Ariñahani le lunbei lakutihóun lidan adamuridaguni Habagari Kristiánugu luma Heseriwidun
1-7 LIDAN GÁDÜRÜ-HATI
ARUFUDAHANI GEBEGITI TÍDANGIÑETI BÍBÜLIA | 1 KORINTUNA 7-9
“Ubafu le luágubei gürigia lun lerederun mamarieidunga”
w11-S 15/1 páh. 18 pár. 3
Ida luba layusuruni aban gürigia dan le laubei mamarieidunga buidu?
3 Liibe-agei dan, gadaanitimatiña ani gachansintimatiña ha mamarieidungiña lun hadügün saragu katei, ligía ménrenguntima lubéi houn lun haganwoundagüdüni heseriwidun, gíbetima hamá hamadagu luma lun habuiduragüdüni hamadagua luma Heowá (1 Ko. 7:32-35). Kei arihúa lan buiti le lanügübei katei le, añahein saragu kristiánugu ha anúadirutiña herederun mamarieidunga, íbini luagu fiu dan. Luagu amu oubaü, añahein fiu ha yebe masaminaruntiña herederun hábugua. Keiti aba lan lasansiragun katei lidan habagari, aba hafurieidun, ráramaguatiña asaminara ani aba híchugun fe gayara lan hahandilihani gádantiña darangilañu lau lídehan Heowá. Ábati hanúadirun tidan hanigi lun hererun ítara kei habéi (1 Ko. 7:37, 38, TNM).
w08-S 15/7 páh. 27 pár. 1
Puntu méiniti tídangiñeti burí gárada houn Korintuna
7:33, 34. Ka burí san “katei le lánina ibagari le” uágubei hadiherida kristiánugu ha maríeibaña? Layanuhóuña luagu katei burí le mégeiwabei lidan ibagari sagü weyu —kéiburi éigini, daüguaü luma halíaba lan heredera—, mama layanuhóuña luagu burí katei wuribati le lídanbei ubóu le, le uéibei lunti lan wadisedun sun wagía (1 Huan 2:15-17).
w96-S 15/10 páh. 12 pár. 14
Lerederun gürigia mamarieidunga. Aban bena lun leseriwidun maritagunga saragu luagu katei lánina ibagari le
14 Siñati lariñawagún buídutima lan ladüga aban kristiánu le mamarieidungili luéi aban le maríeihali, anhein layusuruñein lubéi gádanti lúnrügü libihin katei lúniwagua, ladüga mama “lun [l]eseriwidun lun Bungiu” leredera mamarieidunga, rédeiti ítara ladüga ítara liña lan labusenruni (Matéu 19:12). Haritaguatiña dandu wügüriña kei würiña ha mamarieidungiña “luagu burí katei le luáguti Bungiu”, aranseñu haña lun hadügüni le mégeiwabei lun “lagundaarun Bungiu [h]au” luma lun deregeguañu hamá houngua lun heseriwidun lun “Wabureme, [...] maritagunga saragu luagu katei lánina ibagari le”. Lun lira, mosu hetenirun lúnrügü heseriwidun lun Heowá luma Hesukrístu. Ítararügübei buídutima lan hadüga kristiánugu ha mamarieidungiña hawéi maríeitiña.
Darí wamá pérüla lánina lichú aau
lv páh. 220 pár. 2 darí páh. 221 pár. 2
Ka tariñagubei Bíbülia luagu ígiraguni luma fánreinguaü?
Gama lumoun, anihein burí turobuli wéinamuti le ídanbei desidírü lan somu kristiánu lun hafanreinragun o hígiragun, íbini úagili lan ni aban hádangiñe adügüti magíaguni lidan agamariduni. Dan le lasuseredun ítara, ariñagatu Bíbülia le lan desidírübei lidin ‘lunti lerederun mámariga o larandarun tuma lúmari’ (1 Korintuna 7:11). Lidan burí sügǘ ítarati, úati líbüre lan kristiánu lun lagumeserun asubudira amu gürigia lun lamarieidun tuma (Matéu 5:32). Ariha wamá saragu turobuli wéinamuti le adügübei lun hafanreinragun fiu.
• Hamahadun hanuriahaniña haduheñu. Añahein wügüriña maríeitiña michu hamuti le hemegeirubei haduheñu houn, ani mama ladüga siñá lan hadügüni, ladüga mabusenrun hamá, ábati hígiruniña haduheñu áfaga gudemei. Ka tariñagubei Bíbülia hawagu? “Le maritagunti hawagu [...] liduheñu, yéeguaali lau lafiñen; wuribatimatiti sügǘ lau aban gürigia le mafiñenti” (1 Timotéu 5:8). Dan le maha lan aban gürigia ítarati lasansirun, mosu desidírü tan lani weiriou anhein mosu lubéi hígiragun lun masuseredun lan ni kata wuribati houn tisaanigu ni tun. Gama lumoun, dan le haganbun wéiyaaña lidan afiñeni luagu maha lan aban kristiánu letenirun houn liduheñu, mosu hakutihan buidu libügürü katei le lugundun gayaraati labugún aban gürigia ítarati lídangiñe damuriguaü.
• Lagayuahan tuagu lani weiriou. Añahein hagía fásitiña darí lun híchuguni tátuadi luma tibagari hani weiriou lidan peliguru. Anhein kristiánu lubéi gürigia le óuserubei ítara, mosu hakutihani wéiyaaña lidan afiñeni katei le buidu, lugundun gayaraati labugún gürigia lídangiñe damuriguaü anhein hanarime lubéi lagañidun ani furunde ligía (Galasiana 5:19-21).
• Peliguru sériuti lun wamadagua luma Heowá. Añahein gürigia maríeitiña houcha hamuti sun hayaraati lun meseriwidun hamá hánigu paaná lun Heowá o anihein dan hafosuruniña lun hadüraaguni lúrudu burí le tídanbei Bíbülia. Dan le lasuseredun ítara, mosu desidírü lan kristiánu anhein mosu lubéi hígiragun lun ‘ladügüni le lariñagubei Bungiu lubaragiñe le hariñagubei wügüriña’ (Adügaü 5:29).
w00-S 15/7 páh. 31 pár. 2
Gayaraati haruma lan wóuserun lidan aban ubóu le buinbei lau magíaguni
Ligía moun lumuti lubéi hóufudahan nibureintiña amarieida dan le hasandirun hagumeseruña lan ayumaha hagamaridun. Lidan maríei mégeiwati lun lagunfulirun gürigia lau le füramase lubéi luma lun derebugu lan lisaminan (Agumesehani 2:24). Buídutimati hagurabahan darí lásügürün “dan le ídanbei wéiritima lan hayumahan nibureintiña hagamaridun” le gayaraabei ladügün lun masaminarun hamá keisi lubudubu (1 Korintuna 7:36, TNM). Ani aban libidiounigan aau lerederun aban gürigia wéiriaali le busenbei lamarieidun adaagua magíaguni ladügarügü madarirungili lan kaba lan uma lamarieida ani aban giñe figóu lira.
8-14 LIDAN GÁDÜRÜ-HATI
ARUFUDAHANI GEBEGITI TÍDANGIÑETI BÍBÜLIA | 1 KORINTUNA 10-13
“Gúnfuliti Heowá”
Álügüdahani burí le hadügübei aliihatiña
Abürühati apostolu Pábulu mígirunbei lan Heowá lun wouchawagún lóugiñe le gayara wabéi awanda (1 Ko. 10:13). Mini lan san le ariha lani Heowá furumiñe halía lan lébeda wawandun ani lárigiñe aba lanúadiruni óuchawaguni le lunbei liabin woun?
▪ Lun hamuga anha lan lóunabagülebei álügüdahani le, ida liña hamuga san wasandiragun woungua? Ariha wamá aban hénpulu. Aba láfaragun lisaani aban íbiri lungua. Wéiriti igarigu le lasandirubei íbiri le. Aba lagumeserun álügüdagua lungua anhein subudi laali lubéi Heowá le lunbei lasuseredun ani anhein desidírühali lubéi luagu dandu lan ligía kei lani weiriou gayara habéi lan lamiselu ligía awanda. Híruti wásügürüba lan besafu wádangiñe lídangiñe turobuli wéinamuti lidan ubóu le. Gama lumoun, lunti san wasaminarun Heowá lan ahandilihabalin sun le asuseredubei woun?
Anhein wakutiha 1 Korintuna 10:13, wíchuguba fe luagu marufudahan tan Bíbülia luagu ariha lani Heowá furumiñe halía lan lébeda wawandun ani lárigiñe aba lan lanúadiruni óuchawaguni le lunbei wawanduni. Ariha wamá gádürü resun le uágubei wariñagei katei le.
Le furumiñeti resun, ladüga ru lan Heowá ubafu houn gürigia lun desidírü hamá. Busenti Heowá lun desidírü wamani kaba lan wadüga (2 Lur. 30:19, 20; Hos. 24:15). Ánhawa desidírü katei le auti lagundaara Heowá, gayaraabei wachoururuni ladundehabadiwa lan (Ari. 16:9). Gama lumoun, ánhawa desidírü wuriba, mósume wasufuriruni lani resultóu (Gal. 6:7). Lun hamuga anúadaha lani Bungiu óuchawaguni le lunbei wawanduni, inarüni hamuga san luagu líbüre wamá lun desidírü wamá?
Le libiaman resun, ladüga móunigirun lániwa Heowá luéi “katei le asusereduti sódini” o le magurabúnti (Apur. 9:11). Gayaraati lasufurirun aban gürigia aban óunwenbu danaguaü ladügarügü lídanñein lan aban fulasu lidan lóurate lasuseredun somu katei mabuidunti. Ayanuhati meha Hesusu luagu aban danaguaü le ídanbei hóunwegua 18 gürigia dan le lábürühan aban wáyelesi hawagun. Furanguti meha lariñaguni mama lan Bungiu adügübei lun hóunwegun gürigia hagía (Luk. 13:1-5). Marichati hasaminarun gürigia lubaragiñe lan lasuseredun aban danaguaü desidírü laali lan Bungiu kaba lan ounwe ani kaba lan awinwanda.
Le lǘrüwan resun, mosu larufuduni kada aban wádangiñe úaragua lan lun Heowá. Ariñagati Satanási seriwi wamá lun Heowá luágurügü katei burí le líchugubei woun ani múaragunbadiwa lan lun ánhawa asufurira óuchawaguni (Hob. 1:9-11; 2:4; Aruf. 12:10). Lun hamuga lóunigiruniwa Heowá luéi fiu óuchawaguni, genegeti hamuga luagu linarün lan meha Satanási le lariñagubei.
Le ligadürün resun, desidírüti Heowá masubudirun lani sun le lunbei lasuseredun woun ámuñegü. Anhein busén gayaraati lasubudiruni (Isa. 46:10). Gama lumoun, ariñagatu Bíbülia anihein lan katei luáguti ámuñegü le himei lumuti Heowá masubudirun lani (Agumesehani 18:20, 21; 22:12). Ka uagu? Ladüga hínsiñehabu lan ani richati ani inebehabuti giñe lun chansi le líchugubei woun lun desidírü wamá (2 Lur. 32:4; 2 Ko. 3:17).
Ligíati, ka san labusenrubei Pábulu lariñagun dan le lariñagunbei mígirunbei lan Heowá lun wóuchawagun lóugiñe le gayara wabéi awanda? Layanuhaña Pábulu luagu ligaburi líderaguniwa Heowá dan le wásügürüña lan lénrengunga, mama luagu le ladügübei lubaragiñe (ariha huméi aburüdǘni). Ánhawa afiñera luagu Heowá, líderagubadiwa awanda furumiñeguarügü lénrengunga (Sal. 55:22). Guentó ariha wamá bián resun le uágubei lariñaga Pábulu mígirunbei lan Bungiu lun wóuchawagun lóugiñe le gayarabei wawanduni.
Le furumiñeti resun, ladüga masufurirungidiwa lan óuchawaguni “le hásiñarun gürigia awanda”. Mini lan le sun lan gürigia ha awinwandubaña lidan ubóu le lani Satanási gaturobulintiña. Sun wagía wásügürüba lídangiñe turobuli hénrenguti o íbini lídangiñe somu lamiselu. Gama lumoun, ánhawa afiñera luagu Heowá, gayaraabei wawanduni óuchawaguni ani kipu wagíame úaraguni (1 Fe. 5:8, 9). Lidan fiu bérusu le lubaragiñebei 1 Korintuna 10:13, ayanuhati Pábulu luagu fiu óuchawaguni le meha hasufurirubei ísüraelina lidan fulasu mageirawati (1 Ko. 10:6-11). Ha ísüraelina ha afiñerubaña luagu Heowá awanda hamuti óuchawaguni. Ánhañati ha mafiñerunbaña luagu aba maganbadi hamá ani marufuduntiña úaraguni.
Le libiaman resun, ladüga “gúnfuliti Bungiu”. Ka mini lubéi le? Ánhawa asaminara ida liña lan líderaguniña Bungiu lumutuniña súnwandan, warihibei luagu úaragua lan ani íderagua lániña “ha hínsiñehabubaña lun ani gúnfuli haméi lugumadin” (2 Lur. 7:9). Ani súnwandan giñe lagunfuliruni Bungiu le füramase lubéi (Hos. 23:14). Ligía gayara lubéi wachoururun bián katei. Furumiñe, luagu mígirunbei lan Heowá lun hénrengu lan aban óuchawaguni darí lun siñá wamani awanda. Ani libiaman, luagu larufudubei lan woun ‘ida luba lan wáfuridun lídangiñe’.
Ida liña san larufuduni Heowá woun ida luba lan ‘wáfuridun lídangiñe’ óuchawaguni ánhawa afiñera luagu? Inarüni gayara lan lagidaruni óuchawaguni wawéi. Gama lumoun ariñagati Pábulu larufudubei lan Heowá woun ida luba lan wáfuridun lídangiñe o kaba lan wadüga lun wawanduni. Arufudahati le woun súnwandan lan líderaguniwa Heowá lau líchugun erei woun lun wakipurun úaraguni. Ruti erei woun lidan ámuñegueinarügü igaburi. Ariha wamá fiu:
▪ Ruti Heowá “dǘgüdaguaü woun lidan sun wasufurirun”, lidan amu dimurei, dan le gaturobulin wamá (2 Ko. 1:3, 4). Gayaraati líchugun darangilaü lun wasaminan tuma wanigi tau Bíbülia, lau lani sífiri sandu luma lau lídehan musu úaraguati (Mat. 24:45; Huan 14:16, Rom. 15:4).
▪ Gayaraati ladundehaniwa Heowá lau lani sífiri sandu (Huan 14:26). Gayaraati líderaguniwa lani Heowá sífiri sandu lun waritagun somu abahüdaguni luma somu ariñahani tídangiñeti Bíbülia le lunbei líderaguniwa lun desidírü wamá buidu.
▪ Gayaraati layusuruniña Heowá lani ánheligu lun híderaguniwa (Ebü. 1:14).
▪ Gayaraati layusuruniña Heowá íbirigu lun líderaguniwa. Gayaraati híchugun gurasu woun lau hadügün somu katei wawagu o lau dimurei burí le hariñagubei woun (Kol. 4:11).
Ka san gunfuranda wabéi luagu dimurei le lariñagubei Pábulu lidan 1 Korintuna 10:13? Furendeitiwa manúadahan lani Heowá óuchawaguni le lunbei wagagibudagun luma. Furendeitiwa giñe ánhawa lan afiñera luagu, wawanduba lan furumiñeguarügü lénrengunga. Súnwandan líderagubadiwa lan Heowá lun gayara lan wasigirun eseriwida lun lau úaraguni.
Darí wamá pérüla lánina lichú aau
w04-S 1/4 páh. 29
Álügüdahani burí le hadügübei aliihatiña
Ka uagu lariñaga 1 Korintuna 10:8 hilá hamá 23,000 ísüraelina lidan aban weyu ladüga hadügün magíaguni anhein ariñaga lubéi 1 Lúrudu 25:9 wein-gádürüñanu lan milu?
Anihein ámuñegueinarügü katei le adügübei lun lasaminarúniwa ka lan uagu mama lubéi ligiaméme númeru iridúbei lidan bián bérusu le. Másiñati labadinaguañanu lan meha 23,000 hama 24,000 gürigia, ligía gayara lubéi meha lachawarawagun númeru le iñun o ǘnabun, ligía resun le ménrenguntimabei.
Ariha wamá amu resun. Ayanuhati giñe apostolu Pábulu luagu le asuseredubei houn ísüraelina Sitimü lun leweridiruniña kristiánugu ha lídanbaña binadu Korintu, uburugu le meha subudiwabei luagu luriban hóuserun lílana. Abürühati: “Moun lumuti wahoruhan kei meha hadüga fiu hádangiñe, aba larufuduni Bungiu luagu wuriba lan le hadügübei lau láfaragun wein-ǘrüwa-milu hádangiñe lidan aban weyu”. Hawagutima ha láfaragubaña Heowá layanuha Pábulu ladüga hadügün magíaguni, ani ariñagati wein-ǘrüwa-míluñanu lan (1 Korintuna 10:8).
Lidan kapítulu 25 lidan 2 Lúrudu afuranguagüdawati aba lan “háhuduragun [ísüraelina] lun Baali-peoru. Ábati lagañidun [Heowá] houn Ísüraelina”, ariñaga ligía lun Moisesi lun lóundaraguniña sun “ábutigu fulasurugu” lun háfaraguniña. Ábati lariñagun Moisesi houn aguseragüdütiña lun hagunfulirun lau gumadi ligía. Danti le lanúadirunbei Finesi larufuduni luéigiñeñein lan lóubadina Heowá, aba láfaruni ísüraelina le anügübei aban würi madianna tidoun hakianpun-agei, ani adügati lira lun “lagumuchun igei”. Gumuti abahüdaguni lau dimurei burí le: “Hilaguatiña wein-gádürü-milu hádangiñe” (1 Lúrudu 25:1-9).
Genegeti abahüdǘwa hamá “ábutigu” ha meha lídanbaña fulasu tidan furumiñetu liliburun Lúrudu —ha háfaragubaña aguseragüdütiña— úara hama ísüraelina ha láfaragubaña Heowá guánarügü. Másiñati áfara hamá aguseragüdütiña milu ábutigu, ha meha adügübaña lun hóustarun 24,000. Gaduruntiña meha ábutigu hagía luagu “hígiraguagüdün houngua [...] [o “habadülerun luagu”, TNM] Baali-peoru”, ladüga lan yebe hadügün magíaguni, gadan lániña somu fedu o hígiruniña amu lun hadügün furumiñeguarügü lídangiñe katei burí ligía.
Afuranguagüdati aban ariñahani luagu dimurei “habadülerun”, gayara lan mini lan “ládaragun aban gürigia lungua lumoun amu”. Lumutuniña meha Heowá ha lanúadirubaña ísüraelina, lau sun lira, gadei hamuti hamadagua Luma dan le ‘habadülerunbei luagu Baali-peoru’. Kéiburi sedü-san irumu lárigiñe, aba lariñagun Bungiu houn ísüraelina lau lídehan profeta Oseasi: “Dan le hachülürünbei Baali-peoru aba hederegeragun houngua houn hagübüri búngiugu, aba hǘnabudaguagüdün houngua houn guáriuagu ha meha hínsiñebaña houn” (Oseasi 9:10). Gadünatiña meha sun ha óuserubaña ítara aban lanarime abeichúni lúmagiñeti Bungiu. Ani ítara liña laritaguagüdüni Moisesi houn ísüraelina: “Ariha humaali le ladügübei Aburemei lidan fulasu le gíribei Baali-peoru, ariha humuti láfaraguniña ha áhuduragubaña lun Baali le lubungiute fulasu ligía” (2 Lúrudu 4:3).
w15-S 15/2 páh. 30
Álügüdahani burí le hadügübei aliihatiña
Lunti san tadouragun aban íbiri lau tichügü dan le tíchugun aturiahani tídangiñeti Bíbülia anhein anihein lubéi aban íbiri ñein?
▪ Afuranguagüdati arütíkulu le meha áfuachubei lidan fánreinti “Álügüdahani burí le hadügübei aliihatiña”, tidan garüdia La Atalaya to lánina 15 lidan sedü-hati, irumu 2002, lunti lan tadouragun aban íbiri lau tichügü dan le tidin íchiga aturiahani luma aban apurichihati le badiseihali o le mabadiseirungili. Gama lumoun, lárigiñe lakutihóun tema le buidu buidu, genegeti mégeiwa lan lun laransehóun le ariñawagúbei dan ligía.
Mosu tadouragun aban íbiri lau tichügü dan le gumeseeru lan aban aturiahani tídangiñeti Bíbülia ani aba tidin íchigei luma aban íbiri le badiseihali. Ka uagu? Kei tadügüña lan aban dasi le hamuga lunbei ladügüni aban íbiri, adügati tadouragun íbiri to lau tichügü lun tarufudun inebesei lun adundehani le ichugúbei kei lúrudu lidan damuriguaü kristiánu (1 Ko. 11:5, 6, 10). Anhein busén tubéi íbiri, gayaraati tamuriahan luma íbiri lun líchuguni aturiahani, anhein gayara lubéi ladügüni.
Luagu amu oubaü, anhein aban lubéi apurichihati mabadiseirungili le mama tani weiriei ñǘdünbei íchiga aturiahani tuma íbiri, úati ni aban gumadi tidan Bíbülia le arufudati lunti lan tadouragun lau tichügü. Íbini ítara, másiñati ñéinbaña lan íbirigu würiña ha busenbaña hadouragun lau hachügü ladüga hasaminarun ligía lan buídutimabei.
22-28 LIDAN GÁDÜRÜ-HATI
ARUFUDAHANI GEBEGITI TÍDANGIÑETI BÍBÜLIA | 1 KORINTUNA 14-16
“Búngiurügüba [...] sun katei hadan súngubei”
w98-S 1/7 páh. 21 pár. 10
Lagünrinchawaguba óunweni
10 Lau layanuhóun luagu “lagumuchagüle sun katei” layanuhóuña luagu lagumuchagüle Milu Irumu le lunbei ladurarun Larúeihan Kristu, danme lederegeruni Hesusu Arúeihani lun Lubungiute ani Lúguchi lau ǘnabuguni luma úaraguni (Arufudúni 20:4). Gúnfulihalime lisuuni Bungiu le luáguti lóundaruni “sun katei lidan Kristu” (Éfesuna 1:9, 10). Ani lubaragiñe, lagünrinchagubei Kristu “sun líbiri luwuyeri arúeihani, ubafu, luma erei le ubouagubei” le burí ebedaagubei lun ladügǘniwa lugundan Bungiu. Lun lira, mámarügüñein wuribu Arümahedón emegeirúa (Arufudúni 16:16; 19:11-21). Ariñagati Pábulu: “Larúeihaba Kristu darime líchuguniña láganiñu lábugiñoun lugudi; óunweni, ligíaba lagumuhóun ágani agünrinchawaguti” (1 Korintuna 15:25, 26). Ítara liña, meredebei ni murusun lídangiñe óunweni luma figóu le galagante wabéi lúmagiñe Adán. Lúmounme dan ligía, sagá láañame Bungiu sun gürigia lídangiñe “hamúaha”, lidan amu dimurei, águyuguagüda láañame sun hilaaña (Huan 5:28, 29).
kr-S páh. 237 pár. 21
Lagunfulirun Arúeihani lau le labusenrubei Bungiu ubouagu
21 Kábati asusereda lau óunweni, katei le anügübei fulasu lárigiñe sandi luma figóu? Sun wagía, chülüti dan lun wábürühan lúhaburugun óunweni, le “lagumuhóun [w]ágani” (1 Ko. 15:26). Wéiritimati san lubafu óunweni luéi Heowá? Teni humá lun le lariñagubei Isaíasi: “Lagünrinchagubei Wabureme óunweni lun súnwandan, laragahabei águiraü luéigiñe hagu sun gürigia” (Isa. 25:8). Saminaadün san luagu le? Úaalime ábunahani ni gabusándu ni ayahuni lánina igarigu! Lubaragiñe lira: wayahuba luagu ugundani leme lunbei wasandiruni danme le warihin ida liña lan lagunfuliruni Heowá lubuidun lisuuni lánina láguyuguagüdüniña hilaaña (aliiha huméi Isaíasi 26:19). Chülüdügame dan lun lareidagun igarigu le lanügübei óunweni houn saragu míñunu gürigia.
Milu irumu lau darangilaü... lúmaya saragu!
17 Úati amu manera buítimati lun wadimurehan luagu ida luba lan ibagari danme le lagumuchun Larúeihan Kristu le lánina Milu Irumu kei lau burí dimurei le: “Búngiurügüba [...] sun katei hadan súngubei”. Ka mini lubéi dimurei burí le? Lubaragiñe meha lafigouhan Adán tuma Ewa, hádangiñetiña meha lufamilian Heowá dandu ha siélubaña kei meha ha ubouagubaña ani lidan meha darangilaü luma úarani hawinwanda hámagua. Heowá le Bungiu Suntigabafu ligía meha agumadihabei luagu sun le ladügübei, dandu ánheligu kei gürigia. Gayaraati meha háhuduragun kada aban hádangiñe lun ayanuha hagía luma, ani biní lumutiña meha Heowá. Ligía meha ‘sun káteibei hadan súngubei’.
Darí wamá pérüla lánina lichú aau
w12 1/10 páh. 9, rekuáduru
Ariñagati san apostolu Pábulu siñá lan hadimurehan würiña?
Abürühati meha apostolu Pábulu “moun lumuti [lan] hadimurehan würiña lidan hadamurin afiñetiña” (1 Korintuna 14:34). Ka meha labusenrubei lariñagun? Ladüga funa san samina lan siñagua hamá würiña houngua lun harufudahan? Uá, mama ligía labusenrubei lariñagun, lugundun súnwandanha ladimurehan buidu luagu wadagimanu lánina apurichihani le hadügübei (2 Timotéu 1:5; Titu 2:3-5). Tidan aban tídangiñe gárada to labürüdüboun Pábulu houn korintuna, ruti eweridihani mámarügü houn würiña, ruti giñe eweridihani houn ha láubaña ubafu lun hadimurehan dimurei terencha luma houn ha iyumulugugiñebaña ladimureha Bungiu lun hámanichun dan le ladimurehaña lan amu kristiánu (1 Korintuna 14:26-30, 33). Háfuga héchutiña meha würiña kristiánugu adüraaguei le lariñagubei somu íbiri dan le líchuguña lan yanu lun hadügün álügüdahani ladüga weiri lan hagundan luagu le hafurendeirubei, kei ligía lan meha échunibei lidan fulasu ligía. Mabusenrunti meha Pábulu lun ñein lan chagaguaü lidan adamuridaguni, ligía lariñagubei houn lun ‘hálügüdüni hámari hábiñe’ (1 Korintuna 14:35).
it-1-S páh. 1221
Úgubu le siñabei lañaladun
Háguyuguba ha lúnbaña harúeihan luma Hesusu kei ligía, ani mámarügü lau aban ibagari magumuchaditi kei sífirigu, háguyuguba giñe lau aban úgubu le móunwedadibei luma le siñabei lañaladun. Kei lariñaguni Pábulu furangu tidan 1 Korintuna 15:42-54, lárigiñe hawinwandun, heseriwidun lau úaraguni, hilá hagía lau úgubu le añaladubei, heresibiruba aban úgubu le mañaladadibei kei sífirigu. Ligíati, dan le lariñawagún luagu móunwedadibaña lan, layanuhóuña luagu luwuyeri ibagari le habihibei, luagu lidura luma luagu siñá lan lagünrinchawagun, ánheinti dan le liridún úgubu le siñabei lañaladun layanuhóuña luagu luwuyeri úgubu le líchugubei Bungiu houn, le siñabei lagadeirun ni lagumuchagun ladüga igaburi le ídanbei ladügǘwa. Ligía genege lubéi adüga lániña Bungiu lau ubafu lun gani hamani sun le hemegeirubei, memegeiruntiña lídangiñe ni aban erei lun hawinwandun ani mítarantiña kei amu sífirigu o gürigia. Arufudati lira aban lídangiñe lubuidun igaburi le ídanbei lafiñera Bungiu hawagu. Gama lumoun, madügünti siñá lan hagünrinchawagun ni memegeirun hamá ni kata lun mabafu lan Bungiu hawagu, dandu hagía kei Hesukrístu, le hachügüdina, lunti hafalaruni ladundehan Úguchili, gúnfuli hagíame lau lugundan (1 Ko 15:23-28; ariha huméi giñe alma; inmortalidad).
29 LIDAN GÁDÜRÜ-HATI DARÍ 5 LIDAN SEINGÜ-HATI
ARUFUDAHANI GEBEGITI TÍDANGIÑETI BÍBÜLIA | 2 KORINTUNA 1-3
“Aranseñu liña [Heowá] lun líchugun gurasu woun”
“Hayahua hama ha ayahubaña”
4 Súfuri laali giñe Wáguchi le gudemehabubei hounwen gürigia ha hínsiñetiña lun saragu kéiburi Abüraámü, Isaakü, Hakobu, Moisesi luma urúei Dawidi (1 Lur. 12:6-8; Mat. 22:31, 32; Adü. 13:22). Ariñagatu Bíbülia busenhali lan Bungiu lachülürün luéyuri lásaaragüdüniña gürigia lídangiñe óunweni (Hob. 14:14, 15). Lídanme dan ligía, gúndaabaña ani buídubei giñe hátuadi. Haritagua waméi ariha lani giñe Bungiu luriban óunweni le lasufurirubei Liráü. Ariñagatu Bíbülia wéiriti lan meha línsiñe Hesusu lun Bungiu (Mat. 3:17). Siñati ni lun wasaminaruni lanarime igarigu le lasandirubei Heowá (Huan 5:20; 10:17).
“Hayahua hama ha ayahubaña”
14 Ladüga sun katei le, háfuga hénrengu lan woun wasubudiruni kaba lan wariñaga houn ha wéiribaña igarigu. Íbini ítara, ariñagatu Bíbülia: “Ha chúbaña aau, areidaguagüdatiña lau hadimurehan” (Ari. 12:18). Daritiña saragu kristiánugu ida luba lan híchugun gurasu houn amu tidan garüdia Cuando muere un ser querido.a Lau sun lira, lidan saragu dan, buídutimati wafalaruni adundehani le: “Hayahua hama ha ayahubaña” (Rom. 12:15). Ariñagatu aban íbiri hilaali tani weiriei gíritu Gaby: “Lau águiraü narufudei le nasandirubei. Ligía ru lubéi gurasu nun hayahuahan numadagu numa. Lidan lidaani igarigu ligía, masandiraguntina nungua nábugua”.
[Abürüdǘni]
a Ariha huméi giñe arütíkulu “Jesús supo consolar a sus amigos”, tidan garüdia La Atalaya to lánina 1 lidan unsu-hati, irumu 2010.
Darí wamá pérüla lánina lichú aau
w16.04-S páh. 32
Álügüdahani burí le hadügübei aliihatiña
Katoun san “daüguaü” luma makü le líchugubei Bungiu houn kristiánugu anuadirúaaña? (2 Ko. 1:21, 22).
▪ Daüguaü. Según aban ariñahani, yúsuati dimurei güriegu le ásügürawagüdübei tidoun Traducción del Nuevo Mundo kei “daüguaü” tidan 2 Korintuna 1:22 lun “layanuhóun luagu katei lánina lúrudu luma alugurahani”. Ani mini lan “furumiñeti fáyeiti, katei le ichugúbei lun lareidún, katei le ichugúbei lubaragiñe dan, lachoururúniwa lichugúba lan fáyeiti, le adügübei lun lañuurun aban daradu o lun larufudúniwa lagañeihóuba lan aban katei, le gayaraabei larufudún ligibugiñe lúrudu danme lamuriahóun katei ligía”. Dan le lanuadirún aban kristiánu lau sífiri sandu, ítara liña kamá hamuga leresibiruña aban “daüguaü”. Gama lumoun, kei lariñaguni 2 Korintuna 5:1-5, resibi lumuti fáyeiti o sun lafayeiruaha dan le leresibirún aban úgubu le siñati lañaladun sielu. Ani aban fánreinti lídangiñe hafayeiruaha úgubu le móunwedadibei (1 Ko. 15:48-54).
Lidan iñeñein güriegu le ayanuhóubei uguñe weyu, yúsuati aban dimurei le yarafaguati luma le dan le layanuhóun luagu bagü le líchugubei wügüri tun ladari dan le lamuriahan maríei tuma. Buiti dimurei lira lun layanuhóun hawagu kristiánugu anuadirúaaña lugundun hádangiñetiña ha lúnbaña ítara hamá lun Kristu kei aban weiriou (2 Ko. 11:2; Aruf. 21:2, 9).
▪ Makü. Lidan meha binadu dan, yúsuati meha makü lun taseinirúniwa luma lun gebegi tan somu dugumedu to arufudubalin labureme lan ítaga gürigia somu muna o fulasu, o amu burí abürüdǘni ligibugiñe lúrudu. Dan le layusuruni Bungiu lani sífiri sandu lun líchugun aban makü luagu aban kristiánu, ítara liña kamá lamakürüñein lun larufuduni lánihali lan gürigia ligía (Efe. 1:13, 14). Máküwatiña anuadirúaaña ha úaraguatiña lun súnwandan murusun dan lubaragiñe hounwen o lárigiñeme lagumeserun saragu asufuriruni (Efe. 4:30; Aruf. 7:2-4).
w10-S 1/8 páh. 23
Subuditi san hun?
Ka meha uagu layanuha apostolu Pábulu dan le lariñagunbei súnwandan lan lanügǘniwa “lau agañeiruni”?
▪ Lidan 2 Korintuna 2:14-16, abürühati apostolu Pábulu: “Bungiu le anügübaliwa súnwandan lau agañeiruni. Ladüga waweigiñe lasubudiragüdei uganu luáguti Kristu lidan sun fulasu, keisi lirimichúniwa íhemeni buiti”. Ani ariñagati giñe: “Lugundun ítara waña kei kupali le lágudagubei Kristu lun Bungiu; haganagua ha lúnbaña hasalbarun hama ha eferidirubaña, houn ha meresibirunbalin uganu ligía, ítara liña kei aban íhemeni le gáfarahati; anhein houn ha eresibirubalin, ítara liña kei aban íhemeni le íchuguti ibagari”.
Katei meha san “agañeiruni” ligía? Layanuhaña meha Pábulu luagu hechun rómana ha meha efeduhabalin hagañeirun súdaragu lau burí lanarime afileihani lun híchugun uéiriguni houn hábutigu. Lidan burí fedu ligía arufudaha hamutiña burí háganiñu luma burí katei le hagidarubei hawéi, lidan añahán lan gürigia apouhei háhabu o agúaraha lun híchugun uéiriguni houn súdaragu luma lun hábuti. Gumuti meha efeduhani ligía lau háfarawagun bulu bágasu —hameme afileihabaña ñein— ani liibe-agei dan, lau giñe háfarawagun saragu hádangiñe áganiñu ha hárügüdübaña.
Ka méhati labusenrubei apostolu lariñagun dan layanuhanbei luagu ítara liña lan líhemen Kristu “keisi lirimichúniwa íhemeni buiti” le mínibei ibagari houn fiu luma óunweni houn amu? Ariñagatu aban líburu “háfuga lan lídangiñe hechun rómana lánina lagudahóun kupali sun dan le lidurabei afileihani” liabin dimurei le ayusurúbei lidan hénpulu le. Ariñagatu giñe: “Ítara liña meha íhemeni ligía houn ha agañeirubaña kei líhemen agañeiruni, ánheinti houn adaürǘtiña ítara liña meha kei íhemeni luáguti másiña lan hafarúa lan hilagubei” (The International Standard Bible Encyclopedia).