“Aranseñu humá” súnwandan lubá lachülürün luéyuri Heowá

1. Ka lunbei wadügüni lun wásügürün lau ibagari lídangiñe luéyuri Heowá?

YUSU tumuti Bíbülia dimurei “luéyuri Wabureme” lun tayanuhan luagu dan le lunbei lagumuchun Bungiu hau láganigu ani sefu láañame lubúeingu. Susereñahaali katei le lidan dan le sügühalibei, dan meha le labeichaguniña Heowá lílana fiu néchani (Isa. 13:1, 6; Ese. 13:5; Sof. 1:8). “Chülümémeeli luéyuri Aburemei” lagumeseruba lau labürühóun tuagun Babilónia to Wéiriboun ani lagumuchuba wuribu le lidan Arümahedón. Lunme wesefurun “weyu” ligía, mosu waranserun lúmagiñe guentó. Ligíati larufudahanbei Hesusu lunti lan ‘aranseñu wamá’ súnwandan lubá lidaani “saragu asufuriruni”, ani ariñagati giñe moun lumuti lan wararamagun (Luk. 12:40; Mat. 24:21).

2. Ka uagu buidu lubéi wakutihanu Furumiñetu Gárada houn Tesalónikana?

² Tidan Furumiñetu Gárada houn Tesalónikana, yúsuti apostolu Pábulu saragu hénpulu lun líderaguniña kristiánugu lun aranseñu hamá luba óunwenbu luéyuri Heowá. Subudi lumuti meha Pábulu mégeigili lan meha saragu dan lubá lachülürün weyu ligía (2 Tesa. 2:1-3). Gama lumoun, ariñagati Pábulu houn súdini lan lun aranseñu hamá kamá hamuga yarafamémeeli weyu ligía. Wagía gayaraati giñe wafalaruni adundehani le. Ariha waméi le lariñagubei, 1) ida luba lan liabin luéyuri Heowá, 2) kaba lan agünrinchawagúa lidan weyu ligía, luma 3) ka lan gayaraabei wadügün lun aranseñu wamá lubá weyu ligía.

IDA LUBA LIABIN LUÉYURI HEOWÁ?

3. Ida liña liábinba lan luéyuri Heowá keisi aban híweruti áriebu? (Ariha huméi giñe dibuhu).

³ “Keisi liabin aban íweruhati áriebu” (1 Tesa. 5:2). Anihán furumiñeti lídangiñe ǘrüwa hénpulu le layusurubei Pábulu lun lariñagun ida luba lan liabin luéyuri Heowá. Aguraba hamuti híwerutiña áriebu lun híweruhan furesegueina lidan luburiga dan le magurabúniwa hamá. Ítarameme, lachülürüba luéyuri Heowá sódini ani furesegueina danme le magurabun hamani saragu gürigia. Gayaraabei giñe taweiridun wanigi wagía kristiánugu inarünitiña danme le warihini lasuseredun sun burí katei le lau lufuresen. Gama lumoun, magünrinchagun lubadiwa Bungiu, gürigiarügübaña ha salufuritiña agünrinchawagúa.

4. Ida luba liabin luéyuri Heowá kei agariduni tun aban würi dageinatu?

⁴ “Kei liabin agariduni tun würi dageinatu” (1 Tesa. 5:3). Aban würi to agurabahaboun tágurahan ibidiñeti tun kaba lan dan táguraha. Lau sun lira, chouru tumuti lachülürüba lan weyu ligía, ani liibe-agei dan, chülüti weyu ligía sódini ani lau gáriti le siñabei lararamúniwa. Ítarameme, íbini ibidiñe lan woun kaba lan weyu luma kaba lan oura lagumesera luéyuri Heowá, chouru wamuti liábinba lan. Subudi wamuti lagunfulirubei lan lasiadihan ani siñabei hanurahan salufuritiña luéi ladüga sódiniba lan liabin.

5. Ida liña ítara luba lan óunwenbu asufuriruni kei larugadun?

⁵ Kei larugadun. Lidan lǘrüwan hénpulu le layusurubei Pábulu, ayanuhayati hawagu híwerutiña ha íweruhabaña áriebu. Gama lumoun, lidan kesi le, adügati aban liraüraü asansiruni lidan le lariñagubei. Genegeti góubaguagüda lani Pábulu lachülürün luéyuri Heowá luma larugadun (1 Tesa. 5:4). Gayaraati heteniruña lan híwerutiña lun le híweruhabei darí lun meteni hamá luagu larugaduña lan. Háfuga míchutiña fe gumeseeli lan arugada ani gayara lan harihín, siñaameti haramudagun. Ítara luba lasuseredun lidan óunwenbu asufuriruni. Gürigia ha adügübaña katei wuribati lidan luburiga, ítara kei ha íweruhabaña, ani ha adügübalin katei le mínsiñebei lun Bungiu, hasubudirúwaba kátaña lan. Wagíati mítarantiwa kei hagía, lubaragiñe lira, arufuda wamuti aranseñu waña lan lubá luéyuri Heowá. Ida? Lau wadisedun luéi furumiñeguarügü igaburi le iyereegubei lun Heowá luma lau wáfaagun lun wasigirun kei gürigia ha “areidatiña, suruti habagari, [ani] hínsiñeti inarüni houn” (Efe. 5:8-12). Lárigiñe adügati Pábulu bián agoubadaguagüdüni le arufudubalin kaba lan agünrinchawagúa lidan luéyuri Heowá.

KÁTAÑA SAN LÚNBAÑA HAGÜNRINCHAWAGUN LIDAN LUÉYURI HEOWÁ?

6. Ida liña harumuguña lan hiibe-agei gürigia? (1 Tesalónikana 5:6, 7).

⁶ “Ha arumugubaña” (aliiha huméi 1 Tesalónikana 5:6, 7). Ariñagati Pábulu ha lan lúnbaña hagünrinchawagun lidan luéyuri Heowá, ítara haña lan kei ha arumugubaña. Dan le larumuguña lan aban gürigia, míchuti fe luagu le asuseredubei geyegu lau ni luagu ida liña lan lásügürün dan. Míchugunti giñe fe luagu lisudinin ítaga sügǘ ani siñati lóunabun kei lubéi. Ligiaméme asuseredubei lau umadaguaü luma Bungiu: hiibe-agei gürigia harumuguña (Rom. 11:8). Meberesentiña luagu wawinwanduña lan lidan “lagumuhóun dan” ni luagu yarafaali lan óunwenbu asufuriruni. Dan le lasuseredun asansiruni wéinamuti ubouagu, añahein hádangiñe fegeraü hamuti hagu ani aba hebereserun lau uganu luáguti Larúeihan Bungiu. Gama lumoun, saragu hádangiñe, murusunrügüñein dan hetenirun lun uganu le, lárigiñe, ani lau lóufudagun, ábaya harumugun. Añahein giñe gürigia ha afiñetiña ñeinbei lan aban weyu lánina aguseruni, lau sun lira, genegeti houn lǘgili lan (2 Fe. 3:3, 4). Ánheinti wagía, subudi wamuti súdinitima lan adundehani le ichugúbei woun lun agagudúañu wamá eibu lásügürün dan.

7. Ida liña ítara haba lan gürigia ha lúnbaña lagünrinchaguniña Bungiu kei bacharuatiña?

⁷ “Ha abacharuadubaña”. Agoubaguagüda lumutiña apostolu Pábulu gürigia ha lúnbaña lagünrinchaguniña Bungiu hama bacharuatiña. Ha bacharuaaña, hámaruti hóunabun lun katei le ásügürübei geyegu hau ani wuribati le hanúadirubei hadügün. Ítarameme, gürigia ha salufuritiña maganbaditiña lun leweridihan Bungiu ani aba hanúadirun hawinwanduni habagari lau aban igaburi le lunbei lanügüniña lidoun günringuaü. Ligíati, líchugunbalin apostolu Pábulu eweridihani le woun wagía kristiánugu lun agagudúañu wamá, súruañu wagíame (1 Tesa. 5:6). Ariñagati aban subudihabúti tuáguti Bíbülia luagu le mini lubéi dimurei súruañu wamá, mini lan “gama wamá aban saminaü darangilati luma lun wasaminaruni katei buidu lubaragiñe wadügüni, adügati katei le lun buidu lan le wanúadirubei”. Gama lumoun, ka uagu megei wabéi lun darangilu wamá luma lun derebugu wamá? Ladüga, ménrengun lan wádaragun wougua lidoun katei lánina polítika luma lidoun katei lánina ubóu le. Lanwoun lira, éibutima ayarafadeina lan luéyuri Heowá, weiritimaabei hadügüdarun gürigia wawagu lun wádaragun woungua lidoun burí katei le. Lau sun lira, moun lumuti wadiheridun luagu ida luba lan wóunabun ladüga líderagubadiwa lani Bungiu sífiri sandu lau líchugun darangilaü luma iderebugu woun, ani líderagubadiwa giñe lun buidu lan le lunbei wanúadiruni (Luk. 12:11, 12).

IDA LUBA WARANSERUN LUBÁ LUÉYURI HEOWÁ?

8. Según 1 Tesalónikana 5:8, ka wemegeirubei lun agagudúañu wamá luma lun buidu lan wasaminan? (Ariha humóun giñe iyawaü).

⁸ Darugua wamá lau waniguagu daü wameime bunidi. Agoubaguagüda lumutiwa Pábulu hama súdara ha agagudúañubaña ani ha táubaña hadaüragun (aliiha huméi 1 Tesalónikana 5:8). Lidan lidaani awuribuhani, súnwandan lunti lan aranseñu lan súdaragu lun wuribu. Ligiaméme asuseredubei woun. Arufuda wamuti aranseñuwaña lan lubá luéyuri Heowá ánhawa adouragua lau afiñeni luma lau ínsiñeni, ani daü wameime bunidi lánina emenigini. Wéiribei líderaguniwa lubuidun burí igaburi le.

9. Ida liña lóunigiruniwa afiñeni?

⁹ Ítara kei lóunigirunu lidáü aniguagu lanigi aban súdara, góunigi lumutu giñe afiñeni luma ínsiñeni wanigi. Íderagua lumutiwa igaburi burí le lun wasigirun eseriwida lun Heowá luma lun wafalaruni Hesusu. Seremei afiñeni le, chouru wamuti líchuguba lan Heowá afayeiruahaü houn ha alubahabalin (Ebü. 11:6). Lanwoun lira, ínchaha lumutiwa afiñeni lun úaragua wamá lun Hesusu le Wábuti, íbini laganagua lénrengunga. Lun wederebudagüdüni wafiñen luma lun wagagibudagun luma burí turobuli, teni wamá lun ida liña lan hadüga íbirigu lun úaragua hamá laganagua éibaahouni luma turobuli lánina maseinsuni. Ani lun méiguadun wamá tidoun sádara lánina lueirin láluahoun umegeguni, gayaraati wáyeihaniña íbirigu ha míbebei hámati lun híchuguni Larúeihan Bungiu furumiñe lidan habagari.b

10. Ida liña líderaguniwa ínsiñeni le wasandirubei luagu Bungiu luma hawagu gürigia?

¹⁰ Mégeitiwa ínsiñeni lun agagudúañu wamá luma lun wakipurun lubuidun saminaü (Mat. 22:37-39). Kei hénpulu, íderagua lumutiwa ínsiñeni le wasandirubei luagu Bungiu lun wasigirun apurichiha íbini laganagua lénrengunga (2 Tim. 1:7, 8). Kei giñe hínsiñe habéi gürigia ha mámabaña gefentiña woun, adüga wamuti sun wayaraati lun wasubudiragüdüni uganu le houn, íbini luéigiñe gágamuru o lau wabürühan gárada houn. Marihin wamutiña kei gürigia féridihaña. Lubaragiñe lira, agurabatiwa hasansiruni hagaburi luma lun hadügüni le buídubei (Ese. 18:27, 28).

11. Ida liña líderaguniwa ínsiñeni le wasandirubei hawagu wábirigu? (1 Tesalónikana 5:11).

¹¹ Hínsiñetiña giñe wábirigu woun ani arufuda wamuti lau wíchugun gurasu luma iderebugu wóuniwagua (aliiha huméi 1 Tesalónikana 5:11). Súdaragu ha awuribuhabaña úara íderaguatiña hámagua. Lau sun lira, dan le añaha lan awuribuha, ibidiñega houn gayaraati habuleseirun aban hádangiñe hapanaagu mabusenrunga; maweiyasunbaña hamuga adügei lau lichú hau. Ítarameme, mabusenrunbadiwa wadügün damichi houn wábirigu ni lun wágiribudagüdün wuribani luagu wuribani houn (1 Tesa. 5:13, 15). Ábaya igaburi lun warufuduni hínsiñe hamá wábirigu woun, lau warufudun inebesei houn íbirigu ha alidihabalin damuriguaü (1 Tesa. 5:12). Samina wamá luagun damuriguaü le meha Tesalónikabei. Dan le labürühanbarun Pábulu gárada to houn, manügüngiña meha ni aban irumu kei damuriguaü. Másiñati míbegili lan meha hasubudin wéiyaaña lidan afiñeni ha ñéinbaña lidan dan ligía ani chará hamá, lau sun lira, mosu meha larufudúniwa inebesei houn. Eibu layarafadun óunwenbu asufuriruni, gayaraabei mosu lanme wáluahani hídehan wéiyaaña lidan afiñeni ha lídanbaña damuriguaü le ñein wabéi sügǘ lau lidan amu dan, ladüga gayaraati mibihinhadiwa lanme adundehani túmagiñe lóundarun Heowá ni tídangiñe sukursáli. Ligíati, súdini lubéi lun hínsiñe hamá luma lun inebe hamá wéiyaaña lidan afiñeni ha lídanbaña damuriguaü le ñein wabéi woun. Meberesenga le lunbei lasuseredun, kipu wamá lichú aau ani metenira wamá lun hachara. Lubaragiñe lira, gabaroun waméi layusuruñein lan Heowá Kristu lun ladundehaniña wügüriña úaraguatiña ha.

12. Ida liña lóunigiruni emenigini wasaminan?

¹² Ítara kei lóunigiruni bunidi lichügü súdara, lóunigirubei giñe emenigini lánina asalbaruni wasaminan. Kei le gabaroun wabalin wemenigin, rútiwa fe meseriwín lan sun le lídanbei ubóu le lun ni kata (Fili. 3:8). Ruti giñe emenigini le darangilaü tun wanigi, ru ligía iderebugu woun. Ligía asuseredubei lun Wallace luma tun Laurinda, ha eseriwidubaña Áfürika. Lídanrügü ǘrüwa dimaasu, hilati aban hádangiñe hagübürigu biángubei hagía. Ani siñati hagiribudun hageiroun hamoun haduheñu ladüga sandi COVID-19. Abürühati Wallace: “Íderagua lumutina emenigini lánina águyuguni saragu. Masaminaruntina luagun ida liña lan hásügürüni lagumuhóun weyu lubaragiñe hounwen, lubaragiñe lira, saminatina luagu ida haba lan furumiñeti burí weyu lidan iseri ubóu. Seremei emenigini le, darangilati nasandiragun nungua. Ídehati emenigini le lun nawanduni íruni le nasandirubei ladüga lueirin féridi le”.

13. Ka gayaraabei wadügün lun líchuguni Heowá lani sífiri sandu woun?

¹³ ‘Meredera huméi luadigimari sífiri sandu’ (1 Tesa. 5:19). Agoubaguagüda lumuti Pábulu sífiri sandu luma watu gemeti le durungubei múnadagiñe wabiti. Seremei sífiri le, benefa wabéi ani adügati lun busén wamá wadügüni le buídubei ani ru lumuti giñe erei le wemegeirubei woun lun wawadigimaridun here luagu lufulesein Heowá (Rom. 12:11). Ka gayaraabei wadügüni lun líchuguni Heowá lani sífiri sandu woun? Lunti wamuriahani luma, aturiaha wamounme Lererun lúmati lun lidan wamá aban tuma lóundarun. Anhein wadüga katei le, wáyeihabei “igaburi le líchugubei sífiri” (Gal. 5:22, 23).

14. Ka lunbei madügün wamani anhein busén wabéi wasigirun eresibirei lani Bungiu sífiri? (Ariha humóun giñe iyawaü).

¹⁴ Ru lumuti Heowá lani sífiri sandu woun, gama lumoun lunti wóunigiruni. Mabusenrúntiwa wadügün somu katei le lunbei leredehani ‘luadigimari sífiri sandu’. Lun líchugun Heowá sífiri sandu woun, mosu haruma lan dandu wagaburi kei wasaminan. Ánhawa ígira lun lebelurun saminaü wíyeti tidoun wanigi, ígira wagía lun ladundehaniwa luriban saminaü, weferidirubei sífiri sandu le ñǘbuinbei lúmagiñe Heowá (1 Tesa. 4:7, 8). Ka amu katei lunbei gabaroun wamani? Ariñagati apostolu Pábulu: “Míchiga humá mebereseni lun dimurei le lariñagubei Bungiu” (1 Tesa. 5:20). Lidan bérusu le, mini lan “dimurei le lariñagubei Bungiu”, uganu le lúmagiñebei le líchugubei lídangiñe lani sífiri. Lidan dimurei le, anihein uganu luáguti luéyuri Heowá luma luagu yarafamémeeli lan weyu ligía. Masaminaruntiwa mégeigili lan saragu dan lubá liabin luéyuri Heowá o marihin wabéi lan lasuseredun Arümahedón lidan wadaani. Subudi wamuti chülümémeeli lan luéyuri Heowá, mini lan le, gabaroun wamani súnwandan. Ligíati súdini lubéi lun warihini ida liña lan wagaburi lun warihini anhein deregeguañanu waña lubéi woungua lun Bungiu sagü weyu (2 Fe. 3:11, 12).

“HÓUCHAGUA HUMÉI SUN ARUFUDAHANI”

15. Ka lunbei wadügüni lun meyeedúniwa wamá? (1 Tesalónikana 5:21).

¹⁵ Yarafa madise, hariñagubei láganigu Bungiu dimurei le: “Lídanñein darangilaü luma achoururuni sun katei” (1 Tesa. 5:3). Hagumeseruba máfianu aburuchaguagüda ariñahani lidan sun fulasu lun heyeeduniña hiibe-agei gürigia (Aruf. 16:13, 14). Agia wagía? Wígiruba san lun heyeeduniwa? Ua, masuseredunbei lira woun anhein wasigira adundehani le: “Hóuchagua huméi sun arufudahani” (aliiha huméi 1 Tesalónikana 5:21). Dimurei güriegu le ásügürawagüdübei ya kei “hóuchagua huméi”, yúsuati lun lachoururúniwa anhein inarüni lubéi aban katei, kéiburi golu o pülata. Wagía sun, mosu giñe wadügüni ligiaméme, lunti wachoururuni anhein inarüni lubéi le waliihabei o le waganbubei. Súdiniti meha lun hadügüni íbirigu ha tesalónikabaña katei le, gama lumoun, súdinitimati wadügüni guentó eibu layarafaduña lan luéyuri óunwenbu asufuriruni. Lubaragiñe werederun afiñedügü luagu sun katei le ariñawagúbei woun, yusu wamuti wasaminan lun wagoubaguagüdüni dandu le waliihabei kei le waganbubei luma le tariñagubei Bíbülia luma giñe le tariñagubei lóundarun Heowá. Ítara, úabei ni aban uganu hámagiñeti máfianu lun leyeeduniwa (Ari. 14:15; 1 Tim. 4:1).

16. Ka lubuidun emenigini wámabei, ani ka lunbei wadügüni guentó?

¹⁶ Subudi wamuti hesefuruba lan lubúeingu Heowá kei sétanu lídangiñe óunwenbu asufuriruni, gama lumoun ibidiñeti woun kaba lan asusereda lun kada aban wádangiñe éibume lásügürün dan (Sant. 4:14). Ánhawa ounwe lubaragiñe óunwenbu asufuriruni o wásügürün lau ibagari, lichugúba Heowá ibagari magumuchaditi woun ánhawa úaragua lun. Añahein hañame kristiánugu anuadirúaaña sielu lun harúeihan luma Kristu, ánhañati amu mudún, hawinwanduba lidan aban Paraísu ya ubouagu. Sun awanha lan agurabaha liabin weyu ligía, teni wamá lun lubuidun wemenigin ani aranse wamá súnwandan lubá luéyuri Heowá.