ÍDEMUEI HOUN MARÍEITIÑA HAMA AGÜBÜRIGU
Mígiraguagüda wamá woungua lun igañi
Aban ladügün wügüri maríeiti o würi maríeitu somu katei le adügübei lun hagañidun aban hádangiñe, ani aba hafamurun kamá hamuga úati mégeiti. Dan le líchugun wügüri marihinti fe o tíchugun würi maríeitu fe mabuidun lan léibugun katei, aba hagumeserun adüga saragu álügüdahani lun hasubudiruni ka lan mégeibei. Adügati katei le lúntima hagañidun. Ka lunbei hadügüni lun mígiraguagüdün hamá houngua lun igañi?
Le lunbei hasubudiruni
Wuribati lun átuadi lafalaragu gürigia lungua luma igañi. Ariñagati aturiahani le hadügübei sásaamu, dan le lan márügüdagun hamá gürigia houngua luéi igañi gayara lan ladagarun liñun hitaü hawagu, hasandirun tuéigiñe hanigi, ladagarun lanarime íruni hawagu o gaturobulin hama harageirugugiñe. Gayaraati giñe ladagarun marumuguni hawagu, saragu idiheri, sandi luagu hara luma esturókü. Ligía tariñagunbei Bíbülia: “Ígirabei igañi; magañidabá ladüga gádeirügü lumutitima agañiduni sun katei” (Sálumu 37:8).
Adügati giñe dañu lágüdahani gürigia igañi. Ítara liña lágüdahani gürigia igañi kamá aban sandi le adügübei dañu múnadagiñe libiti gürigia. Kei hénpulu, adügati lun hagumeserun gürigia ayanuha wuriba luagu furumiñeguarügü katei, adügati igaburi ítarati lun hénrengu lan hawinwandun gürigia huma ani ladügüba lun gaturobulin humá saragu lidan hibagari keisi maríeitiña.
Le lunbei hadügüni
Teni humá lun lubuidun igaburi le hawagubei húmarigu. Bürǘ huméi ǘrüwa igaburi le hínsiñebei hun hawagu. Danme le hagañidun hamá luagu somu katei, samina humá luagu igaburi le habürüdübei. Líderagubadün katei le lun hárügüdagun hungua.
Adundehani tídangiñeti Bíbülia: “Geteingiradi humá giñe”. (Kolosana 3:15.
Ferudunagua humá húmagua. Furumiñe ariha huméi katei kei harihini gürigia ha úmabaña hamarieida. Líderagubadün le lun gunfurandagua humá húmagua o kei le aubei tariñaga Bíbülia lun gunfuranda humani le “hasandirubei” amu (1 Féduru 3:8, TNM). Lárigiñe álügüdagua humá hungua: “Le san lúgubu weiri lan le asuseredubei darí lun hénrengu lan nun níchugun ferudun.
Adundehani tídangiñeti Bíbülia: “lichugún mebereseni luagu anabawaguni inebeseibei”. (Ariñawagúni 19:11).
Ariñaga huméi lau ínsiñehabuni luma lau inebesei le hasandirubei. Rugua humá hungua lidoun yanu. Lubaragiñe hariñagun “Masaminarutibu nuagu, lunti hamuga baguwarun ariñaga haliañadibu lan” Ariñaga humá “Nidiheritina buagu dan le lárügüdünibu lidarün, lugundun ibidiñeti nun anhein susere lubéi somu katei bun”. Lau hayanuhan lau darangilaü adügati lun hárügüdagun hungua luéi agañiduni.
Adundehani tídangiñeti Bíbülia: “Lunti gúndaawa lan lau hiyanun súnwandan” (Kolosana 4:6).
Ru humá arigei. Lárigiñe hayanuhan ígira humá lun hóunabun gürigia ha úmabaña hamarieida ani madüraagua huméi hayanun. Danme le lagumuchun yanu águyuguagüda huméi le ariñawagúbei hun lun harihini anhein gufuranda hubalin buidu le ariñawagúbei. Láurügü híchugun arigei lun le ayanuhabei ídehati lun hárügüdagun hungua.
Adundehani tídangiñeti Bíbülia: “Kada aban hídangiñe lunti aranseñu lan lun laganbun, gama lumoun lunti hámaru lan lun ladimurehan” (Santiagu 1:19).