• Hínsiñetiña ha alubahabaña katei buiti ani awanda hagía lun Heowá
    Garüdia Awisahatu (to lánina aturiahani) 2018 | seingü-hati

    • 7. a) Ka mini lubéi ábunaguti nadü, beibei luma limu? b) Ka álügüdahani lunbei wóunabuni?

      7 (Aliiha huméi Huan 15:1-5, 8). Afuranguagüda lumuti Hesusu ligía lan “beibei le tímatimaatibei”, Lúguchi lan ábunaguti nadü, ani lani disipulugu hagía lan limubei. Lárigiñe, ariñagati houn lani apostolugu: “Ibihati Núguchi uéiriguni dan le gibe lan hin, ani lau lira arufuda humuti luagu nánigu humá disipulu ha tímatimaatiña”.b Ligíati, ka mini lubéi lun walubahan katei buiti? Lidan abahüdaguni le, mafuranguagüdün lumuti Hesusu ka lan mini lubéi in, gama lumoun, ruti ariñahani súdiniti le lunbei líderaguniwa asubudirei.

      8. a) Ka uagu subudi wabalin dan le lariñawagún lidan hénpulu le lunti lan walubahan katei buiti mama lan layanuhaña luagu wadügün disipulugu? b) Ida liña larufuduni Heowá ligaburi lau le lamuriahanbei wámagiñe?

      8 Ariñagati Hesusu luagu Lúguchi: “Chaün lumuti sun limu le minti”. Lidan amu dimurei, lun gayara lan larihiniwa Heowá keisi lubúeingu, lunti walubahan katei buiti (Mat. 13:23; 21:43). Ligíati, dan le lariñawagún lidan hénpulu le lunti lan walubahan katei buiti mama layanuhaña luagu wadügün disipulugu (Mat. 28:19). Ka uagu? Ladüga anhein hamuga ítara liña lubéi, lariñawagúña hamuga ítara hamá íbirigu úaraguatiña ha apurichihatiña lidan fulasu le ñein lubéi maha hamá hiibe-agei gürigia haganbuniwa keisi limu meseriwidunti le uágubei layanuha Hesusu. Gama lumoun, mítaranti ladüga siñati wafosuruniña gürigia lun hánharun lun uganu le wapurichihabei. Hínsiñetiwa lun Heowá ani maweiyasunbei hamuga amahada woun ladügarügü siñá lan wadügün somu katei. Mamuriahanti katei wama le siñá wabéi adüga (2 Lur. 30:11-14).

      9. a) Ka dasi lunbei wadügüni lun gayara lan walubahan katei buiti? b) Kaba abahüdaguni wakutiha, ani ka uagu?

      9 Ligíati, katei san katei buiti le lunbei walubahani? Chóuruti layanuhaña lan luagu aban katei le gayara wabéi adüga. Ani ka dasi ru laalibei Heowá woun lun wadügüni? Wapurichihani uganu buiti luáguti Larúeihan (Mat. 24:14).c Chóurugüda lumuti katei le abahüdaguni luáguti ábunaguti le uágubei layanuha Hesusu. Akutiha waméi abahüdaguni le.