Ka uagu mosu lubéi inebe lan Heowá woun?

1, 2. Según Sálumu 25:14, ka lunbei wadügüni lun buidu lan wamadagua luma Heowá?

KA IGABURI lemegeirubei aban gürigia lun aban lan umadaü buiti? Másiñati hóunabun hínsiñeguatiña lan ani ídeha hamá umadagu ha buítiña hámagua. Chóuruti mabara lan anufudei lidan igaburi le mégeiwabei lun aban wamá umadaü buiti. Gama lumoun, ítara kei lariñaguni bérusu le lichügüdinabei aturiahani le, sun ha busenbaña lun gamadagua hamá luma Heowá, mosu inebe lan houn (aliiha huméi Sálumu 25:14).

² Meberesenga átirihali lan dan wau lidan inarüni, sun wagía mosu wasigirun arufuda inebesei lun Heowá. Ligíati, ka mini lubéi inebe lan Bungiu woun? Kaba íderaguawa lun gagaburi wamani lubuidun igaburi le? Ani ka gayaraabei wafurendeiruni lúmagiñe aban hábuti nadagimeintiña gíriti Abüdíasi, lúmagiñe Hoyadá fádiri le íñutimabei luma lúmagiñe urúei Hoasi luagu inebesei luagu Bungiu?

KA MINI LUBÉI INEBE LAN BUNGIU WOUN?

3. Ida liña lóunigiruniwa anufudei?

³ Arufudatiwa inebe lan Bungiu woun dan le hanufude wamá wadügün aban katei le mínsiñeti lun. Lau sun mabuidun lan laganbún dimurei anufudei, barüti buiti woun ladüga gayara lan ladügün lun duari wamá. Ariha wamá fiu hénpulu. Ladügüba anufudei lun mayarafadun wamá saragu lun laru aban gudungu luéi wéiguadun lidoun. Ladügüba anufudei luéi katei le gayaraabei ladügün damichi woun lun wadisedun luéi denchaü. Anhein weiri lubéi lubuidun wanaagun woungua luma aban gürigia ani mabusenrúntiwa weferidiruni wamadagua luma, madügünbadiwa ani mariñagunbadiwa somu katei le adügüti lun lasandiragun lungua wuriba.

4. Ka labusenrubei Satanási lun wasaminaruni luagu Heowá?

⁴ Busenti Satanási lun hanufudedun gürigia luéi Heowá. Busenti lun wafiñeruni le lariñagubei Elifási lun Hobu: aban lan Bungiu le afayeirubei wuribani luagu wuribani Heowá, weiri lan ligañi ani magundan lan wau (Hob. 4:18, 19). Le labusenrubei libihin, lun lararamuniwa anufudei luéi weseriwidun lun Heowá luma lun wígiruni. Lun méiguadun wamá tidoun sádara to, mosu wáfaagun lun waganwoundagüdüni inebesei le wasandirubei luagu Bungiu, ladüga aban lan igaburi buiti lira.

5. Ka mini lubéi inebe lan Bungiu woun?

⁵ Gürigia le inebebei Bungiu lun saragu ani hínsiñe ligía lun, mabusenrunti ladügün ni kata le gayaraabei lagadeiruni lumadagua luma. Hesusu, ligía ábanbei hénpulu buiti lani aban gürigia le adügübalin “lugundan Bungiu” (Ebü. 5:7). Mama meha anufudei lasandirubei Hesusu luagu Heowá (Isa. 11:2, 3). Hínsiñeti meha Lúguchi le siélubei lun tídangiñe sun lanigi ani busenti meha gaganbadi lan lun (Huan 14:21, 31). Wagía giñe sun, sanditiwa aban óunwenbu ínsiñeni luagu Heowá ani seriwitiwa lun tídangiñe sun wanigi ladüga aban lan Bungiu le hínsiñehabubei, chuti lau, buin liña lau irichaü ani gabafuti. Ani kei weiri lubéi wínsiñe lun, subudi wamuti gani lan ligaburi wóuserun luma le lasandirubei. Ánhawa maganbadi lun, líruduba, ánhawati gaganbadi lun, tagundaaruba lanigi (Sal. 78:41; Ari. 27:11).

KABA ÍDERAGUAWA LUN INEBE LAN BUNGIU WOUN?

6. Ka lunbei hadügüni lun hasandirun inebesei luagu Bungiu? (Sálumu 34:11).

⁶ Mama lau inebesei luagu Heowá wágurahoua; mosu wáfaagun lun gagaburi wamani (aliiha huméi Sálumu 34:11). Aban katei le lunbei líderaguniwa, waríaguni sun katei le adüga láalibei Bungiu. Lau waríaguni “katei le ladügübei”, ariha wamuti lichú lau, lubafu ani weiri lan wínsiñe lun, adügati katei le lúntima weiri lan ínsiñeni luma inebesei le wasandirubei luagu (Rom. 1:20). Ariñagatu aban íbiri gíritu Adrienne: “Dan le netenirun lun le adüga láalibei Heowá ani ariha numuti lichú lau, wéirigüda lumutu nanigi saragu ani chouru numuti subudi lani létima buídubei nun”. Lárigiñe tararamagun Adrienne asaminara luagu katei le, ariñagayatu: “Mabusenruntina nadügün ni kata le gayaraabei ladisedagüdünina luéi Heowá, le íchugubalin nibagari nun”. Gayaraati san hasagarun murusun dan dimaasu le lun hararamagun asaminara luagu somu katei lídangiñe le adüga láalibei Heowá? Líderagubadün katei le lúntima hasandirun inebesei luma ínsiñeni luagu (Sal. 111:2, 3).

7. Ida liña líderaguniwa furíei lun inebe lan Heowá woun?

⁷ Ábaya katei le gayaraabei líderaguniwa lun inebe lan Bungiu woun, wéchudun afurieida lun. Éibutima wayanuhan luma Wabungiute, inarünitimabei woun. Sagü wamuriahan erei luma lun wawandun aban óuchawaguni, saminatiwa luagu óunwenbu lubafu. Dan le wíchugun seremei lun ladüga líchuguni Liráü lun lounwen wawagu, haritaguagüda lumutiwa lueirin ínsiñeni le lasandirubei wawagu. Ani dan le wayumuragun lun lun ladundehaniwa dan burí le wagagibudagun luma turobuli, aba taweiridun wanigi lau lichú lau. Íderagua lumutiwa furíei burí le lúntima inebe lan Heowá woun luma lun wadisedun luéi furumiñeguarügü katei le gayaraabei ladüraaguni wamadagua luma.

8. Ka lunbei wadügüni lun inebeméme lan Heowá woun?

⁸ Lun inebeméme lan Heowá woun, mosu waturiahanu Bíbülia lun wafurendeirun dandu lídangiñe buiti hénpulu le tídanbei kei lídangiñe le wuribabei. Ariha wamá ǘrüwa lídangiñe sügǘ burí le. Furumiñe, wayanuha hawagu bián lubúeingu Heowá ha meha úaraguabaña: Abüdíasi, le meha arihibei tau luban urúei Aabü, luma Hoyadá, fádiri le íñutimabei. Lárigiñe, wakutihaba luagu libagari urúei Hoasi le meha lurúeite Hudá, le meha agumeserubei eseriwida lun Heowá lau úaraguni ani dan lárigiñe, aba ladisedun luéi ani wuribati lagumuchun.

GANIGI WAMÁ KEI ABÜDÍASI

9. Ka buiti libihubei Abüdíasi ladüga arufuda lan inebesei lun Bungiu? (1 Urúeigu 18:3, 12).

⁹ Furumiñetibei wéiyaasu tayanuhan Bíbülia luagu Abüdíasi,b ariñagatu: “Abüdíasiti ligía aban meha wügüri le arufuduti inebesei lun Wabureme” (aliiha huméi 1 Urúeigu 18:3, 12). Ka buiti libihubei Abüdíasi lídangiñe inebesei le lasandirubei luagu Heowá? Luéigiñe aban oubaü, adügati katei le lun aban lan wügüri le úaraguati ani le gafiñerúaditi luagu. Seremei lun igaburi le, aba líriduni urúei kei gumadan palasiurugu (ariha huméi giñe Neemíasi 7:2). Ani luéigiñe le aban oubaü, íderagua lumuti lun ganigi lan, aban meha lídangiñe igaburi le lemegeirubei. Ka uagu? Ladüga wínwanti lidan lidaani larúeihan Aabü, aban urúei le meha “mabuidunti lóuserun ligibugiñe Bungiu, wuribatimati sügǘ hau urúeigu ha lubaabaña” (1 Uru. 16:30). Lanwoun lira, maríeiti Aabü tuma Hesawéli, to mehaáhuduraguboun lun Baali ani iyereeguti meha Heowá tun saragu, darí lun busén tan meha tagumuchun lau áhuduraguni inarüniti le Ísüraelibei, arúeihani le lani nórute. Áfaragua tumutiña giñe saragu hádangiñe lani Bungiu inarüniti profetagu hilagubei (1 Uru. 18:4). Wéiriti meha hénrengu lan leseriwidúniwa lun Heowá lidan dan ligía!

10. Ida liña larufudun Abüdíasi aban lanarime ganigi?

¹⁰ Ida liña larufudun Abüdíasi aban lanarime ganigi? Dan le tagumeserunbei Hesawéli éibaahaña lani Heowá profetagu lun táfaraguniña hilagubei, aba laramudun Abüdíasi 100 hádangiñe “lidan lagadábugiñe dübü”, ruléi “éigini le hemegeirubei houn” (1 Uru. 18:13, 14). Lun hamuga meha ru tan Hesawéli fe, táfaruñein hamuga wügüri ganigiti le hilagubei. Ani kei furumiñeguarügü gürigia, chóuruti mabusenrun lan meha Abüdíasi lounwen. Gama lumoun, wéiritimati meha ínsiñeni le lasandirubei luagu Heowá luma hawagu lubúeingu sügǘ lau ínsiñeni le lasandirubei luagu libagari guánarügü.

11. Ida liña háyeihani saragu lubúeingu Heowá lani Abüdíasi hénpulu? (Ariha humóun giñe iyawaü).

¹¹ Uguñe weyu, wínwantiña saragu lubúeingu Heowá lidan fulasu le ñein lubéi máhawa lan lun wapurichihan. Ani lau sun inebe hamá gumadimatiña houn íbirigu hínsiñewatiña ha, ítara kei meha Abüdíasi, mígirun hamuti háhuduragun lun Heowá ladüga lúnrügüñein yu lan (Mat. 22:21). Arufudatiña inebe lan Heowá houn lau gaganbadi hamá lun lubaragiñe gaganbadi hamá houn wügüriña (Adü. 5:29). Ligía añahagua lubéi apurichihei uganu buiti luma adamuridagua lau duari (Mat. 10:16, 28). Lanwoun lira, áfaaguatiña lun híchuguni ariñahani tídangiñeti Bíbülia le hemegeirubei íbirigu houn. Ariha waméi likesin Henri, le awinwandubei lidan aban ageiraü Áfürika le ñein lubéi meha máhawa lan lun lapurichihóun uganu buiti. Lidan meha dan ligía, aranseñu liña meha Henri lun lidin íchaaha agumeiraguagüdüni tídangiñetu Bíbülia houn íbirigu. Abürühati: “Le linarün katei, aban wügüri maniti au. Ligíati, chouru numuti le lan íderagubalina lun ganigi nan, lueirin inebesei le nasandirubei luagu Heowá”. Gayaraati ganigi humá ítara kei Henri anhaün afurendeira lun inebe lan Bungiu hun.

ÚARAGUA WAMÁ ÍTARA KEI HOYADÁ, FÁDIRI LE ÍÑUTIMABEI

12. Ida liña larufuduni Hoyadá tuma lani weiriou úaragua hamá lun Heowá?

¹² Inebehabuti meha Hoyadá, fádiri le íñutimabei, lun Heowá ani adügati lira lun úaragua lan lun luma lun lawanseragüdüni áhuduraguni le inarüniti. Dan le tárügüdünbalin Atalía, to tiráü Hesawéli, ubafu luagu arúeihani Hudá lau éregu, arufuda lumuti Hoyadá lueirin inebesei le lasandirubei luagu Bungiu. Aban meha würi hanufudewati tuéi Atalía. Furundetu meha, busén tumuti meha sun ubafu tungua ani lun gayara lan tarúeihan, áfaaguatu lun tagumuchun hau sun ladügawagun urúei, íbini tibañan lan! (2 Kro. 22:10, 11). Seremei tun Hosewa, to lani Hoyadá weiriou, aba lesefurun aban hádangiñe lirahüñü urúei, irahü le gíribei Hoasi. Tuguya luma tani weiriei, aramuda hamuti irahü ligía ani góunigi haméi. Ítara liña lounigirún aban hádangiñe hadügawagun urúeigu ha hádangiñebaña liduheñu Dawidi. Úaraguati meha Hoyadá lun Heowá ani madügünti anufudei tuéi Atalía lun lerederun madügünga ni kata (Ari. 29:25).

13. Ida liña larufuduniya Hoyadá úaragua lan lun Heowá?

¹³ Dan meha sedü lubéi irumu lau Hoasi, ábaya larufuduni Hoyadá úaragua lan lun Heowá. Aba ladügün aban aransehani buiti. Anhein meha asalira sun katei buidu, Hoasiba meha, aban hádangiñe ladügawagun Dawidi, árügüdei ubafu keisi urúei, anhein méhati wuriba lasalirun katei, gayaraabei meha lafarún Hoyadá hilagubei. Seremei lun labinihan Heowá, buiti lasalirun sun aransehani ligía. Lau hídehan sun hábutigu iduheñu ísüraelina, aba meha líriduni Hoyadá Hoasi urúeime ani ruti Hoyadá gumadi lun tafarún Atalía hilagubei (2 Kro. 23:1-5, 11, 12, 15; 24:1). “Lárigiñe aba ladügün Hoyadá aban daradu luma Bungiu, lílana fulasu lau sun harúeite, luagu hagíaba lan lánigu Bungiu” (2 Uru. 11:17). “Ruti giñe óunigirutiña bena tubenari litenpulun Wabureme, lun ua lan ni aban wíyeti según igaburi ebeluruti ñeinhin” (2 Kro. 23:19).

14. Ka katei buiti leresibirubei Hoyadá ladüga líchugun uéiriguni lun Heowá?

¹⁴ Ariñagati meha Heowá: “Níchuguba uéiriguni houn ha íchugutiña uéiriguni nun”, ani ítara liña lasuseredun lidan likesin Hoyadá (1 Sam. 2:30). Kei hénpulu, adügati Heowá lun labürüdǘn tidan Lererun lubuidun katei le ladügübei fádiri le lun leseriwidun woun kei hénpulu (Rom. 15:4). Ani, dan le lóunwenbei Hoyadá, ibihati aban katei espechaliti: “aba hábununi luburuguterugu Dawidi, habadu urúeigu, lugundun buiti bugaha lóuserun hama Ísüraelina, luma Wabungiute labu tuma ténpulu” (2 Kro. 24:15, 16).

15. Ka larufudahabei le winwan láalibei Hoyadá woun? (Ariha humóun giñe iyawaü).

¹⁵ Íderagua lumutiwa abahüdaguni luáguti Hoyadá lúntima inebe lan Bungiu woun. Gayaraati háyeihani wéiyaaña lidan afiñeni Hoyadá lau hóunigiruniña lumutuniña Bungiu lau úaraguni (Adü. 20:28). Gayaraati hafurendeirun íbirigu ha derebuguhaña, anhein lan inebe Heowá houn ani úaragua hagía lun, gayaraabei lan layusuruniña lun lagunfuliruni le labusenrunbei ladügün; mabulieidagunti hawéi. Gayaraati giñe hetenirun nibureintiña lun ida liña lan meha lóuseruni Heowá Hoyadá lun gayara lan hóuseruniña íbirigu ha derebuguhaña lau inebesei, hátima barühaña saragu irumu eseriwida lun Heowá lau úaraguni (Ari. 16:31). Ani lagumuhóun, sun wagía gayaraati giñe wafurendeirun lídangiñe le hadügübei hábutigu iduheñu ísüraelina luma hámagiñe lewitagu: mosu wíderaguniña ha alidihabaliwa luma lun gaganbadi wamá houn (Ebü. 13:17).

MÍTARAN WAMÁ KEI URÚEI HOASI

16. Ida liña larufuduni urúei Hoasi débili lan lumadagua luma Bungiu?

¹⁶ Lúmagiñe meha nibureingili urúei Hoasi, áfaaguati lun lagundaaragüdüni Heowá seremei lun lubuidun hénpulu le líchugubei Hoyadá lun (2 Uru. 12:2). Ánheinti lárigiñebei lounwen Hoyadá, aba laganbuniña Hoasi ábutigu ha agarabaagubaña houngua luagun Bungiu. Lau ladügüni katei lira, dandu ligía kei lumutuniña Bungiu, “aba hadügün kultu tun liyawa Asera luma houn amu guáriuagu” (2 Kro. 24:4, 17, 18). Íbini gari lan katei le lun Heowá, “óunahati Wabungiute profetagu houn lun hagiribuduba lan lun”. Gama lumoun, “meberesegúntiña gürigia lau hererehan profetagu”. Madügüntiña meha gürigia ha gasu ni lau Sakaríasi le liráü Hoyadá, le meha profetabei ani fádiri, le meha giñe gaduheñuguabei luma Hoasi. Lanwoun lira, óunahati Hoasi áfarei Sakaríasi hilagubei, íbini meha lagübürigu lan Sakaríasi esefurubalin libagari dan meha le ñǘraügili. Ma lueirin meteingiradi lan Hoasi! (2 Kro. 22:11; 24:19-22).

17. Ida liña lafarún Hoasi hilagubei?

¹⁷ Aba meha minebenhali lan Bungiu lun Hoasi, ani fáyeiti luagu le ladügübei, ítara kei meha lariñaguni Heowá: “Ánhaña ha únbaña niyereeguda hanügǘba lun búlame” (1 Sam. 2:30). Fiu dan lárigiñe, aba hábürühan fiu súdaragu síriana hawagun lisudaranigu Hoasi ani gañei hamuti síriana wuribu lau sun meha gíbetima hamá hawéi, ánheinti Hoasi, bulesei hamuti buidu. “Dan le hóudinbei Síriana, [...] aba heledegun lani úfisigu kóntüra ligía lun hafayeiragüdüni luagu lounwen fádiri” Sakaríasi. Ani, kei meha wuriba lubéi ligaburi Hoasi, mabunúnti “lidan hamúaha urúeigu” (2 Kro. 24:23-25).

18. Según Heremíasi 17:7, 8, ka lunbei wadügüni lun mítaran wamá kei Hoasi?

¹⁸ Ka wafurendeirubei lídangiñe le ladügübei Hoasi? Ítara kei megei tan aban tídibu baruru tagüdahóun lau wewe lun méiguadun tan, ítara liña meha giñe megei lani urúei Hoasi lídehan aban máisturu, Hoyadá, fádiri le íñutimabei. Dan le lóunwenbei fádiri le, aba lagumeserun agarabaaguni lun áhuduraguni le inarüniti, ani aba lábürühan Hoasi lidoun. Arufudahati sügǘ le aban katei súdiniti woun: siñati inebebei lan Heowá woun ladügarügü adüga hamani wábirigu hama waduheñu ani íderagua hamawa lun wadügüni. Lun derebugu lan wafiñen, mosu waganwoundagüdüni ínsiñeni luma inebesei le wasandirubei luagu Heowá, lau waturiahanu Lererun, wararamagun asaminara luagu le waliihabei luma lau gabügürügua lan wafurieidun (aliiha huméi Heremíasi 17:7, 8; Kol. 2:6, 7).

19. Ka lagurabubei Heowá wámagiñe?

¹⁹ Mamuriahanti Heowá wama lun wadügün katei le siñá wamuti adüga. Le labusenrubei wámagiñe, dariwati lidan Apurichihati 12:13, le ñein lubéi lariñaga: “Ruba inebesei lun Bungiu, gúnfulibei lugumadin lugundun ligía lunbei hadügüni gürigia”. Ánhawa arufuda inebesei luagu Heowá, gayaraabei wagagibudagun luma furumiñeguarügü lénrengunga le úmati wadunragua ani gayaraabei úaragua wamá ítara kei meha Abüdíasi luma Hoyadá. Úabei adügüti lun weferidiruni wamadagua luma Heowá.