Gayaraati san tíderagunina Bíbülia anhein saminaadina lubéi náfaragun nungua ladüga mabusenrunhadina lan nawinwandun?

Óunabagülei le tíchugubei Bíbülia

Anha, gayaraati tíderagunün ladüga Lererun lan Bungiu le íchugubei gurasu houn ha maguraasunbaña (2 Korintuna 7:6). Íbini mama tan aban líburu to íchuguboun agaranihani lun ichügü, íderaguaaru saragu gürigia ha asaminarubaña háfaragun houngua. Gayaraati giñe líderagunün adundehani huuti le tídanbei.

• Ka burí adundehani huuti tíchugubei Lererun Bungiu woun?

• Ayanuhatu san Lererun Bungiu hawagu gürigia ha meha busenbaña hounwen?

• Ka burí bérusu tídangiñe Lererun Bungiu gayaraabei líderagunün?

• Ka gayaraabei wadügüni anhein ariñaga aban wamada woun mabusenrunhali lan lasigirun awinwanda?

• Ánheinti hóuchaadina lubéi náfaragun nungua?

Ka burí adundehani huuti tíchugubei Lererun Bungiu woun?

• ● Ayanuha humá luagu le hasandirubei.

  Ariñagatu Lererun Bungiu: “Aban umadaü, súnwandan buidu lan, ítara liña kei aban íbiri lidan lidaani idiheri” (Ariñawagúni 17:17).

  Le mini lubéi: Dan le gibe lan katei lun wachügü, mégeitiwa wíderawagun.

  Anhein mariñagun humá ida liña lan hasandiragun hungua, wuribatimabei hasandiragun hungua. Anhaün ariñaga houn amu ida liña lan hasandiragun hungua, alouguadeina luba hidiheri ani harihibei hiturobulin lidan amu igaburi.

  

  Houcha humá hadügüni le: Ayanuha humá uguñe uguñe luma somu gürigia, háfuga luma aban hiduhe o luma aban humada le uáguti hafiñera.a Lanwoun lira, gayaraati hafuranguagüdüni le hasandirubei lau habürüdüni.

• ● Áluaha huméi lídehan somu surusia.

  Ariñagatu Lererun Bungiu: “Ha magadiñebaña, memegeiruntiña surusia; ha sándibaña, hagía emegeirubaña surusia” (Matéu 9:12).

  Le mini lubéi: Dan le sandi wamá, mosu wáluahan surusia.

  Dan le lebelurun woun lun wáfaragun woungua, másiñati anihein lan somu lisandi ichügü wawagu o tidan wanigi. Ítara kei masandi wamá busiganu dan le sandi wamá, moun lumuti giñe wasandiragun woungua wuriba dan le anihein lan lisandi ichügü wawagu. Gayaraati lagaranihóun lun sandi le.

  Houcha humá hadügüni le: Moun lumuti hadarasahan, áluaha humá aban surusia le subudihabúti luagu lisandi ichügü.

• ● Haritagua huméi weiri lan hebegi lun Bungiu.

  Ariñagatu Lererun Bungiu: “Ma alugurúatiña seingü dunuru luagu bián gáwanaü? Lau sun lira, mabulieidunti Bungiu ni aban hádangiñe. [...] Manufudeda humá lubeiti, gebegitün sügǘ hau saragu dunuru” (Lúkasi 12:​6, 7).

  Le mini lubéi: Wéiriti hebegi lun Bungiu.

  Másiñati hasandiragun hungua hábuguarügüñadün lan, gama lumoun mítaranti. Subudi lumuti Bungiu sun le hásügürübei. Íbini sandí humá mabusenrunhadün lan hasigirun awinwanda, gebegimémegidün lun Bungiu. Ariñagati Sálumu 51:17 mamahan lan Bungiu “tun aban anigi gagarigutu”. Wéiriti hínsiñe lun Bungiu ani busenti lun hawinwandun.

  Houcha humá hadügüni le: Aliiha humóun Bíbülia áluaha humaamuga katei burí tidan le achoururagüdübalin hun hínsiñe humá lun Bungiu. Gayaraati hadarirun fiu lídangiñe lidan kapítulu 24 tidan líburu Acerquémonos a Jehová.

• ● Furíei humá lun Bungiu.

  Ariñagatu Lererun Bungiu: “Ígira huméi sun katei lun Bungiu, lugundun lóunigiruñadün le tímatimaati” (1 Féduru 5:7).

  Le mini lubéi: Busenti Bungiu lun habahüdaguni lun ka lan asuseredubei hun luma le adügübei lun háhüchürün.

  Gayaraati líchugun Bungiu darangilaü luma erei hun lun hasigirun hubaruaguóun (Filipuna 4:​6, 7, 13). Ítara liña líderaguniña Bungiu gürigia ha ayarafadubaña lun (Sálumu 55:22).

  

  Houcha humá hadügüni le: Furíei humá lun Bungiu uguñe. Yusu huméi liri, Heowá, ani ariñaga huméi le hasandirubei lun (Sálumu 83:18). Amuriaha humá luma lun líderagunün asigira hubaruaguóun.

• ● Ráramagua humá asaminara luagun emenigini le tíchugubei Lererun Bungiu lubá ámuñegü.

  Ariñagatu Lererun Bungiu: “Ágüdaha lumutu emenigini le wawani deregüdagu, keisi lágüdahanu óunguru ugunei” (Ebüréu 6:19).

  Le mini lubéi: Másiñati sandí humá ugundani ani sódini, aba ladagarun íruni huagu kamá hamuga aban ugunei huguya to lanaahaboun liñawan dan yágütoun yaroun. Lau sun lira, ítara liña emenigini le tídanbei Lererun Bungiu kei aban óunguru le gayaraabei líderagunün lun derebugumeme humá.

  Mama aban uénedü emenigini le lugundun gébunati luagu füramasei le ladügübei Bungiu luagu lagidarubei lan sun le adügübei lun wasufurirun (Arufudúni 21:4).

  Houcha humá hadügüni le: Sigí humá afurendeira luagu emenigini le tíchugubei Bíbülia lidan leksióun 5 tidan garüdia Uganu buiti lúmagiñeti Bungiu.

• ● Adüga humá somu katei le hínsiñeti hun.

  Ariñagatu Lererun Bungiu: “Árani buiti anigi gúndaatu” (Ariñawagúni 17:22).

  Le mini lubéi: Dan le wadügün katei burí le hínsiñeti woun, buiti wasandiragun woungua íbini lidan wasaminan.

  

  Houcha humá hadügüni le: Adüga humá aban katei le subudi humuti hínsiñe lan hun. Kéiburi haganbahan uremu lun buidu lan hasandiragun hungua, haliihan somu katei o háluahan hisebáhari. Ladügüba giñe híderaguniña amu, íbini mama lan lau aban katei le wéiriti, lun gunda humá (Hechos 20:35, Lerérun Búngiu to lánina Iséri Darádu).

• ● Góunigigua humá hungua luéi ladagarun sandi huagu.

  Ariñagatu Lererun Bungiu: Huuti “lánhingichun úgubu” (1 Timotéu 4:8).

  Le mini lubéi: Adüga humá ehersísiu, arumuga humá buidu ani hou humá éigini le buiti, anhein hadüga sun katei le, buídubei hasandiragun hungua.

  Houcha humá hadügüni le: Furí humá éibuga furese, íbinirügü luagu keinsi minutu.

• ● Haritagua huméi gayara lan lasansirun ligaburi hasandiragun hungua, kei lasansirun amu burí katei lidan hibagari.

  Ariñagatu Lererun Bungiu: “Ida liña san hasubusiruni kaba lan asusereda haruga?” (Santiagu 4:14).

  Le mini lubéi: Lau lásügürün dan, gayaraati lagumuchun turobuli burí le adiheridagüdübaliwa íbini samina wamá máranina lan.

  Íbini genege lan siñá lan laranserun somu lénrengunga le úmabei hagagibudagua uguñe, gayaraati lasansirun haruga. Ligíati, mábürühala harüna (2 Korintuna 4:8). Lau lásügürün dan, gayaraati laranserun turobuli burí le adügübei lun hadiheridun, ánheinti hagidaruni hibagari, siñabei lasansirun.

  Houcha humá hadügüni le: Aliiha humá burí abahüdaguni tidan Bíbülia hawagu gürigia ha asandiragubaña houngua lau saragu maguraasuni darí lun meha mabusenrun hamá hasigirun awinwanda. Ariha huméi ida liña lan meha lasansirun le gádanbaliña lidan aban igaburi le meha magurabun hamuti. Ariha wamá fiu hénpulu.

Ayanuhatu san Lererun Bungiu hawagu gürigia ha meha busenbaña hóunwegun?

Anha. Ayanuhatu Bíbülia hawagu fiu gürigia ha meha ariñagubaña busén hamá hóunwegun, ani magañidunti Bungiu hama, lubaragiñe lira, aba líderaguniña. Gayaraati ladügüni ligiaméme huagu.

Elíasi

• ● Katei meha san Elíasi? Íbini aban lan meha profeta ganigi ligía, anihein meha dan sandigua lan lungua lau saragu íruni. Ariñagati Santiagu 5:17: “Aban meha wügüri profeta Elíasi kei wagía”.

• ● Ka meha uagu busén lubéi lounwen? Aba meha lasandiragun Elíasi lungua lábuguarügüñein lan, sanditi anufudei ani sandiguati lungua kei aban gürigia le móuniti. Ligíati aba lubéi lafurieidun: “Nabureme! Gidabei nibagari” (1 Urúeigu 19:4).

• ● Ka íderagubalin? Aba ladaarunu Elíasi lanigi lun Bungiu ani aba lariñaguni lun ida liña lan lasandiragun lungua. Ida liña líderaguni Heowá? Arufuda lumuti lun Elíasi gabafu lan ani weiri lan lebegi lun. Aba lachoururagüdüni Bungiu lun Elíasi mégeiwa lan ani ruti aban gürigia lun lun líderaguni.

• ▸ Aliiha humá luagu Elíasi: 1 Urúeigu 19:2-18.

Hobu

• ● Katei meha san Hobu? Aba meha wügüri rísiti ligía, gíbetiña meha lisaanigu ani aban meha lubúein Bungiu le inarüniti ligía.

• ● Ka meha uagu busén lubéi lounwen? Aba lasuseredun saragu katei wuribati lun lidan libagari. Féridi lumuti sun lúmati, hilaguatiña sun lisaanigu sódini ani aba ladagarun aban luriban sandi luagu. Lanwoun lira, íridaha hamuti amu luagu lídangiñeti lan sun le asuseredubei lun. Ariñagati: “Siñá nun, mabusenrunhadina nasigirun abagarida” (Hobu 7:16).

• ● Ka íderagubalin? Furíeiti Hobu lun Heowá ani ayanuhati hama amu gürigia (Hobu 10:​1-3). Ibihati dǘgüdaguaü lúmagiñe Eliú, aban lumada le gudemehabubei lun, le íderagubalin arihei le gádanbalin lidan amu igaburi. Ani létima buídubei, ibiha lani Hobu ladundehan luma lídehan Heowá ani ánhati lun lau sun lugundan.

• ▸ Aliiha humá luagu Hobu: Hobu 1:1-3, 13-​22; 2:7; 3:1-13; 36:1-7; 38:1-3; 42:1, 2, 10-13.

Moisesi

• ● Katei meha san Moisesi? Ligía meha alidihabaliña binadu ísüraelina ani aban meha profeta úaraguati ligía.

• ● Ka meha uagu busén lubéi lounwen? Gíbeti meha lunti ladügüni Moisesi, hayanuhaña meha gürigia wuriba luagu ani buchá meha luagu. Ayumuraguati lun Bungiu: “Gidagubeibei nibagari” (1 Lúrudu 11:​11, 15).

• ● Ka íderagubalin? Ariñaga lumuti Moisesi lun Bungiu ida liña lan meha lasandiragun lungua. Íderagua lumuti Bungiu Moisesi lun ladarirun awalidaguni lídangiñe libe luadigimari.

• ▸ Aliiha humá luagu Moisesi: 1 Lúrudu 11:4-6, 10-17.