Lagadeirúña Ubóu | Ka tariñagubei Bíbülia?

“Lau le hadügübei gürigia, málühaña agadeirei Ubóu: Óunwenbu burí fuludu lidan burí uburugu wéinamuti. Lanarime burí lárouga. Luéinamun burí liñawan dan. Likesin duna lidan saragu fulasu. Lagumuchún lau burí ámuñegueinarügü nadü hama animaalugu. Mama aban úraga le nabahüdagubei, mama giñe naweiridagüdüñein katei. Según le tariñagubei siensia, susereti katei lira ladüga ligaburi hahandilihani gumadimatiña gasi, elekütrisida o katei líbeina lira” (Yanu le líchugubei António Guterres, seküretáriu tani Óundaruni hani Néchanigu, lun lóunabuni ariñahani lúmagiñeti Sétanu hani gumadimatiña ha sásaamu lidan luáguti lasansirun ligaburi dan, le áfuridubei weyu 4 lidan gádürü-hati, irumu 2022).

“Eweridihatiña aturiahatiña siensia, lidan burí lanme irumu le lunbei liabin, lagünrinchawaguba lanme liibe-agei áraabu le góunigiwabei [Meriga] ladüga lasansirun ligaburi dan, ladüga ligíatima lan mawandunbalin lisü dan le ubouagubei. Sun katei wuribati le gayaraabei lasuseredun lun 423 áraabu le, genegeguati luma le tariñagubei Bíbülia: gudáü luma burí fuludu, larürüdagun yelu, fulasu burí le abuluchubei baranaha luma burí lanarime lárouga” (“Flooding Chaos in Yellowstone, a Sign of Crises to Come” [Fuludu le lídanbei áraabu Yellowstone, eweridihani luagu lénrengunga le anitebei], The New York Times, 15 lidan sisi-hati, irumu 2022).

Gáraniti san turobuli lánina ligaburi dan le ubouagubei? Anhein ítara liña lubéi, ka láranibei? Ariha huméi kátima lan tarufudahabei Bíbülia.

Ayanuhatu Bíbülia lidan profesía luagu lagadeirun ligaburi dan

Aliihatiwa tidan Bíbülia lagünrinchagubaña lan Bungiu sun “ha agünrinchagubalin ubóu” (Arufudúni 11:18). Furendeitiwa ǘrüwa katei lídangiñe bérusu le:

1. 1. Hagadeirubei lan gürigia Ubóu le.

2. 2. Gárani lan le asuseredubei lun Ubóu le.

3. 3. Mámaba lan gürigia aranserei turobuli le, Búngiuba adügei.

Lesefuruba Ubóu

Chóurugüda tumuti Bíbülia woun laduraruba lan Ubóu lun súnwandan (Apurichihati 1:4). Súnwandan haganóuba lan gürigia lidan.

• “Galangantehabei gürigia buítiña múa, haganóuba giñe lidan súnwandan” (Sálumu 37:29).

Lárügüdaguba Ubóu lungua sunsuinagubei ani wéiribei lubuidun.

• “Gundaalá fulasu mageirawati, múa mábeiti; buinla lau ugundani, legeleweha” (Isaíasi 35:1).