Wéiyaaña lidan afiñeni, áyeiha huméi Hedeón

1. Según 1 Féduru 5:2, ka lubuidun chansi ibiha hamaalibei wéiyaaña lidan afiñeni?

RU LAALI Heowá dasi houn wéiyaaña lidan afiñeni lun hóunigiruniña lánigu. Wéiriti lebegi lubuidun dasi le houn lánina heseriwidun houn hábirigu ani áfaaguatiña lun aban hamá hóuniri lubúeingu Heowá ha buítiña (Her. 23:4; aliiha huméi 1 Féduru 5:2). Ma lubuidun añahein lan íbirigu ha benefatiña ítara lidan damuriguaü!

2. Ka burí lénrengunga úmabei hagagibudagua fiu wéiyaaña lidan afiñeni?

² Dan burí le hetenirun wéiyaaña lidan afiñeni lun hani buligasion, gagibuguatiña luma saragu lénrengunga. Kei hénpulu, lun hóunigiruni damuriguaü mosu hawadigimaridun saragu. Samina wamá luagun le asuseredubei lun Tony, aban wéiyaali lidan afiñeni le awinwandubei Meriga. Aba meha líchugun fe mosu lan gabaroun lani lébeha le liyaraabei adüga dan le lichugún somu dasi lun. Ariñagati: “Dan lagumeserunbei sandi COVID-19, anihein meha saragu wadagimanu le lunti ladügǘniwa lidan adamuridaguni luma lidan apurichihani, ani mariñaguntina meha uá lun ni kata. Lau sun lira, íbini meha áfaagua nan saragu, súnwandan meha anihein lan saragu katei lunti ladügǘniwa. Lau lásügürün dan, aba metenihadina lan lun naliihanu Bíbülia, lun naturiahan nábuguarügü ni lun nafurieidun”. Gagibuguati Ilir, aban wéiyaali lidan afiñeni le awinwandubei Kosovo, luma amu sügǘ. Lidan meha aban fulasu le ñein lubéi saragu wuribu lawinwanda ani hénrenguti meha lun lun lafalaruni tadundehan lóundarun Heowá. Ariñagati: “Dan lariñawagúnbei nun tídangiñe sukursáli lun níderaguniña íbirigu ha awinwandubaña lidan aban fulasu denchati, aba nanufudedun. Hénrenguti meha nun lun ganigi nan, ani lanwoun lira genegeti meha nun mabuidun lan adundehani le ichugúbei”. Hénrenguti meha lun aban misionéru gíriti Tim, le awinwandubei Asia, lun letenirun lun kada katei le lunbei ladügüni sagü weyu. Ariñagati: “Anihein meha dan weiri lan lubucha nuagu darí lun hénrengu lan meha nun lun netenirun houn íbirigu”. Ka gayaraabei hadügüni wéiyaaña lidan afiñeni lun gayaraabei lan hagagibudagun luma sügǘ libe le?

3. Ka uagu buidu lubéi lun wáyeihani Hedeón súngubei wagía?

³ Gayaraati hafurendeirun wéiyaaña lidan afiñeni lídangiñe lani Hedeón hénpulu (Ebü. 6:12; 11:32). Góunigi lumutiña meha Hedeón lumutuniña Bungiu ani adundehalaña (Ali. 2:16; 1 Kro. 17:6). Ítara kei Hedeón, mosu giñe hóunigiruniña wéiyaaña lidan afiñeni ha uguñebaña weyu lubúeingu Bungiu lidan dan hénrenguti le (Adü. 20:28; 2 Tim. 3:1). Ligíati, gayaraabei lubéi hafurendeirun saragu lúmagiñe Hedeón ánhaña etenira lun ligaburi larufudun awanduni, ǘnabuguni, gaganbadi luma, gabaroun lani lébeha le liyaraabei adüga. Lídehaba giñe hénpulu le líchugubei Hedeón lun hafurendeirun ha híbiri lílana damuriguaü arufudei gebegi lan hawadigimari wéiyaaña houn luma lun híchuguni hídehan houn tídangiñe sun hanigi (Ebü. 13:17).

DAN LE HÉNRENGU LAN WOUN GABAROUN WAMANI LÉBEHA LE WAYARAABEI ADÜGA LUMA LUN ǗNABUGU WAMÁ

4. Ida liña larufuduni Hedeón ǘnabugu lan ani gabaroun lani lébeha le liyaraabei adüga?

⁴ Ǘnabuguti meha Hedeón subudiléi lébeha le liyaraabei adüga. Dan le lariñagunbei aban ánheli lun Hedeón anúadira laali lan Heowá lun lesefuruniña ísüraelina lábugiñegiñe habafu madianna, óunabati Hedeón lau ǘnabuguni: “Hádangiñetinaga iduheñu ha gudemetimabaña hadan lani Manasési türibu, ani áutima ñǘraütimabei hádangiñe lirahüñü núguchi” (Ali. 6:15). Saminati yebe siñabei lan lagunfulirun lau wadagimanu le. Lau sun lira, subudi lumuti meha Heowá gayaraabei lan ladügüni ani lau lídehan, gúnfuliti Hedeón lau lidasin.b

5. Ka burí sügǘ ídanbei gayara lan hénrengu lan houn wéiyaaña lidan afiñeni hasubudiruni lébeha le hayaraabei adüga luma lun harufudun ǘnabuguni?

⁵ Áfaaguatiña wéiyaaña lidan afiñeni súnwandan lun hasubudiruni lébeha le hayaraabei adüga luma lun harufudun ǘnabuguni (Mik. 6:8; Adü. 20:18, 19). Mapantahantiña luagu le hayaraabei adüga ni luagu le ibiha hamaalibei. Masaminaruntiña giñe mebegi hamá lun ni kata, dan le hachararun o dan le masali lan le hadügübei buidu. Lau sun lira, anihein burí sügǘ le ídanbei gayara lan hénrengu lan houn lun gabaroun hamani lébeha le hayaraabei adüga luma lun harufudun ǘnabuguni. Ayanuha wamá luagu bián sügǘ. Másiñati lánharun aban wéiyaali lidan afiñeni lun saragu dasi ani lárigiñe, siñá lumuti súngubei agunfulira. Háfuga layanuhóun wuriba luagu ligaburi ladügün ítaga katei o ariñawagúa lan lun buidu lan ladügün somu katei. Lidan kesi kei burí le, ka gayaraabei hafurendeirun wéiyaaña lidan afiñeni lúmagiñe Hedeón?

6. Ítara kei Hedeón, ida luba harufuduni wéiyaaña lidan afiñeni gunfuranda hamani gébeha lan le hayaraabei adüga? (Ariha humóun giñe iyawaü).

⁶ Amuriaha humá ídemuei. Gürigia le ǘnabuguti subudi lumuti lébeha le liyaraabei adüga. Kei meha gunfuranda lubalin Hedeón gébeha lan le liyaraabei adüga, amuriahati ídemuei (Ali. 6:27, 35; 7:24). Ligía giñe hadügübei wéiyaaña ha arufudubaña lichú aau. Ariñagati Tony, le uágubei layanuhóua lidan párafu 2: “Adügati ligaburi nagüriarún, lun nánharun lun lóugiñe wadagimanu le niyaraabei adüga. Ligía nayanuhanbei lidan wáhuduragun keisi iduheñu luagu gunfuranda lani gürigia lébeha le liyaraabei adüga ani amuriahatina tuma nani weiriou lun tariñaguni nun ka lan tisaminanbei. Ariha numuti giñe aban bidéu le gíribei Arufudaha wamá houn amu ani afiñe wamá hawagu, kei meha ladügüni Hesusu le lídanbei jw.org”. Gumeseti Tony amuriaha ídemuei hama amu ani ariñaga lumuti woun ida liña lidin lun: “Buíduhali léibugun sun katei lidan damuriguaü, ani gadaanitimahadina lun nederebudagüdüni numadagua luma Heowá”.

7. Ida luba háyeihani wéiyaaña lidan afiñeni Hedeón dan le layanuhóun wuriba luagu le hadügübei? (Santiagu 3:13).

⁷ Kipu huméi hidarangilan danme le layanuhóun wuriba luagu le hadügübei. Adügati layanuhóun wuriba luagu le ladügübei aban wéiyaali lidan afiñeni lun larihíniwa ídatima liña lan ligaburi. Lidan kesi le, gayaraati giñe hafurendeirun lúmagiñe Hedeón. Gabaroun lumuti meha Hedeón gayara lan lachararun, danti le hayanuhanbei fiu wügüriña éfürainna wuriba luagu, kipu lumuti lidarangilan (Ali. 8:1-3). Lubaragiñe lagañidun, arufudati ǘnabuguni ani aganba lumutiña, lauti layanuhan houn lau areini adügati lun lásügürün hagañi. Ítara haña wéiyaaña lidan afiñeni ha chúbaña aau kei meha Hedeón. Dan le layanuhóun wuriba luagu le hadügübei, rútiña arigei lun le ariñawagúbei houn ani óunabatiña lau darangilaü (aliiha huméi Santiagu 3:13). Lau hadügüni lira, ídehatiña lun ñein lan darangilaü lidan damuriguaü.   

8. Ida liña lunti lan hóunabun wéiyaaña lidan afiñeni dan le layanuhóun buidu hawagu? Ru humá aban hénpulu.

⁸ Ru huméi sun uéiriguni lun Heowá. Dan le layanuhóunbei buidu luagu Hedeón ladüga lagañeiruniña madianna, aba líchuguni uéiriguni lun Heowá (Ali. 8:22, 23). Ida luba háyeihani wéiyaaña lidan afiñeni Hedeón? Lau híchuguni uéiriguni lun Heowá dan le habihin somu katei (1 Ko. 4:6, 7). Kei burí dan le lariñawagún lun aban wéiyaali lidan afiñeni buidu lan ligaburi larufudahan, gayaraati lóunabun lau lariñagun houn tídangiñeti lan Lererun Bungiu le larufudahabei ani súngubei lan wagía furendeitiwa saragu lídangiñe le tarufudahabei lóundarun Heowá. Buídubei lun hálügüdagun wéiyaaña lidan afiñeni houngua, kada átiri dan, anhein ru lubéi ligaburi harufudahan uéiriguni lun Heowá o uéiriguni hóuniwagua. Samina wamá luagu le asuseredubei lun aban íbiri gíriti Timothy. Hínsiñeti meha lun líchaahan yanu hounti sun gürigia lárigiñebei liridún keisi wéiyaali lidan afiñeni. Ariñagati: “Héchutina meha aransera ebelaagülei luma burí hénpulu le migifeti ani le hénrenguti, ligíati súnwandan lubéi meha hariñagun íbirigu nun garufudahadi nan. Híruti, núntima lan meha hetenira lubaragiñe hamuga hetenirun lun Heowá o tun Lererun”. Lau lásügürün dan, aba líchugun Timothy fe mosu lan lasansiruni ligaburi larufudahan lun mámatima lan lun hetenira gürigia (Ari. 27:21). Ida liña lidin lun? Ligía guánarügü ariñagubei: “Guentó, añahein íbirigu ha abahüdagubalin nun íderagua laaña lan yanu le níchugubei agagibudagua luma somu turobuli, awanda somu lénrengunga o lun yarafa lan hasandiragun houngua lun Heowá. Gúndaatimatina lau lariñawagún katei burí lira nun sügǘ lau dan meha le layanuhóunbei buidu luagu ligaburi narufudahan saragu irumu lubaragiñe le”.

DANME LE HÉNRENGU LAN WOUN WARUFUDUN GAGANBADI LUMA GANIGI

9. Ka meha sügǘ ídanbei hénrengu lubéi lun Hedeón gaganbadi lan lun Heowá luma lun larufudun ganigi? (Ariha huméi dibuhu le luágubei tidáü garüdia).

⁹ Lárigiñebei liridún Hedeón keisi alidihati Ísüraeli, mégeiti meha larufudun gaganbadi luma ganigi. Resibiti meha aban dasi hénrenguti: láguruni lani Baali latarü le meha lúmabei lúguchi (Ali. 6:25, 26). Dan lárigiñe, óundaraguagüdati Hedeón saragu súdaragu ani biámañein wéiyaasu lariñagun Heowá lun lun lagidarún hádangiñe (Ali. 7:2-7). Lagumuhóun, ariñagati Heowá houn lun hábürühan hawagun háganiñu amidi áriebu (Ali. 7:9-11).

10. Ka burí sügǘ ídanbei gayara lan hénrengu lan houn wéiyaaña lidan afiñeni gaganbadi hamá?

¹⁰ Mosu aranseñu hamá wéiyaaña lidan afiñeni lun gaganbadi hamá (Sant. 3:17). Dan le gaganbadi lan aban wéiyaali lidan afiñeni lun adundehani le tíchugubei Lererun Bungiu tuma lóundarun Heowá lau sun lugundan, ruti aban hénpulu buiti houn ha híbiri. Lau sun lira, másiñati ñeinbei lan dan hénrengu lan lun larufudun gaganbadi. Másiñati resibi lan saragu adundehani o furese lan lasansirun adundehani burí ligía, ani adügatiti le lun hénrengu lan lun lun lafalaruni súngubei. Anihein burí dan lálügüdagun lungua anhein buídubei lubéi o hu lan lafalaruni ítaga adundehani. O háfuga lamuriahóun luma lun ladügün aban katei le gayaraabei ladügün lun ladaürǘn. Ida luba háyeihani wéiyaaña lidan afiñeni laganbadi Hedeón lidan sügǘ kei burí le?

11. Ka gayaraabei líderaguniña wéiyaaña lidan afiñeni lun gaganbadi hamá?

¹¹ Ru humá arigei lun adundehani le heresibirubei ani falá huméi. Ariñaga lumuti Bungiu lun Hedeón ida luba lan lagünrinchaguni lani lúguchi latarü, halíaba lan ladüga aban iseri latarü lun Heowá ani kaba lan animaalu ladagaragüda lun. Masigenerun lumuti Hedeón adundehani le ichugúbei lun, adügarügü lumuti le ariñawagúbei lun. Uguñe weyu, resibitiña wéiyaaña lidan afiñeni adundehani túmagiñe lóundarun Heowá tidan burí gárada, awisahani o amu burí ariñahani lun híderaguniwa lun masuseredun lan ni kata wuribati woun luma lun yarafañu lan wakipuragun woungua lun Heowá. Hínsiñetiña wéiyaaña lidan afiñeni woun ladüga falá hamani adundehani le tíchugubei lóundarun Heowá lau úaraguni. Barüti haganbadi buiti houn sun lílana damuriguaü (Sal. 119:112).

12. Ida luba hafalaruni wéiyaaña lidan afiñeni le lariñagubei Ebüréu 13:17 dan le tariñagun lóundarun Heowá houn lun hadügün asansiruni lidan ligaburi hadügün ítaga katei?

¹² Másuha humá lun hadügün asansiruni. Haritagua waméi ariñaga lan Heowá lun Hedeón lun lóunahaniña hiibe-agei lisudaranigu hábiñoun (Ali. 7:8). Másiñati álügüdagua lan lungua: “Mosu san ladügǘn asansiruni le? Buídubei san lasalirun katei ítara?”. Lau sun lira, adüga lumuti Hedeón le ariñawagúbei lun. Ida liña háyeihani wéiyaaña lidan afiñeni Hedeón? Lau hafalaruni adundehani le tíchugubei lóundarun Heowá houn (aliiha huméi Ebüréu 13:17). Kéiburi dan le lariñagunbei Musu Úaraguati lidan irumu 2014, mosu lan ladügǘn asansiruni lidan ligaburi lamainirún tábunawagun Luban Adamuridaguni tuma burí Muna to luntu Adamurini Wéiriti (2 Ko. 8:12-14). Luagu meha aban dan, furedeiwarügüti meha seinsu houn lílana damuriguaü lun hábunaguagüdünu Luban Hadamuridagun. Lárigiñe, mosu meha hafayeiruni seinsu ligía. Ánheinti guentó, yusu tumuti lóundarun Heowá budagia le híchugubei lílana damuriguaü le lídanbei sun ubóu lun tábunawagun Luban burí Adamuridaguni tuma Muna luntu Adamurini le ñein lumuti mégeiwa tan, meberesenga anhein murusunrügüñein lubéi seinsu hayara lílana damuriguaü le ñeinbei íchiga. Beluti machouruni lun aban wéiyaali lidan afiñeni gíriti Hosé dan le líchugunbei fe luagu asansiruni le. Saminati: “Lídanba amu fulasu ubouagu lasusereda le, mama ya. Barihuba san, mábunawaqunboun lan ni aban Luban Adamuridaguni lidan ageiraü le”. Ka íderagubalin Hosé lun lánharun lun asansiruni le? Ariñagati: “Naritaguni ariñaga lan Ariñawagúni 3:5, 6 lunti lan nafiñerun luagu Heowá. Ani ma lubuidun le asuseredubei lárigiñe! Mama bunaguawarügütu saragu amu Luban Adamuridaguni, furendeihadiwa giñe íchiga lídangiñe wámati lun ñein lan úarani”.

13. a) Ka meha katei lachoururubei Hedeón? b) Ida luba háyeihani wéiyaaña lidan afiñeni lani Hedeón hénpulu? (Ariha huméi giñe dibuhu).

¹³ Adüga huméi lugundan Heowá lau ganigi. Adüga lumuti Hedeón le lariñagubei Heowá lun íbini dan le hanufude lan dencha ligía dasi le ichugúbei lun (Ali. 9:17). Lárigiñe lachoururagüdüni Heowá lun Hedeón líderagubei lan, aba lafiñerun Hedeón sunsuinagubei luagu líderagubei lan Bungiu óunigiraña lumutuniña. Ítara haña giñe wéiyaaña lidan afiñeni ha awinwandubaña lidan burí fulasu le ñein lubéi máhawa lan lun wapurichihan kei Hedeón. Arufudatiña ganigi lau haransehani ida luba lan ladügǘn burí adamuridaguni luma ida luba lan ladundehóun apurichihani lau sun gayaraabei lan hadaürǘn, hálügüdawagun, habugún lídangiñe hawadigimari o lagayuahóun hawagu.c Lídanme óunwenbu asufuriruni, mósume harufudun wéiyaaña lidan afiñeni ganigi lun hafalaruni adundehani le ichugúti houn meberesenga anhein híchugubei lubéi habagari lidoun denchaü. Kei burí, danme le weresibirun adundehani luáguti ida luba lan wapurichihan aban uganu lánina asiadirúni luma ida luba lan wesefurun danme le lábürühan Gogu le Magoguna wawagun (Ese. 38:18; Aruf. 16:21).

DANME LE HÉNRENGU LAN WOUN LUN WAWANDUN

14. Ka meha uagu hénrengu lubéi lun Hedeón lun lawandun?

¹⁴ Kei aban lubéi wügüri le alidihabei Ísüraeli Hedeón, mosu meha lawadigimaridun saragu. Lidan wuribu, aba hanurahan madianna áriebu ábati léibaahaniña Hedeón lúmagiñe fulasu wayati le gíribei Hesüreeli darí duna Hordán ani másiñati buin liña lan meha fulasu ligía lau hiiyu-agei (Ali. 7:22). Rárama lumuti san Hedeón léibaahaniña madianna dan le lachülürünbei lubadun Hordán? Uá! Lau sun meha buchá lan luagu Hedeón hau sun 300 lisudaranigu, hiñugua hamuti duna Hordán ani sigiti éibaahaña madianna hau sun lisudaranigu darí hárügüdüniña ani aba hagañeiruni wuribu (Ali. 8:4-12).

15. Ka katei gayaraabei ladügün lun hénrengu lan lun aban wéiyaali lidan afiñeni lun lawandun?

¹⁵ Anihein dan labuchadun luagu aban wéiyaali lidan afiñeni, lasandirun gibe lan katei lun lichügü luma lasandiragun lungua wuriba ladüga mosu lan lóunigiruniña liduheñu hama lílana damuriguaü. Ida luba háyeihani wéiyaaña lidan afiñeni Hedeón lidan kesi le?

16, 17. a) Ka íderagubalin Hedeón awanda? b) Ka gayaraabei hachoururuni wéiyaaña lidan afiñeni? (Isaíasi 40:28-31; ariha humóun giñe iyawaü).

¹⁶ Afiñe humá líchuguba lan Heowá erei hun. Ligía meha ladügübei Hedeón ani macharati Heowá lun (Ali. 6:14, 34). Aban weyu, aba léibaagun Hedeón hama luwügüriñanigu hárigi bián urúeigu madianna ha hawagubaña kameyu (Ali. 8:12, 21). Ábati líderaguniña Heowá ísüraelina lun hárügüdüniña ani aba hagañeiruni wuribu. Gayaraati giñe hafiñerun wéiyaaña lidan afiñeni ha uguñebaña weyu luagu Heowá, Bungiu le “mabuchadaditi luagu”. Líchugubei erei le hemegeirubei houn súnwandan (aliiha huméi Isaíasi 40:28-31).

¹⁷ Ariha waméi likesin Matthew, aban hádangiñe lílana Sétanu ha Ídehabaña lun Lagaranihóun houn Íbirigu Háspitalirugu. Ka íderagubalin awanda? Ariñagati: “Ariha naali nungua inarüni lan dimurei le lídanbei Filipuna 4:13. Sagü nasandirun buchá lan nuagu ani siñá lan nun, aba nayumuragun lun Heowá lun líchuguni erei le nemegeirubei nun lun níderaguniña íbirigu. Dan le lasuseredun le, sanditina ru lani Heowá erei le nemegeirubei nun lun líderagunina awanda”. Ítara kei meha Hedeón, adüga hamuti wéiyaaña lidan afiñeni sun hayaraati lun hóunigiruniña lánigu Bungiu lau ínsiñeni íbini dan le hagagibudagun luma lénrengunga. Lau sun lira, lunti gabaroun hamani siñabei lan hadügüni sun katei le habusenrunbei hadügün. Lóugiñe sun katei, gayaraati hafiñerun wéiyaaña lidan afiñeni laganbubei lan Heowá hayumuragun ani líchugubei lan erei le hemegeirubei houn lun hasigirun awanda (Sal. 116:1; Fili. 2:13).

18. Según le furendei wamaalibei, ida luba háyeihani wéiyaaña lidan afiñeni Hedeón?

¹⁸ Kei le aubei warihei, gayaraati háyeihani wéiyaaña lidan afiñeni Hedeón. Mosu ǘnabugu hamá, gabaroun hameime halía lan lébeda le hayaraabei adüga dan le lichugún amu burí buligasion houn luma dan le layanuhóun buidu o wuriba hawagu. Mosu giñe gaganbadi hamá ganigi hagíame lídantima dan le, le ídanbei yarafatimaahali lan lagumuchagüle ubóu le. Ani meberesenga le asusereduti, mosu hafiñerun luagu líchugubei lan Heowá erei le hemegeirubei houn lun hawandun. Chóuruti weiri lan hebegi luma hínsiñe wéiyaaña lidan afiñeni woun ladüga nadagimein hamá saragu (Fili. 2:29).