Ídeha humá lidan damuriguaü le ñein hubéi

Lidan sun ubóu, huduguatiña saragu míñunu gürigia lun Heowá lau ugundani lidan saragu milu damuriguaü. Gebegiti adundehani le heresibirubei kristiánugu ha houn ani ídehatiña lau sun hagundan lidan ámuñegueinarügü igaburi lidan damuriguaü le ñein habéi. Ítara liña giñe san hasandiragun hungua lidan damuriguaü le ñein hubéi?

1. Ida luba hídehan lau hidaani luma here lidan damuriguaü le ñein hubéi?

Sun wagía gayaraati wídehan lidan damuriguaü le ñein wabéi. Kei hénpulu, añahein san íbirigu derebuguhaña o sánditiña lidan damuriguaü le ñein hubéi? Gayaraati san híderaguniña lau hanügüniña lidoun adamuridaguni? O gayaraati san híderaguniña lau amu burí katei, kéiburi lau hidin mágidurugu o híderaguniña lau amu katei le hemegeirubei múnada? (Aliiha huméi Santiagu 1:27). Gayaraati wídehan lidan tarumadahóun luma tounigirún Luban Wadamuridagun. Mafosurúntiwa lun wadügüni katei burí le. Wagía íchaagubei woungua lun wadügüni ladüga línsiñe Bungiu woun hama wíbirigu (Sálumu 110:3).

Gachansintiña giñe gefentiña luagu Heowá ha badiseihañabaña lun hídehan lidan amu burí igaburi lidan damuriguaü. Íbirigu wügüriña ha agunfulirubaña lau le tamuriahabei Bíbülia, gayaraati heseriwidun kei ídehatiña lidan damuriguaü, ani lau lásügürün dan, kei wéiyaaña lidan afiñeni. Ani súngubei wagía, dandu wügüriña kei würiña, gayaraati wídehantima lidan apurichihani lau weseriwidun kei prekursorugu. Añahein giñe gefentiña luagu Heowá ídehatiña lidan tábunawagun muna lun wáhuduragun lun Heowá. Ani añahein amu, aba háguyun lidoun aban damuriguaü le ñein lubéi mégeiwa lan hídehan.

2. Ida luba wídehan lidan damuriguaü lau waseinsun luma lau amu burí katei?

Ariñagatu Bíbülia: “Ruba inebesei lun Bungiu lau birisin” (Ariñawagúni 3:9). Gúndaatiwa lau wayusuruni waseinsun luma burí amu wámati lun wídehan dandu lidan damuriguaü kei lidan apurichihani le adügǘbei lidan sun ubóu (aliiha huméi 2 Korintuna 9:7). Yúsuati giñe budagia le wíchugubei lun híderawagun íbirigu ha ásügürübaña liñawan dan, hárabaganali o katei líbeina lira. Héchutiña saragu adireira “murusun lídangiñe le [h]agañeirubei” lun híchugun budagia (aliiha huméi 1 Korintuna 16:2). Gayaraati híchuguni hani budagia tidoun gafu to tídanboun Luban Wadamuridagun o hóunahani luéigiñe páhina lánina Internet donate.jw.org. Ru lumuti Heowá chansi woun lun wayusuruni wámati lun warufuduni ínsiñeni le wasandirubei luagu.

SIGÍ HUMÁ AFURENDEIRA

3. Gayaraati wayusuruni wámati

Hínsiñetiña ha íchugubaña lau ugundani dandu lun Heowá kei lun Hesusu. Kei hénpulu, ayanuhati Hesusu buidu tuagu aban würi hilaali túmari to adügüboun sákürifisiu lun gayara lan tíchugun bián gáwanaü keisi budagia. Aliiha huméi Lúkasi 21:1-4, ábameti hayanuhan luagu álügüdahani burí le:

• Lunti san gibe lan seinsu wíchugun lun lagundaarun Heowá?

• Ida liña lasandiragun Heowá luma Hesusu houngua dan le wíchugun budagia tídangiñe sun wanigi?

Lun hasubudiruni ida liña lan layusurún budagia le wíchugubei, ariha huméi BIDÉU. Ábameti hayanuhan luagu álügüdahani le:

BIDÉU: Buíngüda waméi wáhabu lau aban idewesei lun Heowá (4:47)

• Ida liña lasagarun sun damuriguaü le lídanbei sun ubóu buiti lídangiñe budagia le wíchugubei?

4. Gayaraati wídehan

Ídehatiña meha lubúeingu Heowá ha lánina tidaani Bíbülia lau ubebeni lidan lounigirún fulasu le ídanbei háhuduragua lun Heowá ani mámarügü lau seinsu. Aliiha huméi 2 Krónikasi 34:9-11, ábameti hayanuhan luagu álügüdahani le:

• Ka meha hadügübei sun ísüraelina lun hóunigirunu litenpulun Heowá o fulasu le ñein lubéi háhuduragua lun?

Lun hasubudiruni ida liña lan háyeihani gefentiña luagu Heowá hénpulu tídangiñeti Bíbülia le, ariha huméi BIDÉU. Ábameti hayanuhan luagu álügüdahani burí le:

BIDÉU: Góunigi waméi fulasu le ídanbei wáhuduragua lun Heowá (3:31)

• Ka uagu lunti lubéi wakipurunu Luban Wadamuridagun harumañu luma lun ua lan mégeiti tuagu?

• Ida luba gayara lan hídehan?

5. Gayaraati háfaagun íbirigu wügüriña lun hagunfulirun lau le mégeiwabei lun heseriwidun lidan damuriguaü

Ínchaha tumutiña Bíbülia wügüriña kristiánugu lun hadügüni sun hayaraati lun hídehan lidan damuriguaü. Lun harihini ida liña lan libihini aban íbiri katei le, ariha huméi BIDÉU. Ábameti hayanuhan luagu álügüdahani le:

BIDÉU: Íbirigu wügüriña, áfaagua humá lun hawanserun lidan heseriwidun lun Heowá (5:23)

• Ka katei ladügübei Ryan lun lawanserun lidan leseriwidún lúntima lídehan lidan damuriguaü?

Írida tumuti Bíbülia ka lan igaburi lunbei hagunfuliruni íbirigu wügüriña ha busenbaña heseriwidun kei ídehatiña lidan damuriguaü o wéiyaaña lidan afiñeni. Aliiha huméi 1 Timotéu 3:1-13, ábameti hayanuhan luagu álügüdahani burí le:

• Ka agurabúbei hámagiñe íbirigu wügüriña ha busenbaña heseriwidun kei ídehatiña lidan damuriguaü o kei wéiyaaña lidan afiñeni?

• Ka agurabúbei hámagiñe haduheñu? (Ariha huméi bérusu 4 luma 11).

• Ánhaña áfaagua íbirigu wügüriña lun hagunfulirun lau sun igaburi le, kaba buiti lanüga le lun damuriguaü?

LE HAFURENDEIRUBEI

Gebegiti sákürifisiu le wadügübei lun Heowá dan le wídehan lidan damuriguaü lau wadaani, were luma wámati.

Águyuguagüdüni

• Ida luba wídehan lidan damuriguaü lau wadaani luma were?

• Ida luba wayusuruni wámati lun wídehan lidan damuriguaü le ñein wabéi?

• Ka hamuga habusenrubei hadügün lun hídehan lidan damuriguaü?

FURENDEI HUMÁ LANWOUN

Furendei huméi ka lan uagu mamuriahanhali lubéi Bungiu wámagiñe lun wíchugun diisi lídangiñe san.

“Ka san tariñagubei Bíbülia luagu lichugún diisi lídangiñe san?” (Ariñahani lídangiñeti jw.org)

Rutu Bíbülia fiu dasi houn wügüriña ha badiseihaña. Anhein mosu lubéi tadügüni aban würi badiseitu, ida luba hamuga tadügüni?

“Ubafu le hámabei wéiyaaña lidan afiñeni lidan damuriguaü” (Garüdia Awisahatu to lánina bián–hati, irumu 2021).

Furendei humá hawagu fiu gefentiña luagu Heowá ganigitiña ha adügübaña sákürifisiu lun hachülüragüdünu agumeiraguagüdüni houn hábirigu.

Tafanreinhóun agumeiraguagüdüni ageiraü Kongo (4:25)

Ariha huméi amu lan ligaburi hamainiruni gefentiña luagu Heowá hawadigimari luéi ligaburi ladügǘn tidan amu burí relihión.

“Ida liña lamainirúniwa hawadigimari gefentiña luagu Heowá?” (Ariñahani lídangiñeti jw.org)