Aranseedün san lubá óunwenbu asufuriruni?

1. Ka uagu buidu lubéi lun aranseñu lan aban gürigia lubaragiñe furumiñeguarügü chagagua le lánina liñawan dan?

DAN LE aranse lan gürigia sefu lumuti libagari. Kei hénpulu, dan le ñein lan somu chagagua le lánina liñawan dan, gürigia le aranseñubei chóurutimati lesefurun ani íderagua láañame amu. Ítara kei tariñaguni aban óundaruni Yuropana to íderagubaliña gürigia: “Menefánti aban aransehani buiti”.

2. Ka uagu mosu lubéi aranseñu wamá lubá saragu asufuriruni? (Matéu 24:44).

² Sódiniba lagumeserun “saragu asufuriruni” (Mat. 24:21). Gama lumoun, hasubudirubei gürigia danme le lagumeserun lugundun mítaranbei kei burí amu liñawan dan le achülaagubei sódini. Ariñagati Hesusu kei burí 2,000 irumu guentó houn lánigu lunti lan aranseñu hamá lubá weyu ligía (aliiha huméi Matéu 24:44). Ánhawa afalarei adundehani le, ménrenguntimabei woun wásügürün lau ibagari lídangiñe dan hénrenguti le ani ménrengubei giñe woun wíderagun amu gürigia lun hásügürün lídangiñe saragu asufuriruni (Luk. 21:36).

3. Ka uagu mégeibadiwa lubéi awanduni, gudemehabu luma ínsiñeni lun waranserun lubá saragu asufuriruni?

³ Lun gayara lan waranserun lubá saragu asufuriruni mégeitiwa ǘrüwa igaburi. Kaba san wadüga danme le lamuriahóun wama lun wíchugun aban uganu lánina asiadirúni ani aba hagañidun amu gürigia wama? (Aruf. 16:21). Mégeibadiwa awanduni lun gaganbadi wamá lun Heowá luma lun wafiñerun luagu lóunigirubadiwa lan. Kaba wadüga anhein heferidira wábirigu lídangiñe hamegen o heferidiruni súngubei? (Abak. 3:17, 18). Mégeibadiwa lun warufudun gudemehabu houn luma lun wíderaguniña lidan le hemegeirubei. Kaba wadüga danme le lábürühan aban óundaruni hani néchanigu wawagu ani másiñati mosu lanme werederun hama wíbirigu lidan aban liraüraü rumu luagu fiu dan? (Ese. 38:10-12). Mégeibadiwa aban lanarime ínsiñeni hawagu wábirigu lun wawanduni lénrengunga le lunbei liabin.

4. Ida liña tarufuduni Bíbülia lunti lan wasigirun áfaagua lun wawandun, warufudun gudemehabu luma ínsiñeni?

⁴ Ínchaha tumutiwa Lererun Bungiu lúntima wawandun, lúntima warufudun gudemehabu luma ínsiñeni. Ariñagati Lúkasi 21:19: “Anhaün deregüdagumeme, hibihubei ibagari magumuchaditi”. Ariñawagúati tidan gárada houn Kolosana 3:12 abagarida humá lau harufudun “gudemehabu”. Ani ariñagatu giñe 1 Tesalónikana 4:9, 10: “Arufudahaali Bungiu guánarügü hun lun hínsiñegua humá húmawagua; [...]. Lau sun lira, niduheñu, ayumuraguatiwa hun lúntima laganwoundun hínsiñehabu”. Sun meha dimurei le hounti gürigia ha arufudubaña awanduni, gudemehabu luma ínsiñeni. Gama lumoun mosu meha hasigirun laumeme igaburi le. Ligiaméme giñe lunbei wadügüni. Kábati íderaguawa ibihei? Lidan aturiahani le warihibei ida liña lan hibihini furumiñetiña kristiánugu igaburi le lúmati ida luba lan wáyeihaniña, ítara luba aranseñu wamá lubá saragu asufuriruni.

ARUFUDA WAMÁ IGABURI LÁNINA AWANDUNI

5. Ka hadügübei furumiñetiña kristiánugu lun gayara lan hawandun?

⁵ Mégeitiña meha furumiñetiña kristiánugu hawandun (Ebü. 10:36). Amu luéi turobuli lánina ibagari mosu meha hagagibudagun luma amu turobuli ladüga hafiñen. Saragu hádangiñe éibaaha hamutiña huríu ha alidihatiña relihión hámati gumadimatiña rómana, ani rútiña meha giñe haduheñu lidere dan houn (Mat. 10:21). Anihein meha, dan mosu lan hagagibudagun luma arufudahani le harufudahabei ha agarabaagubaña houngua luagun Bungiu, ha meha álugubaña hafanreinraguagüdüni damuriguaü lau arufudahani le mama inarüniti (Adü. 20:29, 30). Íbini laganagua sun turobuli le, awandatiña meha kristiánugu hagía (Aruf. 2:3). Ida liña hadügüni? Lau hararamagun asaminara luagu awanduni le adarirúbei lidan Abürüdǘni Ebüréu, kei burí luagu lawandun Hobu (Sant. 5:10, 11). Lau hafurieidun lun Heowá amuriaha erei (Adü. 4:29-31). Lau gabaroun hamani líchuguba lan hafayeiruaha ánhaña asigira awanda (Adü. 5:41).

6. Ka gayaraabei wafurendeirun lídangiñe le tadügübei Merita lun tawanduni lidere dan le híchugubei tiduheñu tun?

⁶ Gayaraati giñe wawandun anhein hechun wabéi araramagua asaminara luagu hénpulu lánina awanduni le wadarirubei tidan Bíbülia luma tidan wani agumeiraguagüdüni. Ligía íderagubarun aban íbiri to awinwanduboun Albania to gíriboun Merita lun tasigirun tubaruaguóun íbini hadügüdarun tiduheñu tuagu lau furundei. Ariñagatu: “Dan le naturiahabalin abahüdaguni tidan Bíbülia luáguti libagari Hobu, chülüti tidoun nanigi. Súfuriti meha eyeri le saragu..., ani ibidiñeti meha lun ka lan adügübei lun lasuseredun sun turobuli le lun. Íbini ítara ariñagati lidan Hobu 27:5, ‘Sun winwan nan, narufudamémebei luagu madurun nan’. Adügati le lun nasaminarun ni kata lan le násügürübei lumoun le lásügürübei eyeri le, ánheinti nuguya subudi numuti ka lan lanagangiñebei sun le násügürübei”.

7. Íbini mama lan hásügürüña lídangiñe óuchawaguni hénrenguti reiti guentó, ka buídubei lun hafurendeiruni lúmagiñe guentó?

⁷ Ábanya katei le gayaraabei líderaguniwa lúntima wawandun lun wadaarunu wanigi lun Heowá gabügürügua (Fili. 4:6; 1 Tesa. 5:17). Gayaraati mama lan hásügürüña lídangiñe óuchawaguni hénrenguti reiti guentó. Ka hadügübei dan le gañi humá, ibidiñe lan hun kaba lan hadüga o buchá lan huagu? Amuriaha humuti san ladundehan Heowá? Anhein hechu hubéi afurieida lun Heowá lun gayara lan hagagibudagun luma turobuli weyu luagu weyu, hadügübei giñe ámuñegü danme le lawosuduntima katei. Hachoururubei subudi lan lun Heowá buidu buidu ídaba lan ani ida luba lan líderagunün (Sal. 27:1, 3).

8. Ida liña larufuduni awanduni le tarufudubei Mira ánhawa lan giñe awanda guentó gayaraabei lan giñe wawandun ámuñegü? (Santiagu 1:2-4; ariha humóun giñe iyawaü).

⁸ Gayaraabei wawanduni saragu asufuriruni ánhawa awandei óuchawaguni lúmagiñe guentó (Rom. 5:3). Ka uagu wariñagei le? Sanditiña saragu íbirigu sagü lan hawandun kada óuchawaguni derebugutimati lan hafiñen lun hawanduni le lunbei liabin. Dan le hawandun aban óuchawaguni lau lídehan Heowá, aba laganwoundun hafiñen luagu busén lan Heowá líderaguniña. Seremei afiñeni le, gayara lubéi hawanduni amu óuchawaguni le ñǘbuinbei (aliiha huméi Santiagu 1:2-4). Ítara liña tariñaguni aban prekursora to awinwanduboun Albania to gíriboun Mira. Ariñagatu íbiri to anihein lan dan genege lan gibe lan titurobulin sügǘ hawéi amu. Lidan burí dan ligía, aba tararamagun asaminara íderagua laaru lan Heowá lidan lagumuhóun 20 irumu ani aba tariñagun tuougua: “Úaraguaba. Mágurabei sun irumu le laubei Heowá íderaguabu lidan beseriwidun lun luma sun áfaaguni le gañei baalibei lau lídehan”. Gayaraati giñe hararamagun asaminara luagu sun le adüga laalibei Heowá huagu lun líderagunün awanda. Chouru huméi, sagü lan hawanduni aban óuchawaguni aríagu liña lan hun ani líchuguba lan hafayeiruaha luagu hawandun (Mat. 5:10-12). Ligíati danme le lagumeserun saragu asufuriruni, subudihalime hun ida luba lan hawandun ani aranseñu huba lun hadügüni.

ARUFUDA WAMÁ GUDEMEHABU

9. Ida liña larufudun lílana damuriguaü le Antiokíabei le lóubawagubei Siria gudemehabu?

⁹ Samina wamá guentó dan meha le hásügürübei kristiánugu ha Hudeabaña lídangiñe aban lanarime ümi. Dan le híchugubei íbirigu ha Antiokíasibaña fe luagu le asuseredubei, aba hasandirun aban lanarime gudemehabu hawagu. Arufuda hamuti le hasandirubei lau le hadügübei: “Ábati hóundaragun afiñetiña ha Antiokíana ha lóubawagubaña Siria lun hóunahan seinsu houn afiñetiña ha Hudeabaña según le hayaraati íchiga” (Adü. 11:27-30). Íbini dise lan hawinwandun íbirigu ha mégeihabubaña, aranseñu haña meha kristiánugu ha Antiokíabaña lun hídehan (1 Huan 3:17, 18).

10. Ida luba gayara lan warufudun gudemehabu dan le hásügürüña lan wábirigu lídangiñe aban sügǘ hénrenguti? (Ariha humóun giñe iyawaü).

¹⁰ Gayaraati giñe warufudun gudemehabu dan le wíchugun fe hásügürüña lan wábirigu lídangiñe lénrengunga. Gayaraati giñe wídehan lau lóufudagun lidan igaburi le: lau wariñagun houn wéiyaaña gayara lan wídehan, lau wíchugun budagia lun lamainirún apurichihani le adügǘbei lidan sun Ubóu luma lau wafurieidun hawagu ha asufurirubaña (Ari. 17:17).b Kei hénpulu lidan irumu 2020, adügǘwati 950 Sétanu lánina Ídehani lun híderaguniña gürigia ha asufurirubaña ladüga sandi COVID-19. Wéiriti weteingiruniña sun ha ídehabaña lidan dasi lánina híderawagun gürigia. Ínchaha lumutiña gudemehabu le hasandirubei hawagu hábirigu lun hóunahan ídemuei houn luma lun híchugun gurasu tídangiñeti Lererun Bungiu houn ani anihein burí dan aranseha hamutu burí haban luma burí fulasu le ñein lubéi hadamuridagua (ariha huméi giñe 2 Korintuna 8:1-4).

11. Ida liña wíchugun uéiriguni lun Wáguchi Bungiu le siélubei dan le warufudun gudemehabu?

¹¹ Dan le warufudun gudemehabu lidan wíderaguniña wábirigu lárigiñe somu chagaguaü le lanügübei somu liñawan dan, herigini, hiriri o katei líbeina lira ariha hamuti amu sákürifisiu le wadügübei. Ariha wamá aban kesi. Lidan irumu 2019, günringua lumutu herigini le gíribei Dorian aban Luban Adamuridaguni to Bahamasubóun. Dan le taransehounbei Luban Adamuridaguni, aba hamuriaha íbirigu luma aban wügüri gabunaguati le mama gefenti lun larihín átiriba lan katei emegeiruwa luma átiriba lan agastarúa lidan le lunbei ladügǘn ñein. Aba lariñagun houn: “Busentina nídehan tuma hóundarun. Busentina nídehan tau máhina, hau nadagimeintiña luma lau sun le emegeirúbei maguburahanga ni aban gáwanaü. Wéirigüda lumutu nanigi lubuidun ligaburi hóuseruniña humadagu”. Saragu gürigia ibidiñeti Heowá houn, ani saragu hádangiñe ariha hamuti le hadügübei lani Gefentiña. Aban lubuidun chansi adüga lan wagudemehabu lun línchahaniña amu gürigia lun hasubudiruni wéiriti lan lugudemehabu Bungiu (Efe. 2:4).

12. Ida liña laranserúniwa warufudun gudemehabu uguñe weyu lubá saragu asufuriruni? (Arufudúni 13:16, 17).

¹² Ka uagu mégeibadiwa lubéi lun warufudun gudemehabu lídanme lidaani saragu asufuriruni? Ladüga ariñagatu Bíbülia sun lan ha mídehanbaña hama gumadimatiña gaturobulinbaña lan, dandu guentó keime lidan lidaani saragu asufuriruni (aliiha huméi Arufudúni 13:16, 17). Másiñati mégeibaña lan íbirigu ídemuei lun hibihini le hemegeirubei. Ma ayumahatiwa lun ladariruniwa Hesukrístu le Warúeite, arufuda gudemehabu danme le liabin aguseragüdaña gürigia ani ábame lariñagun woun: ‘Resibi huméi Arúeihani le aranseelibei hubá’? (Mat. 25:34-40).

SANDITIMA HUMÁ ÍNSIÑENI HAWAGU ÍBIRIGU

13. Ka hadügübei furumiñetiña kristiánugu lúntima hínsiñegua hamá hámagua? (Rómana 15:7).

¹³ Lidan furumiñeti sígulu, subudi hamuti meha sun gürigia luagu hínsiñegua hamá kristiánugu hámagua. Ménrengunti meha san houn harufuduni ínsiñeni ligía? Samina wamá luagu damuriguaü le Rómabei le ñein habéi ámuñegueinarügü íbirigu. Añahein meha hádangiñe huríu meha ha afalarubalin Lilurudun Moisesi lúmagiñe hañüraü. Añahein meha íbirigu lídangiñetiña amu néchani lau ámuñegueinarügü échuni. Chóuruti añahein lan meha hádangiñe idamuni meha hagía ani añahein meha giñe hádangiñe mámaaña idamuni, ani másiñati añaheingua lan meha íbirigu gadamunigiña. Ka meha íderagubaliña lúntima hínsiñegua hamá hámagua? Aba líchuguni apostolu Pábulu adundehani le houn: “Resibigua humá lubeiti húniwagua” (aliiha huméi Rómana 15:7). Ka meha labusenrunbei Pábulu lariñagun? Dimurei le asügürawagüdüwabei ya “resibigua humá lubeiti húniwagua”, mini lan weresibiruniña gürigia lau ínsiñeni o areini, ítara liña dan le weresibiruniña wábiñe o gamadagua wamá hama. Kei hénpulu, ariñagati Pábulu lun Filemón ida luba lan leresibiruni idamuni le meha gíribei Onésimo le anurahabei lúbiñegiñe. Aba lariñagun lun Filemón: “Resibibéi kéisigubeirügü hamuga au lan beresibirubei” (Fil. 17). Mini lan le lau ínsiñeni. Subuditimaati meha arufudahani luáguti Kristu tun Pürisíla luma lun Ákila sügütima luéi Apolosu ligía heresibirunbalin ani aba hanügüni hámagua (Adü. 18:26). Íbini ámuñegueinarügü lan hagaburi kristiánugu ha hawariua, mígiraguagüdüntiña houngua lun lafanreiraguagüdüniña katei le, lubaragiñe lira resibiguatiña hámagua lau ugundani.

14. Ida liña tarufudun Anna luma tani weiriei ínsiñeni?

¹⁴ Gayaraati warufuduni wínsiñehabu houn wábirigu lau weresibiruniña lau sun wagundan, lau wánharun houn keisi wamadagu. Ladügüba katei lira lun giñe hóuseruniwa lau ínsiñeni (2 Ko. 6:11-13). Ariha waméi le asuseredubei tun Anna luma lun tani weiriei ha meha eseriwidubaña Áfürika Oksidentali kei misionérugu. Murusun dan lárigiñe hounahóun eseriwida lidoun amu ageiraü ñeinmeme Áfürika aba lagumeserun sandi COVID-19, ani siñati meha hóundaragun hama íbirigu ha lílana damuriguaü. Ka san hadügübei íbirigu ha lun harufuduni hínsiñehabu? Aba hagúaha misionérugu ha luéigiñe Internet houn íbirigu lun hariñagun houn busén hamá hasubudiruniña. Dun lumutu katei le hanigi íbirigu, ábati hagumeserun agúaha luma abürüha tun Anna luma lun tani weiriei luéigiñe gágamuru. Ka san uagu háfaagua misionérugu ha lun hasubudiruniña íbirigu buidu? Aba tariñagun Anna: “Barǘ numuti tidan nanigi ínsiñeni le harufudubei íbirigu houn niduheñu dandu dan le hásügürün dan buiti kei lidan hásügürün lídangiñe dan hénrenguti. Dan le nasaminarun luagu katei le ínchaha lumutina lun giñe narufudun ínsiñeni”.

15. Ka wafurendeirubei túmagiñe Vanessa luagu ínsiñeni? (Ariha humóun giñe iyawaü).

¹⁵ Saragu wádangiñe awanhein lidan damuriguaü le ñein habéi íbirigu ha ámuñegueinarügüti hagaburi ladüga ligaburi hagüriarún. Kaba íderaguawa lun hínsiñetima hamá woun? Wetenirun lun lubuidun hagaburi. Hénrenguti meha tun aban íbiri to gíriboun Vanessa to awinwanduboun Néwaselanda tanügagun tungua buidu hama fiu íbirigu ha lílana damuriguaü le ñein tubéi. Lubaragiñe tadisedun hawéi íbirigu ha mínsiñebei hagaburi tun, aba tásügürün dan hama. Seremei tadügüni katei le ábati tarihini katei buiti le ladarirubei Heowá hawagu íbirigu ha. Ariñagatu: “Kei aba lubéi liridún nani weiriei kei óunigiruti sirkuitu, adügati katei le lun gamadagua wamá hama saragu íbirigu ani ámuñegueinarügüti hagaburi kada aban hádangiñe. Ani guenlé ménrengunti máhaali nun nanügagun nungua buidu hama amu. Ani hínsiñeti giñe nun lun ámuñegueinarügü hamá. Ani furanguti giñe hínsiñe lan lun Heowá ladüga ligía guánarügü achawahabaliña gürigia hadoun lumutuniña íbini ámuñegueinarügü hamá”. Ligíati, ida luba warufuduni hínsiñe hamá wábirigu woun? Lau wáfaagun lun warihiniña kei larihiniña Heowá (2 Ko. 8:24).

16. Ka uagu súdinibei lubéi lun warufudun ínsiñeni hawagu wábirigu lídanme lidaani saragu asufuriruni? (Ariha humóun giñe iyawaü).

¹⁶ Lídanme saragu asufuriruni mósume warufudun ínsiñeni hawagu wábirigu. Ida luba lóunigiruniwa Heowá danme le lagumeserun saragu asufuriruni? Samina wamá luagu adundehani le líchugubei Heowá houn lumutuniña lun gayaraabei lan hásügürün lau ibagari dan meha le labürühounbei luagu binadu Babilónia: “Heiba, nánigu, belú humá húbiñoun hadouragueime bena haugua. Aramudagua humá luagu murusun dan, darí lásügürün ligañi Wabureme” (Isa. 26:20). Másiñati giñe wasigirubei lan ligiaméme adundehani le danme le wásügürün lídangiñe saragu asufuriruni. Dimurei “húbiñoun” gayaraati mini lan damuriguaü. Ánhawa eredera yarafa houn wábirigu lídanme dan ligía, lóunigirubadiwa Heowá ítara kei füramase lani. Ligíati úati buídurügü lan wawanduniña wábirigu; lunti warufudun ínsiñeni inarüniti houn. Chóuruti hénrengubei lan wásügürün lau ibagari ánhawa marufudun ínsiñeni houn wábirigu.

ARANSEÑU HUMÁ GUENTÓ

17. Ka gayaraabei wadügüni lídanme saragu asufuriruni ánhawa aransera lúmagiñe guentó?

¹⁷ Ábanbei dan hénrenguti “lanarime luéyuri Wabureme” houn sun gürigia (Sof. 1:14, 15). Gaturobulinbaña giñe lubúeingu Heowá. Ánhawa aransera lúmagiñe guentó gayaraabei darangilu wamá ani gayaraabei wíderaguniña amu. Lau awanduni gayaraabei wagagibudagun luma furumiñeguarügü lénrengunga le ñǘbuinti. Lau gudemehabu aranseñu waba lun wadügüni sun wayaraati lun wíderaguniña wábirigu lidan le hemegeirubei. Ani lau ínsiñeni le wasandirubei hawagu wibihiba lun lidan wamá aban. Líchugubei Heowá wafayeiruaha woun laume líchugun ibagari magumuchaditi woun lidan iseri ubóu, aban ubóu le ñein lubeime úaali lanme chagaguaü lani liñawan dan ani labulieiduwaba sun lénrengunga le ídanbei wabagarida uguñe weyu (Isa. 65:17).