Hínsiñeti lun Heowá larufuduni houn lubúeingu hínsiñe hamá lun ani gunda lan hau. Bianñein wéiyaasu ladarirún tidan Bíbülia ariñaga lan Heowá lun Hesusu ligía lan Liraübei le hínsiñebei lun ani weiri lan lugundan lau (Mat. 3:17; 17:5). Hínsiñeti hamuga san hun lun lariñagun Heowá huagu gunda lan hau? Inarüni mayanuhan lan Heowá wama siélugiñe. Gama lumoun, ayanuhati wama tídangiñe Bíbülia to Lererun. Dan le waliihani dimurei hínsiñehabuti le meha lariñagubei Hesusu houn lani disipulugu, aba wasandiruni kamá hamuga Heowá ariñagubalin woun. Áyeiha lumuti meha Hesusu ligaburi Lúguchi buidu buidu. Ligíati, dan le waliihan luagu ariñaga lan Hesusu houn lani disipulugu ha úaraguabaña hínsiñe hamá lun íbini meha chará hamá, gayaraati wasaminarun lariñaguñein lan Heowá ligiaméme dimurei woun (Huan 15:9, 15). Ani anhein wásügürüña lubéi lídangiñe somu turobuli, masaminara wamá ladüga lan féridi wamaali lan lugundan Bungiu, ariha waméi kei aban chansi lun warufuduni hínsiñe lan woun lídangiñe sun tilulin-agei wanigi ani afiñe wamá luagu (Sant. 1:12). w24.03 páh. 28 pár. 10, 11

Anhein gasaanigu hubéi, íderagua humaña aransera óunabagülei le gayaraati híchuguni según harumudiri. Anihein burí dan lakutihóun libügürü katei hanarimeti kéiburi turobuli lidan habagari maríeitiña o luáguti laruman ibagari. Íbini ítara, ñeinbei aban o bián párafu le ídanbei gayara lan híchugun hisaanigu óunabagülei. Gayaraati giñe híderaguniña lun gunfuranda hamani ka lan uagu michugúnbei lubéi óunabagülei houn sagü hiñuruni háhabu. Anhein hafuranguagüda katei le houn hisaanigu, mírudunbaña danme le lichugún óunabagülei houn amu ani michugúnti houn (1 Tim. 6:18). Sun wagía, gayaraati waranserun óunabagülei buiti le íchuguti uéiriguni lun Heowá ani ru ligía gurasu houn wábirigu (Ari. 25:11). Lau sun ñeinbei lan dan gayara lan wíchugun óunabagülei luagu le wásügürübei, moun lumuti wayanuhan saragu wawougua (Ari. 27:2; 2 Ko. 10:18). Le lunbei wadügüni, wayanuhan luagu Heowá, tuagu Lererun luma hawagu lubúeingu (Aruf. 4:11). w23.04 páh. 24, 25 pár. 17, 18

Mégeitiwa ínsiñeni lun agagudúañu wamá luma lun wakipurun aban lubuidun saminaü (Mat. 22:37-39). Kei hénpulu, íderagua lumutiwa ínsiñeni le wasandirubei luagu Bungiu lun wasigirun apurichiha íbini laganagua lénrengunga (2 Tim. 1:7, 8). Kei hínsiñe habéi gürigia ha mámabaña gefentiña luagu Heowá woun, adüga wamuti sun wayaraati lun wasubudiragüdüni uganu buiti houn, íbini luéigiñe gágamuru o lau wabürühan gárada houn. Marihin wamutiña kei féridihaña. Lubaragiñe lira, agurabatiwa hasansiruni hagaburi luma lun hadügüni le buídubei (Ese. 18:27, 28). Hínsiñetiña giñe wábirigu woun ani arufuda wamuti lau wíchugun gurasu luma iderebugu wámagua (1 Tesa. 5:11). Kei súdaragu ha awuribuhabaña úara ani íderaguatiña hámagua, rútiwa dǘgüdaguaü wámagua. Maweiyasunbadiwa adüga wuribani houn wábirigu ni agiribudagüda wuribani luagu wuribani houn (1 Tesa. 5:13, 15). Ábanya igaburi lun warufuduni hínsiñe hamá wábirigu woun, lau warufudun inebesei houn ha anügübalin ubaraü lidan damuriguaü (1 Tesa. 5:12). w23.06 páh. 10 pár. 6; páh. 11 pár. 10, 11