan le wadaarunu wanigi lun kei lasuseredun lun Hobu. Lubaragiñe lira, líchugubei erei luma lichú aau le wemegeirubei woun lun wawandun (2 Kro. 16:9; Sant. 1:5). Ani ítara kei ladüga lun Hobu, anhein ariha megei wamá somu adundehani, líchugubei woun tídangiñe Lererun, tídangiñe lóundarun o layusurubei lan aban wéiyaali lidan afiñeni o aban lan umadaü le derebuguti lafiñen. Arufudati lani Hobu hénpulu woun dan le lan lererehan Heowá woun, mosu lan warufudun awanduni (Ebü. 12:​5-7). Buiti ladüga lun Hobu laganbuni le lariñagubei Heowá, buídubei giñe ladüga woun ánhawa ǘnabugu ani anha wagía lun burí adundehani le ichugúbei woun (2 Ko. 13:11). Gayaraati wasagarun saragu buiti lídangiñe abahüdaguni luáguti libagari Hobu! Ida luba wayusuruni abahüdaguni le lun wíderagun amu? Ariha waméi.

YUSU WAMÓUN LILIBURUN HOBU LUN WÍDERAGUNIÑA AMU

14. Ida liña gayara lan wafuranguagüdüni houn gürigia ka lan uéigiñe lígira Bungiu lun ñein lan asufuriruni?

¹⁴ Dan le wapurichihan, añahein gürigia aba burí hálügüdüniwa ka lan uéigiñe lígira Bungiu lun ñein lan asufuriruni ani hínsiñeti woun lun wafuranguagüdüni houn ka lan tariñagubei Bíbülia. Liibe-agei dan, afuranguagüda wamuti houn ka lan asuseredubei lidan fuluri-agei Edén. Háfuga gumesetiwa ariñaga houn ladüga lan aban ánheli salufuriti le gíribei Satanási wasufurirunbei, aba leyeeduni Adán tuma Ewa, ani adügati katei le lun maganbadi hamá lun Bungiu (Agu. 3:​1-6). Másiñati afuranguagüda wamani houn ladüga lan lebedaagun Adán tuma Ewa lun Bungiu ligía lan wasufurirubei ani hilagua wagía (Rom. 5:12). Lárigiñe, chóuruti ariñaga wamá lígiruña lan Bungiu lun lásügürün saragu dan lun larufuduni luagu marasualugu lan Satanási luma lun hasubudiruni gürigia gayara lan hawinwandunya gürigia mafigounhanga (Aruf. 21:​3, 4). Chóuruti anihán lan aban lubuidun igaburi lun wíderaguniña gürigia lun gunfuranda hamani ka lan uagu wasufurira.

15. Ida luba wayusurunu liliburun Hobu dan le lálügüdüniwa aban gürigia ka lan uagu anihein lubéi asufuriruni? (Ariha humóun giñe iyawaü).

¹⁵ Ábaya igaburi le buiti lun gayaraabei lan wóunabuniña gürigia dan le hálügüdüniwa ka lan uéigiñe lígira Bungiu lun ñein lan asufuriruni, lau wayanuhan luagu Hobu. Lun wagumeserun, buiti lun wariñagun houn buidu lan hadüga lau hadügüni álügüdahani le. Lárigiñe, gayaraabei wariñagun houn anihein lan meha aban wügüri le lánina binadu dan gíriti Hobu, adüga lumuti meha ligiaméme álügüdahani le dan le lasufurirunbei darí lun samina lan Bungiu lan adügübei lun lasufurirun (Hob. 7:​17-21). Másiñati taweiridun hanigi gürigia burí ha lau hasubudiruni adügañaha laali lan aban gürigia lánina binadu dan ligiaméme álügüdahani. Lárigiñe, gayaraabei wafuranguagüdüni houn mama lan meha Bungiu gadurunbei, Mafia lan gadurunbei luagu le meha gádanbalin Hobu. Ariñagati Mafia heseriwidunbei lan gürigia lun Bungiu ladüga heresibirun katei buiti lúmagiñe ani ariñagati giñe ánhaña lan asufurira híchugubei lan hanagan luagun Bungiu. Gayaraati giñe wariñagun houn gürigia lau sun mama lan Bungiu adügübei lun lasufurirun Hobu, ígirati lun lasufurirun ladüga chouru lani gayara lan úaragua hamá gürigia lun luma lun harufuduni marasualugu lan Mafia. Gayaraati giñe wariñagun biní lani Bungiu Hobu ladüga úaragua lan. Kei le aubei warihei, súnwandan gayara lan wíchugun gurasu houn gürigia lau wariñagun houn mama lan lúmagiñe Heowá liabin asufuriruni.

16. Abahüdaha humá aban sügǘ le arufudubalin ida liña lan tíderaguni liliburun Hobu aban gürigia le asufurirubei.

¹⁶ Ariha waméi ida liña lan tíderaguni liliburun Hobu aban wügüri gíriti Mario. Lidan irumu 2021, tapurichihaña meha aban íbiri luéigiñe gágamuru, le furumiñeti gürigia le unbei tagúara, Mario. Aba taliirun aban bérusu tídangiñeti Bíbülia lun ani afuranguagüdatei lun mama lan aganbarügü lumuti Bungiu wafurieidun ariñaga lan giñe woun buídubei lan katei ámuñegü. Dan le tálügüdünbalin ka lan lisaminanbei luagu bérusu, aba labahüdahan Mario tun dan le lan tagúarunbei labürühaña lan aban gárada lubá láfaragun lungua. Ariñagati: “Afiñetina luagu Bungiu gama lumoun, binaafin buga le, sanditina luagu ígira láadina lan”. Dan le tagúarunbei íbiri luagu libiaman wéiyaasu, aba hayanuhan luagu lasufurirun Hobu, keiti busén lubéi Mario laliihanu líburu to, aba tóunahan íbiri aban link luáguti wani páhina jw.org lun gayaraabei lan laliirunu dayarügubei. Ida liña lidin lun? Ánhati Mario lun laturiahanu Bíbülia ani gúndaati lau lasigirun afurendeira luagu Bungiu le arufudubei aban lanarime ínsiñeni lun.

17. Ka uagu lunti lubéi seremei wamani Heowá luagu lígirunu liliburun Hobu tidan Bíbülia to Lererun? (Hob. 34:12).

¹⁷ Inarüni luagu gabafu tan Bíbülia saragu lugundun íderagua tumutiña gürigia ani rutu giñe gurasu houn ha asufurirubaña (Ebü. 4:12). Seremei wamuti Heowá saragu lau lígiruni abahüdaguni luáguti Hobu tidan Lererun (Hob. 19:​23, 24). Ariñagatu liliburun Hobu lau ichouruni: “Madügünti Bungiu Suntigabafu ni kata le wuribati” (aliiha huméi Hobu 34:12). Arufudahatu giñe woun ka lan uagu lígira Bungiu lun ñein lan asufuriruni lúmati ka lan gayaraabei wadügüni lun wawandun. Gama lumoun, íderagua tumutiwa giñe lun gayaraabei lan wíchugun gurasu houn ha asufurirubaña. Lidan leweñegua aturiahani, wafurendeiruba ida luba lan tíderaguniwa liliburun Hobu lun wíchugun lubuidun adundehani luma ererehani.