Dimaasu 14 lidan nefu-hati
Áfaagua humá lun gunfuranda humani lítulen, limigifen, lilulin luma liñun katei (Efe. 3:18).
Dan le busén humá hagañeihan aban muna, busenbadün harihinu muna tuguya buidu buidu lun harihini ídatima tiña lan. Ligiaméme giñe lunbei wadügüni dan le waliihanu luma dan le waturiahanu Bíbülia. Anhoun waliiha lau lóufudagun, míbebei katei wafurendeirun, káteirügübei “létima ménrengubei tídangiñe” wafurendeira (Ebü. 5:12). Ítara kei mosu lan wasubudirun aban muna buidu buidu lubaragiñe wagañeihanu, mosu giñe waturiahanu Bíbülia buidu lun warihini ida liña lan sun lácharagun ariñahani le tídanbei luma ida liña lan gani lan lúmagua. Úati buídurügü lan láurügü hafiñerun, mosu giñe hasubudiruni ka lan uagu hafiñera luagu ítaga katei. Lun gunfuranda wamanu Lererun Bungiu buidu buidu, lunti waturiahani sun tácharagun luma inarüni huliliti le tídanbei. Ínchaha lumutiña meha apostolu Pábulu sun kristiánugu lun haturiahanu Lererun Bungiu lau ubebeni, gayara láamuga gunfuranda hamani títulen, timigifen, tilulin luma liñun inarüni le tídanbei, “lun ínsiñeniba lan lílagüle luma liderebugu” hafiñen (Éfe. 3:14-19). Lunti giñe wadügüni ligiaméme. w23.10 páh. 18 pár. 1-3
Leindi 15 lidan nefu-hati
Niduheñu, barǘ humaña profetagu ha meha adimurehabaña lidan liri Heowá keisi aban hénpulu lánina gurasu luagu asufuriruni (Sant. 5:10).
Ayanuhatu Bíbülia hawagu saragu gürigia ha meha arufudubaña gaguraasuni. Ka uagu maturiahan hubalin abahüdaguni burí ligía? Kéiburi abahüdaguni luáguti Dawidi. Lau sun meha nibureingili lan dan le lanuadirúnbei lun ligíaba lan urúei Ísüraeli, mosu meha lagurabahan luagu saragu irumu lubá larúeihan. Seriwiti meha Simeón tuma Ana lau úaraguni lun Heowá sun añaha lan agurabahei Mesíasi le füramasewaalibei (Luk. 2:25, 36-38). Danme le haturiahani sügǘ burí le, álügüdagua humá hungua: “Ka íderagubaliña gürigia ha lun gaguraasun hamá? Ka buiti hibihubei lau harufuduni lubuidun igaburi le? Ida luba náyeihaniña?”. Gayaraabei giñe hafurendeirun saragu hámagiñe ha meha arufudubaña maguraasun hamá (1 Sam. 13:8-14). Gayaraabei hálügüdagun hungua: “Ka meha san uagu maguraasun habéi? Ka katei wuribati lanügübei maguraasuni houn?”. w23.08 páh. 25 pár. 15
Luagu-biama 16 lidan nefu-hati
Wagía afiñeediwa, ani subudi wamuti luagu buguya lan Krístubei le Liráü Bungiu wínwanti (Huan 6:69).
Aban meha wügüri úaraguati apostolu Féduru. Mígirunti meha lun ñein lan somu katei adügüti lun lábürühan larüna sunsuinagubei. Kei hénpulu, arufuda lumuti meha úaragua lan dan le lariñagunbei Hesusu fiu dimurei houn lani disipulugu, le meha úabei gunfuranda hamani (Huan 6:68). Saragu hádangiñe, lubaragiñe hamuga meha hamuriahan luma Hesusu lun lafuranguagüdüni houn ka lan labusenrubei lariñagun o hagurabahan lan lun lafuranguagüdüni, ábarüga masigirun hamá afalarei Hesusu. Ánheinti Féduru, madügün lumuti lira. Aba lariñagun hagibugiñe súngubei Hesusurügüñein lan ariñaga dimurei “lánina ibagari magumuchaditi”. Lau sun meha subudi laali lan Hesusu lígirubei lan Féduru hama amu apostolugu lábugua, ariñagati lau ichouruni luagu lárügüdaguba lan Féduru lungua ani úaraguabei lan (Luk. 22:31, 32). Gunfuranda lumuti meha Hesusu “aranseñu liña lan sífiri, anhein úgubu, débiliti” (Mar. 14:38). Ligíati, íbini yeegua lan Féduru lau Hesusu, míchugun lumuti meha Hesusu apostolu le keisi féridihali. Lárigiñebei meha láguyugun Hesusu, aba larufudagun lungua lun Féduru, genegeti dan le lan lábuguarügüñein lubéi (Mar. 16:7; Luk. 24:34; 1 Ko. 15:5). Chóuruti íderagua lani katei le apostolu le lun liñuragun lídangiñe lanarime íruni le luágubei lárigiñe le ladügübei. w23.09 páh. 22 pár. 9, 10