Adundehani súdiniti lun gunda hamá iduheñu

Wügüri maríeiti, hínsiñeta búmari bun

“Ítara liña lunti lan tínsiñedun lúmari wügüri lun kei línsiñe lúgubu guánarügü lun. Le hínsiñehabuti tun lúmari hínsiñeguati lungua. Úati gürigia meberesenti lau lúgubu guánarügü; hóugüdarügü lumuti, góunigilei” (ÉFESUNA 5:28, 29).

Wügüri hachügüdinabei liduheñu (Éfesuna 5:23). Aban wügüri maríeiti le buiti, madügüdarunti tuagu lani weiriou lun libihini le labusenrubei, lubaragiñe lira, wéiriti tebegi lani weiriou lun ani góunigi lumutu, rulei le temegeirubei tun lun tawinwandun luma lun buidu lan tasandiragun tungua. Áfaaguati giñe saragu lun lagundaragüdünun ani madügüdarunti tuagu lun súnwandan lan ladügǘn katei kei labusenrún (Filipuna 2:4). Dan ladimurehan tuma, ariñaga lumuti le lasandirubei luma le lisaminanbei furangu, ani aganba lumutu giñe. Magañidunti tuma, magayuahan ligía tuagu, manabun lumutu giñe lun tasandiragun tungua wuriba (Kolosana 3:19).

Würi maríeitu, inebe lan bani weiriei bun

“Lun giñe inebe lan túmari würi tun” (ÉFESUNA 5:33).

Dan le inebe lan túmari würi tun ani úara tuguya luma lidan le lanúadirubei, ídehatu lun ñein lan darangilaü hadan iduheñu. Ani anhein acharara, madügünboun lun lasandiragun lungua lau busiganu, lubaragiñe lira, sigitu arufuda inebesei lun ani kíputu darangilaü (1 Féduru 3:4). Ábanya katei, dan le mosu lan laransehóun aban turobuli, subudi tumuti kaba lan oura tadimureha ani lau giñe inebesei tadimureha lun (Apurichihati 3:7).

Úaragua humá lidan hamarieidun

Laganóuba wügüri “tuma lúmari, ábame hayabin lun ítara haba lan kei ábanrügü gürigia” (AGUMESEHANI 2:24).

Dan le lamarieidun aban wügüri tuma aban würi, belutiña lidoun aban óundaruni hánina iduheñu le derebuguti. Ligíati, mosu lubéi háfaagun biángubei hagía lun hakipuruni hamarieidun lidan lubudubu. Ida? Lau hadimurehan hámagua tídangiñe sun hanigi luagu burí lubuidun hagaburi. Maweiyasun hagíame agamarida aban gürigia le mama hani weiriei o weiriou. Gárigüda lumutu agabarahani anigi, günringua lumuti afiñeni ani fánreinguagüda lumutiña iduheñu (Ebüréu 13:4).

Agübürigu, arufudaha humá houn hisaanigu

“Arufudahabá buiti lun irahü dan le ñǘraügili; íbini danme le wéiyaali mabulieidun lubéi” (ARIÑAWAGÚNI 22:6).

Rúhali Bungiu aban dasi houn agübürigu lun harufudahan houn hasaanigu, lidan, anihein lubuidun igaburi luma lichugún hénpulu buiti houn (2 Lúrudu 6:6, 7). Anhein móuserun irahü buidu, agübürigu ha buítiña móunabunbaña lau anarimeguni, lubaragiñe lira, ‘aranseñu haba lun haganbun, gama lumoun lunti hámaru hamá lun ladimurehan luma lun hagañidun’ (Santiagu 1:19). Ani ánhaña anúadira lun habeichuni, hadügübei ladüga hínsiñe lan houn ani mama luagu gañi hamá luma.

Isaanigu, gaganbadi humá houn hagübürigu

“Isaanigu, gaganbadi humá houn hagübürigu [...]. ‘Inebelá búguchi tuma búguchu bun’” (ÉFESUNA 6:1, 2).

Lunti gaganbadi hamá isaanigu ani inebe hagíame hagübürigu houn. Dan le hadügüni, hídehaña lun ñein lan darangilaü hadan iduheñu luma lun gunda hamá. Dan le wéinamuhaña isaanigu, arufudatiña inebesei houn hagübürigu lau hetenirun lun le hemegeirubei ani góunigi hamaña. Kei hénpulu, lau haransehanu haban hagübürigu luma lun hídereguniña lidan megei hamá seinsu o amu katei (1 Timotéu 5:3, 4).