Ídaba san lagumucha wamuriahan “Ñǘbuinla barúeihan”?

1, 2. a) Ka uagu anihein lubéi dan marihin wamá somu katei? b) Ka wasubudirubei luagu Larúeihan Bungiu?

HÁFUGA ariha humani dan le lan lasuseredun somu katei, gürigia ha arihibalin lasuseredun ámuñegueinarügüti habahüdahani ida liña lan lasuseredun. Luagu amu oubaü, gayarati hénrengu lan lun aban gürigia laritaguni ka lan lariñagubei surusia lun lárigiñe lariñaguni surusia ligía lun ka lan lisandibei. Anihein giñe dan hénrengu lan lun aban gürigia ladariruni geléin o ligagülesin íbini anihán lan ligibugiñe. Sun le susereti ladüga katei le unbei hagúara aturiahatiña siensiasi, aban luwuyeri marihini: míchugun hamá gürigia fe luagu somu katei, o habulieidun somu katei ladüga lídanñein lan amu katei hasaminan. Ariñawagúati ábanrügüñein lan katei uáguti gayara lan lasaminarun aban gürigia buidu, mama luagu saragu katei lidan aban.

² Súfuritiña saragu gürigia aban “marihini” libe lira lidan luáguti katei burí le asuseredubei ubouagu. Háfuga subudi hamuti sánsihali lan ubóu saragu lúmagiñe irumu 1914, gama lumoun úati gunfuranda hamani kátima lan mini lubéi sun katei le. Seremei waturiahanu Bíbülia, ligía wasubudirunbalin gumeseeli lan Larúeihan Bungiu lidan irumu 1914, dan le lañuurun Hesusu luagu lala arúeihani sielu. Gama lumoun, subudi wamuti giñe móunabunwagili lan furíei le sunsuinagubei: “Ñǘbuinla barúeihan; adügüwalá bugundan ya ubouagu kei ladügǘniwa sielu” (Mat. 6:10). Gama lumoun, lun ladügǘniwa lugundan Bungiu ya ubouagu keisi ladügǘniwa sielu, furumiñe mosu lagumuchún lau ubóu wuribati le.

3. Ka buiti wasagarubei lídangiñe waturiahanu Lererun Bungiu?

³ Seremei waturiahanu Lererun Bungiu súnwandan, ariha wamuti lagunfuliruña lan saragu profesía. Híbiri gürigia marihin hamuti! Hanarimeti haberesegun lidan habagari darí lun meberesen hamá lau burí katei le arufudubalin gumeseeli lan Kristu arúeihan lúmagiñe irumu 1914 ani yarafa madise lagunfulirubei lugundan Bungiu lau laguseragüdüni ubóu le. Anhein barühadün lubéi saragu irumu eseriwida lun Bungiu, súdiniti hálügüdagun hungua: “Ariha nágili san le mini lubéi katei burí le asuseredubei kei aban katei súdiniti kei meha narihini fiú irumu lubaragiñe le?”. Íbini anhein málügili lubéi gefén humá luagu Heowá, samina humá: “Kátima san un netenira?”. Ka lan yebe hóunabagülebei, ariha wamá ǘrüwa resun súdiniti le uágubei wasubudirei málühali lan Urúei le lanúadirubei Bungiu adügei lugundan Bungiu ya ubouagu sunsuinagubei.

HÁFUACHUN AGALUFEHATIÑA

4, 5. a) Ka ladügübei Hesusu lúmagiñe irumu 1914? (Ariha huméi dibuhu le lídanbei lagumeseha arütíkulu.) b) Ka mini lubéi hawanserun ǘrüwa agalufehatiña ha asigirubalin Hesusu? c) Ida liña lagunfulirun profesía le?

⁴ Lidan irumu 1914, resibi lumuti Hesukrístu, le arufudúbei keisi aban agalufehati wariñu luagu aban gabayu haruti, ridi sielu. Ouraméme ligía, aba láfuridun agalufeheina lun lóunwenbudagüdüni lagañeirun kóntüra ubóu wuribati le (aliiha huméi Arufudúni 6:1, 2). Profesía furanguti le lídanbei Arufudúni kapítulu 6 arufudati lárigiñe lan buga lagumeserun Larúeihan Bungiu, furesebei lan buga laribadun léibugun katei ubouagu. Ñeinbei wuribu, likesin éigini, sandi luma amu burí katei le adügübei lun hóunwegun gürigia, ani lun layanuhóun luagu sun burí sügǘ le, yúsuatiña ǘrüwa agalufehatiña gabayu ha lárigi lárigibaña Hesukrístu (Aruf. 6:3-8).

⁵ Ariñawagúali meha luagu ‘lagidarubei lan wuribu darangilaü ubouagugiñe’ ani ligía asuseredubei. Meseriwinti lun ni kata le füramase habéi urúeigu ubouaguna. Gayarati wariñagun le lan furumiñeti wuribu wéiriti ligía lan furumiñeti wuribu hanarimeti ubouagu le agidarubalin darangilaü. Ani íbini gibe lan awanseruni lidan tuáguti siensiasi luma irisini le arihíbei lúmagiñe irumu 1914, anihamémegua likesin éigini adüga lun lougua lan ichouruni ubouagu. Ani ka gayarabei lariñagun máfarun haali lan sun luwuyerigu sandi, chagaguaü lánina liñawan dan luma amu burí luwuyeri igei gáfarahati saragu gürigia sagü irumu? Yarafaguati láfarahan katei burí le saragu gürigia lidan sun dan ubouagu. Rutün san fe luagu le mini lubéi katei le?

6. a) Kátaña san íchugubaña fe luagu lagunfuliruña lan profesía burí le tídanbei Bíbülia? b) Ka hadügübei lárigiñe?

⁶ Saragu gürigia ténitiña meha lun Furumiñeti Wuribu Wéiriti luma luagu lachülaagun gripe española. Ánhañati kristiánugu anuadirúaaña, hagurabahañein meha lagumuchun hadaani “ha mámabaña huríu” lidan irumu 1914 (Luk. 21:24). Machourun hamuti meha kaba lan asusereda, gama lumoun subudi hamuti ñeinbei lan aban asansiruni súdiniti lidan larúeihan Bungiu lidan irumu 1914. Dan le híchugunbei fe luagu lagunfuliruña lan profesía le tídanbei Bíbülia, aba hariñagun lau ganigi gumeseeli lan Larúeihan Bungiu. Adügati le lun héibaahoun, ani kei éibaahoua habéi lidan saragu ageiraü arufudati luagu lagunfuliruña lan profesía. Lidan irumu burí le asigirubei, éibaaha hamutiña láganiñu Larúeihan Bungiu lubúeingu Heowá lau híchugun lúrudu burí le marichati kóntüra lubúeingu Bungiu. Óusera hamutiña giñe wuriba, daü hamaña darí hóunahaniña átigiragüda, lun laduurawagún hawagun luma lun ladüürǘn hachügü (Sal. 94:20; Aruf. 12:15).

7. Ka uagu míchugun habéi hibe-agei gürigia fe luagu kátima lan mini lubéi katei burí le asuseredubei ubouagu?

⁷ Lau saragu katei le arufudubalin luagu gumeseeli lan Larúeihan Bungiu agumadiha sielu, ka uagu míchugun habéi hibe-agei gürigia fe luagu ítara liña lan? Ka uagu masaminarun habéi buidu lun híchugun fe luagu gúnfulihali lan profesía burí le tídanbei Bíbülia le uágubei hayanuha lumutuniña Bungiu lúmagiñe binadu dan? Lúnrügüñein funa san le harihibei lau hagu hetenira? (2 Ko. 5:7.) Wéiriti san hetenirun hóuniwagua darí lun marihin hamani ka lan ladügübei Bungiu? (Mat. 24:37-39.) Ladüga funa san hígiraguagüdün houngua lun saminaü luma burí katei le lafanreinhabei ubóu le lani Satanási? (2 Ko. 4:4.) Lun warihini le ladügübei Larúeihan Bungiu luma lun warihin lóugiñe le ligibugiñebei wagu mégeitiwa afiñeni. Wéiriti wagundan ladüga gayara lan warihini létima asuseredubei!

EIBU DAN GÍBETIMARÜGÜTI WURIBANI

8-10. a) Ida liña san agunfulireina lan 2 Timotéu 3:1-5? b) Ka san katei arufudubalin aganwoundeina liña lan wuribani eibu dan?

⁸ Laganwoundun wuribani hadan gürigia ubouagu ligía ábanya katei le adügübei lun wasubudiruni luagu málühali lan Larúeihan Bungiu agumadiha ya ubouagu: eibu lásügürün dan ábatima laganwoundun hariban gürigia. Katei burí le uágubei layanuhóua lidan 2 Timotéu 3:1-5 gúnfulimemeli 100 irumu asusereda, ani le linarün katei, lasusereduña lidan sun larigei ubóu ani hanarimetimati eibu dan. Gunfuranda humuti san katei le? Akutiha wamá fiú hénpulu le arufudubalin (aliiha huméi 2 Timotéu 3:1, 13).

⁹ Konpararü huméi katei le meha wuribabei larihín lidan burí irumu 1940 luma 1950 lumoun le asuseredubei uguñe weyu lidan burí wadagimanu, hadan gürigia ha famosubaña, lidan huraraü luma lidan ligaburi hasansiragun gürigia. Kamanitimaahali anarimeni luma magíaguni uguñe weyu. Añahein fiú áluahatiña lun harihín kei ha hanarimetimabaña, kei ha bulagiaditimabaña o kei ha furundetimabaña. Programa burí le arihíbei tidan bigibigitu lidan burí irumu 1950 kei mabuidunti, uguñe weyu ariñawagúati luagu buidu lan lun harihini sun familia. Ani gíbetiña gürigia arihiti lanarime hasalirun wügüriña ha agamaridutiña wügüriña háledigu o würiña hama würiña lidan burí programa tidan bigibigitu, ani yusu hamuti katei le lun hasaminarun gürigia buidu lan usa le. Teinki waña lun Bungiu luagu lasubudiragüdüni woun ka lan lisaminanbei luagu katei le! (Aliiha huméi Húdasi 14, 15.)

¹⁰ Gayarati giñe wayanuhan luagu igaburi wuribati le meha arihíbei hawagu nibureintiña lidan burí irumu 1950 ani ábame konpararü wamani luma le asuseredubei uguñe weyu. Nidiheritiña meha agübürigu ladüga hagumulahan hasaanigu, hátagun o habinahan badülegu, ani garichatiña meha lun hadiheridun. Uguñe weyu, aganbúati lanarime burí ñunsu darí lun lásiruhan lau hara gürigia. Laduuragun aban nibureinti 15 irumu lau hawagun lánigu paaná leskuelarugu, ǘnhürati 15 nibureintiña ani hilatiña 2 hádangiñe. Lidan habacharuan fiú nibureintiña áfaratiña aban irahü nefu irumu tau ani bulesei haméi túguchi luma aban tani primu. Chóuruwati luagu nibureintiña lan adügübalin lamidan lídangiñe sun wuribani le adügǘbei lidan aban ageiraü Asia lidan lagumuhóun diisi irumu. Gayarati san lariñagun somu gürigia luagu iyeeni lan wuribatimaahali lan ubóu?

11. Ka uagu míchugun habéi saragu gürigia fe luagu wuribatimarügali lan katei ubouagu?

¹¹ Lidan aban profesía, ariñagati meha apostolu Féduru: “Lídounme [...] lagumuhóun dan, añaheinbaña gürigia adaagutiña bula hau; habagariduba keisi lariñaguni luriban haritagun houn, ábame hariñagun: ‘Ka san mégeibei lau füramasei luagu lagiribuduba lan Kristu? Hilagua wagübürigu ani ítaramemegili sun katei kei meha lúmagiñe dan le ladügǘnbei ubóu’” (2 Fe. 3:3, 4). Ida liña san gayara lan lafuranguagüdüniwa ligaburi hóunabun gürigia? Genegeti eibu lan yarafaguatima lan lasuseredun aban katei, aba maweiridunharu lan wanigi. Gayarati taweiridun wanigi dan le warihini sódini lan lasansirun ligaburi aban gürigia le yarafati woun. Gama lumoun, háfuga marihin wamani wuribatimarügali lan ligaburi hóuserun gürigia ubouagu lugundun murusun murusun lan lasansirun. Gama lumoun peliguru mémegili.

12, 13. a) Ka uagu moun lumuti lubéi weferidiruni waguraasun dan le warihini le asuseredubei ubouagu? b) Ka katei íderagubaliwa lun wararamun lun “weyu hénrenguti” le uágubei layanuha Pábulu?

¹² Wéridi lumutiwa meha apostolu Pábulu luagu ‘hénrengubei lan’ katei “lídounme lagumuhóun dan” (2 Tim. 3:1). Gama lumoun, mariñagunti siñabei lan wawanduni, ligíati, úati resun lun wanufudedun ni lun weferidiruni waguraasun. Lau lídehan Heowá, lau lani sífiri sandu luma lau lídehan damuriguaü kristiánu gayarabei wiñuragun lídangiñe furumiñeguarügü anufudei o íruni. Gayarati wakipurun úaraguni. “Lúmagiñe [...] Bungiu liabin ubafu le wawagubei”, mama wámagiñegua (2 Ko. 4:7-10).

¹³ Súdiniti gumese lani apostolu Pábulu lani profesía luáguti lagumuhóun burí dan le lau dimurei “lunti giñe basubudiruni”. Dimurei le arufudati furangu luagu le lan lasigirubei abürüha lagunfuliruba lan lau ichouruni. Ligía chouru lubéi luagu laribadatimaba lan léibugun katei ubouagu darime lachülürün lóurate lagumuchun Heowá lau. Gürigia ha burí abürühabaña luagu dan le sügühalibei ígira hamuti bürüñu luagu fiú lan lídangiñe néchani le sügühalibei, weiri lan lagadeirun lubaragiñebei lagünrinchawagun. Ani le linarün katei, magadeirunñahagili ligaburi hawinwandun gürigia ubouagu kei guentó. Besafu gürigia háfuga mebereseguntiña lau le mini lubéi katei le, gama lumoun, sun lanarime agadeiruni le susereelibei lúmagiñe irumu 1914 arufudati furangu luagu málühali lan sansi lan Larúeihan Bungiu ligaburi léibugun katei ubouagu.

LUBARAGIÑE HÓUNWEGUN GÜRIGIA HA LÁNINA DAN LE

14-16. Ka lǘrüwanbei resun lun wafiñerun luagu málühali lan ñübuin Larúeihan Bungiu?

¹⁴ Aniheingua aban lǘrüwan resun lun wafiñerun luagu yarafaali lan lagumuchagüle ubóu: le asuseredubei hadan lumutuniña Bungiu. Kei hénpulu, lubaragiñebei lagumeserun Larúeihan Bungiu agumadiha sielu, añaheinhañame fiú kristiánugu anuadirúaaña ha úaraguatiña eseriwida lun Bungiu lau ubebeni. Ka hadügübei dan le magunfulirun lubéi fiú lídangiñe katei le hagurabahabei lasuseredun lidan irumu 1914? Hibe-agei sigitiña eseriwida lun Heowá. Íbini lidan óuchawaguni luma éibaahouni le meha hawandubei hibe-agei o súngubei kristiánugu anuadirúaaña, sigitiña lau úaraguni darí lun lagumuchun habagari ligibuagu Ubóu.

¹⁵ Lidan aban profesía luáguti lagumuchagüle ubóu le, ariñagati Hesusu: “Ninarün hau, luagu lasusereduba lan sun le lubaragiñe hóunwegun gürigia ha lánina dan le” (aliiha huméi Matéu 24:33-35). Gunfuranda wamuti dan le lan lariñagun “gürigia ha lánina dan le”, layanuhaña lan Hesusu hawagu bián sétanu hani kristiánugu anuadirúaaña. Kristiánugu anuadirúaaña ha lídanbaña furumiñeti sétanu ariha hamuti le asuseredubei lidan irumu 1914 ani gunfuranda hamuti gumese lan Kristu arúeiha lidan irumu ligía. Mama wayanuhaña luágurügü wínwangiña lan meha lidan irumu ligía, wayanuhaña luagu anuadirúaaña lan lau sífiri sandu lidan irumu ligía o lubaragiñe lun lirahüñü hamá Bungiu (Rom. 8:14-17).

¹⁶ Le libiaman sétanu hani “gürigia ha lánina dan le” layanuhaña hawagu kristiánugu anuadirúaaña ha awinwandubaña lidan somu dan úara hama lílana furumiñeti sétanu. Ani mama wayanuhaña luagu wínwanrügü hamá lidan ligiaméme dan hama lílana furumiñeti sétanu, wayanuhaña hawagu ha anuadirúbaña lau sífiri sandu dan le meha añahagua hádangiñe ha lílana furumiñeti sétanu wínwanñu ubouagu. Ligíati, mama sun kristiánugu anuadirúaaña ha wínwangiñabaña guentó lun hádangiñe hamá “gürigia ha lánina dan le” ha meha uágubaña layanuha Hesusu. Uguñe weyu, ha lílana libiaman sétanu wéiyougaaña. Gama lumoun, dimurei le meha lariñagubei Hesusu lidan Matéu 24:34 chouru lumuti woun luagu liábinba lan lanarime asufuriruni “lubaragiñe hóunwegun gürigia ha lánina dan le”, ligíati, añaheinguame íbini fiú hádangiñe kristiánugu anuadirúaaña ha “lánina dan le” danme le lagumeserun lidaani saragu asufuriruni. Adügati katei le lúntima wachoururuni luagu murusunrügaali lan dan lubá lagumuchun Hesukrístu, Urúei le lánina Larúeihan Bungiu, hau sun wuribatiña ani ábame liabin aban iseri ubóu le richati (2 Fe. 3:13).

MÁLÜHALI GUMÚ LAN KRISTU LAGAÑEIRUN

17. Ka idoun lanügawa sun burí katei le akutiha wamaalibei?

¹⁷ Ka saminaü ídounbei wachülüra dan le warihini lagunfulirun ǘrüwa profesía le akutiha wamaalibei? Ariñagati Hesusu ibidiñebei lan woun kaba lan weyu ni kaba lan oura liabin lagumuchagüle ubóu, ani ítara liña (Mat. 24:36; 25:13). Gama lumoun, kei lariñagun Pábulu, subudi wamuti kaba lan “dan” lasusereda (aliiha huméi Rómana 13:11). Subudi wamuti wawinwanduña lan lidan lagumuhóun dan. Anhein wakutiha profesía burí le tídanbei Bíbülia lau duari, ani akutiha wameime ka lan ladaagubei Heowá luma Hesusu, siñabei marihin wamani katei burí le arufudubalin luagu yarafaali lan lagumuchagüle ubóu.

18. Kaba asusereda houn ha máhabaña herederun lábugiñe Larúeihan Bungiu?

¹⁸ Ha máhabaña hafiñerun luagu lanarime ubafu le ibiha láalibei Hesukrístu, Le agalufehabalin gabayu haruti, málühali dan lun mosu lanme hánharun lun hachara. Siñabei hanurahan luéi laguseragüdün Bungiu. Gíbebaña agúarahatiña lau anufudei: “Kábati gayara lawanduni?” (Aruf. 6:15-17). Ounabúati álügüdahani le lidan kapítulu le asigirubei lidan Arufudúni. Kristiánugu anuadirúaaña hama hánigu paaná ha hemenigibaña lun hawinwandun ubouagu ‘rara haba’ lugundun resibi hamaalime lugundan Bungiu. Lárigiñe, ábameti hásügürün “saragu gürigia” hádangiñetiña amu mudún lau ibagari lídangiñe óunwenbu asufuriruni ani ábame hebelurun lidoun iseri ubóu (Aruf. 7:9, 13-15).

19. Ka wagurabubei lau saragu emenigini sun wagía ha asubudirubalin ani anha wagía luagu yarafaali lan lagumuchagüle ubóu?

¹⁹ Ánhawa etenira lun profesía burí tídangiñeti Bíbülia le agunfulirubei lidan dan súdiniti le, mígirunbadiwa lun ladisedagüdüniwa ubóu le lani Satanási luéi Heowá ani warihibei giñe kátima lan mini lubéi sun katei le asuseredubei ubouagu. Málühali ibiha lan Kristu agañeiruni dayarüti kóntüra ubóu wuribati le lidan wuribu lánina Arümahedón (Aruf. 19:11, 19-21). Ma lubuidun ibagari le agurabubadiwa ámuñegü! (Aruf. 20:1-3, 6; 21:3, 4.)