Gunfuranda wamaña amu ítara kei ladügüni Heowá

1. Ida luba ítara hamá kristiánugu kei fiu tídibu wewe? (Ariha humóun giñe iyawaü).

“ANUHEIN tídibu wewe, máhalachaguntu íbini here lan láfuhan garabali”. Arufudati ariñawagúni le anuhein lan tídibu wewe derebugutu ani hénrenguti táhalachagun íbini here lan garabali ayudeiharügü lumutu. Lun wawanserun lidan wamadagua luma Heowá mosu aranseñu wamá lun wadügün asansiruni dan le hénrengu lan katei lidan wabagari, lun gayara lan wasigirun eseriwida lun Heowá lau ugundani. Ida? Lau wadügüni asansiruni le mégeiwabei dan le lasansirun le gádanbaliwa luma lau inebe lan le hasaminarubei luma le hanúadirubei amu woun.

2. Kaba burí igaburi íderaguawa lun aranseñu wamá lun wadügüni asansiruni le mégeiwabei ani kaba wariha lidan aturiahani le?

² Sun wagía ha eseriwidubaña lun Heowá busentiwa lun gunfurandatima wamaniña amu. Ani busentiwa giñe lun ǘnabugu wamá ani gudemehabu wagía. Lidan aturiahani le warihuba ka lan hadügübei fiu kristiánugu lun hagagibudagun luma burí saragu asansiruni lidan habagari. Warihibei giñe ida luba lan líderaguniwa lubuidun burí igaburi le. Furumiñe wakutihaali lani Heowá luma Hesusu hénpulu lugundun hagíatima gunfurandabaliña amu.

ARANSEÑU LIÑA HEOWÁ LUMA HESUSU LUN HADÜGÜNI ASANSIRUNI LE MEGEIWABEI

3. Ida liña wasubudiruni aranseñu liña lan Heowá lun ladügün asansiruni?

³ Ariñagatu Bíbülia aban lan óunwenbu “Dübü” Heowá ladüga derebuguti ani mahingichuti (2 Lur. 32:4, TNM). Gama lumoun, aranseñu liña lun ladügün asansiruni ladüga gunfuranda lumutiwa. Ida liña wasubudiruni? Ladüga eibu lan asansireina lan katei ubouagu, adügati giñe Wabungiute asansiruni lun lachoururuni lagunfulirun le labusenrubei ladügün. Kei adüga lubaliwa lenege guánarügü, adüga lumutiwa giñe lau iyaraani lun wéchudun luagu asansiruni. Rúhali Heowá adundehani tídangiñeti Bíbülia le furanguti woun le íderagubaliwa lun buidu lan le lunbei wanúadiruni meberesenga turobuli le úmabei wagagibudagua. Arufuda lumuti ligaburi lóuserun Heowá luma ladundehan aban lan Bungiu úaraguati ani aranseñu liña lan lun ladügüni asansiruni le megei wabéi.

4. Írida humá aban hénpulu le arufudubalin aban lan Bungiu le gunfuranda lumutiña amu Heowá (Fádirigu 5:7, 11).

⁴ Úaraguati lilurudun Heowá ani gunfurandawati. Madügüdarunti hawagu gürigia ani mamuriahanti lóugiñe le hayaraabei adüga. Ariha wama aban hénpulu luáguti lóuseruniña Heowá ísüraelina. Mamuriahanti lun híchuguni sun gürigia ligiaméme adagaragüdüni ni hámagiñe rísitiña ni hámagiñe gudemetiña. Lidan fiu kesi, ariñagati meha lidan Lúrudu gayara lan lichugún ámuñegueinarügü adagaragüdüni le unbei lánhara Heowá según le gádanbaliña gürigia (aliiha huméi Fádirigu 5:7, 11).

5. Írida huma aban hénpulu le ñein lubéi larufuda Heowá ǘnabuguni luma amu hénpulu le ñein lubéi larufuda gudemehabu.

⁵ Aban Bungiu le gunfuranda lumutiña amu Heowá ladüga ǘnabugu lan ani gudemehabu ligía. Kei hénpulu, arufudati ǘnabuguni dan le lagünrinchaguaaña lan salufuritiña ha awinwandubaña Sodoma. Ariñagati houn ánheligu lun hariñagun lun lubúein Bungiu le gíribei Lotu lun lanuraha luagu wübü. Gama lumoun, hanufudeti meha Lotu lun lidin ñeinhin. Ligíati layumuragunbei lun lichugún üma lun lun lidin Sóarü hau liduheñu lidoun aban liraüraü uburugu le yebe giñe lunbei lagünrinchaguni Bungiu. Gayaraati hamuga lafosuruni Heowá Lotu lun gaganbadi lan lun adundehani le líchugunbei lun, gama lumoun madügün lumuti Heowá lira. Ánhati Bungiu lun le lamuriahabei Lotu luma, íbini magünrinchawaguali lanme Sóarü (Agu. 19:18-22). Saragu sígulu lárigiñe, arufudati Heowá gudemehabu houn gürigia ha awinwandubaña Níniwe. Óunaha lumuti Heowá profeta Honasi lun lariñagun houn hagünrinchawaguba lan dandu hagía kei uburugu ligía ladüga wuribani le ñeinbei. Gama lumoun, dan le hasakürihanbei gürigia ha awinwandubaña Níniwe, aba larufudun Heowá gudemehabu houn ani aba giñe feruduna lániña (Hon. 3:1, 10; 4:10, 11).

6. Ka hénpulu arufudubalin gunfuranda lániña Hesusu amu gürigia ítara kei Heowá?

⁶ Gunfuranda lumutiña giñe Hesusu amu ítara kei Heowá ani arufuda lumuti lubuidun igaburi le lidan lani ministeriu dan le ya lubéi ubouagu. Lau sun ounahóua lan lun lapurichihan houn ‘ísüraelina ha féridihaña’, íderagua lumutu aban würi to mama ísüraelina. Ayumuraguatu lun Hesusu lun lareidaguágüdünu tisaani to gawaguboun “aban sífiri wuribati”. Aba tagudemedagun lun Hesusu ani aba lareidaguágüdünu tisaani würi tuguya (Mat. 15:21-28). Samina wamá luagu ábaya hénpulu. Fiu dan lárigiñe lagumeseruni Hesusu lani ministeriu, ariñagati: “Ha eyeedagutiña nau […], neyeedaguba giñe hau” (Mat. 10:33). Lau sun eyeedagua lan Féduru ǘrüwa wéiyaasu ibidiñe lan Hesusu lun machaga lumuti Hesusu Féduru. Subudi lumuti meha Hesusu asakürihaali lan Féduru ani aban lan wügüri úaraguati. Lárigiñe láguyugun Hesusu, aba larufudagun lungua lun Féduru, ani chóuruti aba lan lariñagun lun feruduna lani ani hínsiñe lan lun (Luk. 24:33, 34).

7. Kei lariñaguni Filipuna 4:5, ida liña wabusenrun lun hasubudiruniwa amu?

⁷ Ariha wamaali gunfuranda lániña Heowá luma Hesusu gürigia. Ligíati, anti wagía? Agurabati Heowá lun giñe gunfuranda wamaniña amu (aliiha huméi Filipuna 4:5). Gayaraati wálügüdagun woungua: “Subudiwatina san kei aban gürigia le gunfuranda lumutiña amu? Ani, gúndaatina san lau le habusenrubei amu hadügün ani anha nuguya lun? O subudiwatina kei aban gürigia le úabei gunfuranda lániña amu o máhatina lun le habusenrubei amu hadügün? Héchutina san lun nadügüdarun hawagu gürigia lun hadügüni katei kei le aubei nabusenra? O hínsiñeti nun naganbun amu saminaü ani ánhatina lun saminaü ligía dan le gayara lan?”. Dan le gunfuranda wamaniña amu ani aranseñu wagía lun wadügüni asansiruni le emegeirúbei warufuduñein wáyeihañein lan Heowá luma Hesusu. Ayanuha wamá luagu bián katei lidan wabagari le ñein lubéi súdini lan lun wadügüni asansiruni le emegeirúbei kéiburi: dan le lasansirun gádantiwa luma dan le múaran lan le hasaminarubei luma le hanúadirubei amu hadügün luma wasaminan.

ARANSEÑU WAMÁ LUN WADÜGÜN ASANSIRUNI DAN LE LASANSIRUN LE GÁDANBALIWA

8. Ka gayaraabei líderaguniwa lun wadügüni asansiruni le emegeirúbei dan le lasansirun le gádanbaliwa? (Ariha huméi giñe abürüdǘni).

⁸ Dan le lasansirun gádantiwa lunti aranseñu wamá lun wadügüni asansiruni le wemegeirubei. Dan le lasansirun le gádanbaliwa, gayaraati lanügün turobuli le magurabun wamuti lidan wabagari. Gayaraati ladagarun aban sandi wéiriti wawagu, turobuli lánina maseinsuni o lasansiragun katei lánina polítika. (Apur. 9:11, TNM; 1 Ko. 7:31). Íbini lasansirun wadasin tidan lóundarun Heowá gayaraabei aban lan óuchawaguni woun. Meberesenga kaba lan asusereda, gayaraati wéchudun luagu iseri asansiruni lidan wabagari anhein wasigira gádürü adundehani burí le: 1) wánharun lun asansiruni, 2) wetenirun lun le lubéi liabin, 3) wetenirun lun katei buiti le ásügürübei lidan wabagari lúmati 4) wadügün katei buiti hawagu amu.b Ariha waméi ida liña lan hasagarun fiu hádangiñe wábirigu saragu buiti lau hafalaruni gádürü adundehani le lidan habagari.

9. Ka hadügübei aban feru maríeitiña ha eseriwidubaña kei misionéru lun hagagibudagun lun lénrengunga le magurabun hamuti?

⁹ Wánharun lun asansiruni. Óunahouati Emanuele tuma Francesca eseriwida lidan amu ageiraü. Dan le hachülürünbei lidoun fulasu le ñeinba lubéi heseriwida, aba hagumeserun afurendeira amu iñeñein luma lun híchagun houngua lun hasubudiruniña íbirigu lidan iseri damuriguaü le ñein habéi. Gama lumoun, aba laburuchagun sandi COVID-19 ani siñá buga hóundaragun hama íbirigu. Lanwoun lira, aba tounwen túguchu Francesca sódini. Busentu meha Francesca tídangiñe sun tanigi lun hama tan tiduheñu, gama lumoun, ladüga sandi COVID-19 siñá taweiyasuhan. Ka íderagubarun lidan sügǘ hénrenguti le? Furumiñe, aba lafurieidun Emanuele tuma Francesca úara ani aba hamuriahan luma Heowá lun líchugun lichú aau houn lun hagagibudagun luma halamiserun sagü weyu madiheridúnga luagu haruga. Óunaba lumuti Heowá hafurieidun lau líchuguni le hemegeirubei houn lau tídehan lóundarun lidan dan le hemegeirunbalin. Kei hénpulu, ruti saragu gurasu houn le lariñagunbei aban íbiri lidan aban bidéu: “Éibutima furese lan wánharun lun iseri gádantiwa furesetimabei gunda wamá ani ménrenguntimabei woun wasagarun saragu buiti lídangiñe iseri katei le wásügürübei”.c Libiaman, ábatima habuiduragüdüni hapurichiha luéigiñe gágamuru ani aba hagumeserun iseri aturiahani tídangiñeti Bíbülia. Luma, lǘrüwan, ánhatiña lun dǘgüdaguaü luma ídemuei le híchugubei íbirigu houn ani teinki hamuti ínsiñeni le harufudubei houn. Anuhein aban íbiri hínsiñehabutu óunahatu aban bérusu tídangiñeti Bíbülia houn luéigiñe gágamuru sagü weyu luagu aban irumu. Ka wafurendeirubei lídangiñe sügǘ le? Ánhawa ánhara lun iseri asansiruni lidan wabagari, gúndaabadiwa luagu le gayaraabei wadügüni.

10. Ka tadügübei aban íbiri lun téchudun luagu asansiruni lidan tibagari?

¹⁰ Wetenirun lun le lunbei liabin luma lun wetenirun lun katei buiti le ásügürübei lidan wabagari. Christina aban íbiri rumanana to awinwanduboun Hapón, aba tírudun saragu dan le tíchugubei fe gumuha lan damuriguaü lidan iñeñein inglesi le ñein lubéi meha teseriwida. Lau sun lira, meredetu asaminara luagu le asuseredubei. Lubaragiñe lira, aba táguyun lidoun aban damuriguaü lidan haponési ani aba tapurichihan lau ubebeni lidan iñeñein ligía. Aba tamuriahan tuma aban meha tupaaná lidan wadagimanu lun tíderagunu abuiduragüdei tayanuhani iñeñein le lau tayusurunu Bíbülia tuma garüdia Winwan humá lau ugundani, ani aba tánharun paaná tuguya. Aba tafurendeirun Christina ayanuha haponési. Lanwoun lira, aba tabusenrun paaná meha to laganwoundun tafurendeirun tídangiñe Bíbülia. Ka wafurendeirubei? Ánhawa etenira lun le lunbei liabin ani teni wagía lun katei buiti le ásügürübei lidan wabagari, gayaraabei lanügün asansiruni sódiniti saragu abiniruni woun le magurabun wamuti.

11. Ka hadügübei aban feru maríeitiña lun hagagibudagun luma maseinsuni?

¹¹ Wadügün katei buiti hawagu amu gürigia. Aba heferidiruni aban feru maríeitiña ha awinwandubaña lidan aban fulasu le ñein lubéi máhawa lan lun apurichihani hawadigimari dan le ñein lubéi turobuli lánina seinsu lidan ageiraü. Ka hadügübei lun héchudun luagu iseri asansiruni le? Furumiñe, aba háfaagun lun mibe lan hamaati. Ani libiaman, lubaragiñe hetenirun lun haturobulin aba hetenirun lun híderagun amu lau hadireiruni liibe-agei dan le gayara habéi lun hapurichihan (Adü. 20:35). Ariñagati tani weiriei: “Kei le beresegu wabéi lidan wani ministeriu, madaanitiwa lun wasaminarun luagu waturobulin ani gadaanitimatiwa lun wadügüni lugundan Bungiu”. Ka wafurendeirubei? Anhein lan asansira le gádanbaliwa, gabaroun waméi súdinitima lan wasigirun íderaguaña amu lídantima apurichihani.

12. Ida luba gayara lan líderaguniwa lani Pábulu hénpulu lun aranseñu wamá lun furumiñeguarügü asansiruni lidan apurichihani?

¹² Súdiniti lun aranseñu wamá lun wadügün asansiruni lidan wani ministeriu. Ayanuhatiwa hama gürigia ha ámuñegueinarügüti hafiñen, hagaburi luma fulasu le ñéingiñe lubéi hayabin. Ka uagu lunti lubéi wetenirun lun hénpulu le líchugubei apostolu Pábulu? Ladüga, aranseñu liña lun ladügün asansiruni lidan lani ministeriu lúmati lun gunfuranda lániña amu. Óunaha lumuti Hesusu Pábulu “apurichiha houn ha mámabaña huríu” (Rom. 11:13). Ani lun lagunfulirun Pábulu lau dasi le, apurichihati houn huríu, houn güriegu, houn chu tau, houn ábunagutiña múa, houn gumadimatiña luma houn urúeigu. Lun lachülürün tidoun hanigi ámuñegueinarügü gürigia, ariñagati Pábulu: “Rúguaadina nungua keisi kada hawuyeri gürigia” (1 Ko. 9:19-23). Dan le lapurichiha houn gabaroun lumuti le hafiñerubei luma hechun. Ka wafurendeirubei? Buídutimabei lidin woun lidan apurichihani ánhawa asaminara ka lan ariñahani buídutimabei lun wíderaguni aban gürigia lúmati lun aranseñu wamá lun wadügüni asansiruni le emegeirúbei.

INEBE LAN LE HASAMINARUBEI AMU WOUN

13. Kaba denchaü uei wadireira anhein inebe lubéi le hasaminarubei amu woun? (1 Korintuna 8:9).

¹³ Anhein gunfuranda wabaliña amu ménrenguntimabei lun inebe lan le hasaminarubei amu gürigia woun. Kei hénpulu, añahein fiu íbirigu würiña hínsiñeti houn hafeindihani hagibu, gama lumoun, añahein amu mínsiñeti houn. Añahein fiu kristiánugu hínsiñeti houn hatun murusun, gama lumoun, añahein amu himei hamuti matun hamá. Sun kristiánugu busentiña buidu lan hátuadi, lau sun lira góunigi hamuti hátuadi lidan ámuñegueinarügü igaburi. Ánhawa afiñera le lan wasaminarubei ligíatima lan buídubei súnwandan ani houcha wagía wafosuruniña amu lun giñe hadügüni ligiaméme le wadügübei, gayaraabei wadügün lun hachugeragun luma lun ñein lan fánreinguaü lidan damuriguaü. Mabusenrúntiwa lun wadügün lun lasuseredun aban katei ítarati! (Aliiha huméi 1 Korintuna 8:9; 10:23, 24). Líderagubadiwa wafalaruni adundehani le tídanbei Bíbülia lun gunfuranda wamaniña amu luma lun ñein lan darangilaü waganagua. Ariha wamá bián hénpulu.

14. Ka adundehani tídangiñeti Bíbülia lunbei línchahaniwa lidan ligaburi wasansiragun luma ligaburi waranseragun woungua?

¹⁴ Daüguaü luma ligaburi waranseragun woungua. Lubaragiñe líchugun Heowá lúrudu woun libügürü ida luba lan wasansiragun, ruti adundehani le huuti woun lun wafalaruni. Lunti lanügün ligaburi wasansiragun uéiriguni lun Bungiu ani arufudaléime aranseñu waña lan lun wadügüni furumiñeguarügü asansiruni le mégeiwabei luma lun gürigia wamá ha arihibalin katei “keisi lubudubu” (1 Tim. 2:9, 10; 1 Fe. 3:3). Lau sun lira, mabusenrúntiwa lun tunrugün lan wadaüragun hetenira gürigia. Líderagubaña giñe adundehani le tídanbei Bíbülia wéiyaaña lidan afiñeni lun michu hamani halurudun luagu ligaburi sánsiguaü luma ligaburi arouraguni. Kei hénpulu, lidan aban damuriguaü añahein fiu nibureintiña mabuidunti ligaburi hasarúniwa ladügarügü ligía lan échunibei. Busentiña meha wéiyaaña lidan afiñeni híderaguniña nibureintiña ha. Gama lumoun, ida luba gayara lan hadügüni sin híchugun gumadi houn? Ariñagati óunigiruti sirkuitu houn lun hariñagun houn nibureintiña hagía: “Ánhabu íchiga fánreinti lidan damuriguaü ani aba hetenirun íbirigu lun ida liña lan barihín sügǘ lau le bariñagubei, afiñetibu san anihein lan somu turobuli lidan ligaburi basansiragun o ligaburi baranseragun bungua?”. Buídurügüti dimurei le lun laranseragun katei míchugunga hagía lúrudu houn.d

15. Ka lúrudu luma adundehani tídangiñeti Bíbülia lunbei wafalaruni dan le lunti lan wanúadiruni kaba lan árani wayusura lun wóunigiruni wátuadi? (Rómana 14:5).

¹⁵ Lounigirún átuadi. Kada kristiánu lunti lanúadiruni ida luba lan lóunigiruni látuadi (Gal. 6:5). Danme le hanúadirun lagaranihóun hun lunti gabaroun humani gumadi le tídanbei Bíbülia lun mayusurun humá hitaü luma lun hadisedun hawéi gariahatiña luma hawéi búyeigu (Adü. 15:20; Gal. 5:19, 20). Amu luéi katei le, kada gürigia lunbei lanúadiruni kaba lan árani layusura. Añahein fiu kristiánugu áluahatiña árani hámagiñe surusia, añaheinti amu himei hamuti árani le adügǘwarügüti. Íbini subudi wamani kaba lan árani wanúadira, lunti inebe lan haricha íbirigu woun luáguti árani le lunbei hayusuruni. Ligíati lunti lubéi waritaguni adundehani burí le: 1) Larúeihanrügüñein Bungiu gayara lagidaruni sandi sunsuinagubei (Isa. 33:24); 2) “lunti lachoururuni” kada kristiánu le buídutimabei lun (aliiha huméi Rómana 14:5); 3) maguseragüdüntiwa ni aban madügüntiwa giñe ni kata le gayaraabei ladügün lun hachugeragun (Rom. 14:13), luma 4) hínsiñeguatiña kristiánugu hámagua ani subudi hamuti súdinitima lan úarani lidan damuriguaü luéi le hasaminarubei (Rom. 14:15, 19, 20). Anhein gabaroun wamá sun adundehani le, buídubei wanaagun woungua hamá wábirigu ani wídehaba lun ñein lan darangilaü lidan damuriguaü.

16. Ida luba gayara lan harufudun wéiyaali lidan afiñeni gunfuranda hamaniña ha híbiri wéiyaaña lidan afiñeni? (Ariha humóun giñe iyawaü).

¹⁶ Lunti aranseñu hamá wéiyaaña lidan afiñeni lun híchugun aban buiti hénpulu lánina gunfuranda luma lun hadügün furumiñeguarügü asansiruni (1 Tim. 3:2, 3). Kei hénpulu, magurabunbei aban wéiyaali lidan afiñeni lun lánharuniwa súnwandan lun lisaminan ladügarügü ligíatima lan wéiyaalibei hawéi ha híbiri. Subudi lumuti gayara lan línchahani lani Heowá sífiri furumiñeguarügü wéiyaali lidan afiñeni lun lariñagun somu katei le lunbei lanügün buiti lidan le lunbei lanuadirún. Anhein madüraagun lubalin adundehani le tídanbei Bíbülia, hánharuba ha híbiri wéiyaaña lidan afiñeni ha gunfurandabaña lun le hanúadirubei hiibe-agei, íbini múaran hamá luma le anuadirúbei.

BUITI LE IBIHÚBEI DAN LE ARANSEÑU WAMÁ LUN WASANSIRUNI LIGABURI WASAMINAN

17. Ka abiniruni weresibirubei dan le aranseñu wamá lun wadügüni asansiruni le emegeirúbei?

¹⁷ Anhein aranseñu wabéi lun wadügüni asansiruni le mégeiwabei, weresibiruba saragu abiniruni. Kei hénpulu, buídubei wanaagun woungua hamá wábirigu ani ñeinbei darangilaü lidan damuriguaü. Gúndaatiwa giñe lau ámuñegueinarügü lan hagaburi luma hechun lumutuniña Heowá. Ani létima súdinibei lun gunda wamá ladüga wasubudiruni wáyeihañein lan Heowá Bungiu le gunfurandabaliña amu.