Nidiheritiña gürigia ladüga kamani lan laduurawagun balu hawagun | Ka tariñagubei Bíbülia?

Lidan sedü-hati, irumu 2022, áfarawaguaaña saragu gürigia lidan sun ubóu lau laduurawagun balu hawagun:

• “Adügati lafarún polítiku létima subudiwabei Hapón [binadu gumadimati Shinzo Abe] lun taweiridun hanigi dandu lílana ageiraü le kei lílana sun ubóu, dántima le gabaroun hamani mibe lan áfarahani lidan ageiraü le, hanarime ligía lúrudu luáguti gama hamá gürigia áruma” (10 lidan sedü-hati, irumu 2022, The Japan Times).

• “Lidan ageiraü Dinamárüka, adügati aban wügüri lun habuinchun sun gürigia lau anufudei lau láfarun ǘrüwa gürigia tidan aban bísinisi uburugu Copenhague” (4 lidan sedü-hati, irumu 2022, Reuters).

• “Suru Áfürika: aba haduuragun fiu wügüriña balu tidan aban átaguagülei uburugu Soweto ani áfaratiña 15 gürigia” (10 lidan sedü-hati, irumu 2022, The Guardian).

• “Hilatiña hóugiñe 220 gürigia lárigiñe laduurawagun hawagun Meriga weyu samudi luma dimaasu le lánina fedu le adügǘbei 4 lidan sedü-hati” (5 lidan sedü-hati, irumu 2022, CBS News).

Anihein san resun lun wagurabahan lagumuchuba lan sun áfarahani le? Ka tariñagubei Bíbülia?

Lagumuchun áfarahani

Ariñagatu Bíbülia luagu wawinwanduña lan lidan “lagumuhóun dan”, aban dan le ídanbei hóusera gürigia lau anarimeni luma furundei (2 Timotéu 3:1, 3). Adügati áfarahani burí le lun habuinchun gürigia lau anufudei (Lúkasi 21:11). Lau sun lira, füramasetu Bíbülia lachülürüba lan dan lun lagumuchun sun áfarahani, ani hawinwanduba gürigia “lidan aban fulasu gálumati, tidan burí rumu chóurutu, tidan burí muna darangilatu” (Isaíasi 32:18). Ida lubati lagumuchúniwa lau áfarahani?

Lagumuchuba Bungiu hau wuribatiña luma tau sun áruma.

• “Ha salufuribaña hama ha múaranbaña, hahulúba, bugawa hagíame ubouagugiñe” (Ariñawagúni 2:22).

• “Gumuguagüdalá [Bungiu] wuribu chülǘ lumoun lagumuhóun larigeirugu ubóu; halagualá burí gimara, günringualá burí eféin, gudala burí karü to lánina wuribu” (Sálumu 46:9).

Larufudahaba Bungiu houn gürigia lun hawinwandun lidan darangilaü, ítara luba lagumuchun lau áfarahani.

• “Úabei adügüti wuribati luagu nuwübüri le sándubei, ladüga ítara kei labuinchagüdüni duna barana, ítara luba labuinchun sun fulasu lau lasubudirúniwa luéirigun Wabureme” (Isaíasi 11:9).

• Íbini guentó, arufudahati Bungiu houn gürigia lidan sun ubóu lun máfarahadi hamá, lun mayusurun hamá áruma luma lun hadaagun “awouhagülei tau hefeinte, adüga hagíame líbaaha sagadi lau arufun” (Mikeasi 4:3).

Anhein busén hubéi hasubudirun lanwoun füramasei le tídanbei Bíbülia luagu lachülürüba lan dan lun ua lan anufudei, aliiha huméi ariñahani le gíribei “¿Es posible librarse del miedo?”.

Lun hasigirun afurendeira luagu lárani turobuli lánina áfarahani, aliiha huméi ariñahani le gíribei “¡Por fin paz en la Tierra!”.