Adundehani lun wabagaridun lidan darangilaü hama amu

Gíchigadi humá ferudun

“Gaguraasun humá hubaruagua [...] ferudunagua huguyame húmagua” (KOLOSANA 3:13).

Gayaraati wóuserun aban gürigia wuriba o lóuseruniwa lan yebe wuriba, lugundun sun wagía charatiwa. Ligíati sun lubéi wagía mégeitiwa lun feruduna wamá amu ani lun giñe feruduna hamaniwa. Dan feruduna wamá, aba marihin wamaali lan gürigia le achararubei woun wuriba. Mafayeihantiwa “wuribani luagu wuribani” ani masagahan wamuti hachara amu houn hagibuagun (Rómana 12:17). Ánheinti siñá lubéi feruduna wamani wuribani le ladügübei woun? Buídutimabei lun wadimurehan luma gürigia ligía wábuguarügü ani lau inebesei. Létima wabusenrubei, lun warandarun luma gürigia ligía, mama lun wagañeiruni wuribu (Rómana 12:18).

Ǘnabugu humá ani inebehabu huguyame

“Lau lan ǘnabuguni, ani buidulá hanügüniña amu gürigia huéi guánarügü” (FILIPUNA 2:3).

Gúndaabaña gürigia wama anhein ǘnabugu wabéi ani óusera wamaña lau inebesei. Hasubudirubei buidu lan wagaburi ani berese wamá hau, ani maweiyasunbadiwa lan adüga wuribani houn chuñu wau. Luéigiñe le aban oubaü, anhein busén wabéi lun wéirigu lan wanügǘniwa hawéi amu luma lun ladügǘn sun katei kei wabusenrún, wagubuhaba turobuli luma sigenei. Hadiseduba gürigia wawéi ani fiúrugubaña wamadagu... o ni aban.

Ualá himei humá aban gürigia luéi aban

“Úati [...] himei lan Bungiu aban gürigia luéi aban, lubaragiñe lira, resibirügü lumutiña sun ha inebehabubaña lun ani adüga haméi le buídubei, lídangiñe hamá yebe furumiñeguarügü néchani” (ADÜGAÜ 10:34, 35).

Móuserun lumutiña Bungiu amu gürigia buidu hawéi ha híbiri ladügarügü amu hamá néchanigu, iñeñein, habara lidan ubóu le o likolorun hara. “Lídangiñe ábanrügü wügüri ladügaña sun néchanigu” (Adügaü 17:26). Mini lan lira, sun lan wagía íbirigu. Lidan wóuseruniña sun gürigia lau inebesei luma gamadóuni, gúndaatiña ani gúndaatiwa giñe, lanwoun lira, gúndaati giñe Le adügübaliwa.

Magañida humá lau lumenrengun

‘Abagarida humá lau gaguraasuni’ (KOLOSANA 3:12).

Dan le gaguraasun wamá ani magañidun wagía lau lumenrengun, dariguatiña ha híbiri gürigia houngua wama ani sandiguatiña houngua gayara lan habahüdagun furumiñeguarügü katei woun, ani gayaraati híchugun eweridihani woun, ladüga subudi hamani luagu masafaragun báadiwa lan. Anhein agañida aban gürigia wama, ani aba wóuseruni lau ǘnabuguni, líderagubei wagaburi gürigia ligía lun darangilu lan. Ariñagati Ariñawagúni 15:1: “Óunabagülei le buiti gáluma lumuti igañi, anhein óunabagülei le hanarimeti iñuraguatimarügü lumuti”.

Gíchigadi humá ani geteingiradi huguyame

‘Gúndaatimati le íchugubei sügǘ lau le eresibirubei’ (ADÜGAÜ 20:35, Lererun Bungiu to lánina Iseri Daradu [LBID]).

Saragu gürigia hawouguarügüñein hasaminara ani lúntima lagibedun hamegen hetenira. Anhein gíchigadi wabéi, wibihiba ugundani le inarüniti (Lúkasi 6:38). Ha gíchigadibaña gúndaatimatiña ladüga hínsiñetimatiña gürigia houn sügǘ lau umegeguni, ani adügati katei le lun geteingiradi hamá ani arufuda hamuti dan le heresibirun somu katei hámagiñe amu (Kolosana 3:15). Álügüdagua humá hungua: “Kaba hamuga uma nabusenra nerederun? Luma aban gürigia le hángiti ani meteingiraditi, o luma aban le gíchigaditi ani geteingiradi?”. Le wabusenrubei: wadügün houn amu kei wabusenrun lun hadügün woun (Matéu 7:12).