“Ítarameme humá deregüdagu lidan hafiñen”

1, 2. Ida liña genegegua hamá kristiánugu tuma muna íñutu to uburuguboun Tokio? (1 Korintuna 15:58).

LIDAN lagumuchagüle irumu burí 1970 aba tábunawagun aban muna to ǘrüwabei wein fuló tíñun uburugu Tokio (Hapón). Dan le hásügürün gürigia tubadugiñe aba hálügüdagun houngua anhein tawandubei lubéi hárabaganali le kamanibei ñein. Gama lumoun, ka hadügübei ha adügübarun? Adüga hamutu lun derebugu tan lun tawanduni ahinhani. Wagía kristiánugu ítara waña kei muna íñutu to. Ida?

² Lau sun mosu lan derebugu lan gürigia le eseriwidubei lun Heowá, mosu giñe aranseñu lan lun ladügün asansiruni dan le mégeiwa lan. Luéigiñe aban oubaü, mosu úaragua lan lun lafalaruni ladundehan luma lilurudun Heowá (aliiha huméi 1 Korintuna 15:58). Mosu giñe aranseñu lan lun ‘gaganbadi’ lan lun Bungiu ani moun lumuti lun ladüraaguni adundehani tídangiñeti Bíbülia. Luagu le ábanya oubaü, lunti ‘gálumañu’ lan, mini lan le, aranseñu lan lun ladügün furumiñeguarügü katei, dan le gayara lan o dan le mégeiwa lan (Sant. 3:17). Anhein wariha katei lau lubudubu marabachunbadiwa luagu ni aban oubaü, ni lun deregüdaya wamá ni lun húaliya wamá. Lidan aturiahani le warihubei ka lan idan lunti lan derebugu wamá. Wayanuhaba giñe tuagu seingü sádara to layusuruboun Mafia lun louchun ledebilidagüdüni úaraguni le warufudubei lun Heowá luma ida luba lan wagagibudagun tuma.

KA IDA LUNTI LAN WARUFUDUN ÚARAGUNI?

3. Ka lúrudu líchugubei Heowá woun le adarúbei lidan Adügaü 15:28, 29?

³ Heowá ligía Íchuguti lúrudu le Íñutimabei ani súnwandan líchugun lúrudu furanguti houn lumutuniña (Isa. 33:22). Kei hénpulu, ayanuhati musu úaraguati le lánina furumiñeti sígulu luagu ǘrüwa katei le ídanbei lunti lan harufudun kristiánugu úaraguni. 1) Lun máhuduragun wamá houn guáriua, lun lúnrügü lan Heowá wáhuduragua, 2) lun inebe lan hitaü woun lugundun aban lan katei sagüráuti, ani 3) lunti lan wagunfulirun lau liñun lúrudu le tídanbei Bíbülia le ayanuhabei luagu agamariduni (aliiha huméi Adügaü 15:28, 29). Ida luba warufudun úaraguni lidan ǘrüwa katei le uguñe weyu?

4. Ka mini lubéi lúnrügü lan Heowá wáhuduragua? (Arufudúni 4:11).

⁴ Máhuduraguntiwa houn guáriua lúnrügüñein Heowá wáhuduragua. Ariñagati Heowá houn ísüraelina lun lúnrügü lan háhuduragua (2 Lur. 5:6-10). Ani dan le lóuchagunbalin Mafia Hesusu, furanguti lariñaguni Hesusu lúnrügüba lan Heowá wáhuduragua (Mat. 4:8-10). Ligía máhuduragun wabéi houn guáriua. Manügün wamuti giñe ni aban gürigia kei bungiu, ni alidihatiña relihión, ni polítiku ni gürigia ha gáhureraditimatiña ni eremuhatiña o katei líbeina lira. Lubaragiñe lira, aba woudin luéigiñe lóubadina Heowá, le Adügübalin sun katei ani lúnrügüñein wáhuduragua (aliiha huméi Arufudúni 4:11).

5. Ka uagu inebe lubéi ibagari luma hitaü woun kei aban katei sagüráuti?

⁵ Inebeti ibagari luma hitaü woun lugundun aban lan katei sagüráuti. Ka uagu? Ladüga ariñagati Heowá lídanñein lan hitaü ibagari ani aban lubuidun idewesei ibagari lúmagiñeti Heowá (Fad. 17:14). Dan le lígirunbei Heowá luagu furumiñe wéiyaasu lun heigin gürigia hágürü animaalu, wéridi lumutiña lun meigin hamani lita (Agu. 9:4). Ani dan lárigiñe, águyuguagüda lumuti dimurei le dan le líchugunbalin Lilurudun Moisesi houn Ísüraelina (Fad. 17:10). Ani lidan furumiñeti sígulu, adügati Heowá lun líchuguni musu úaraguati gumadi le houn sun kristiánugu lun inebe lan hitaü houn (Adü. 15:28, 29). Falá wamuti gumadi le lau úaraguni lidan katei luáguti agaranihani.b

6. Ka katei lunbei líderaguniwa lun gaganbadi wamá lun liñun lilurudun Heowá luáguti laruman ibagari?

⁶ Áfaaguatiwa lun wagunfulirun lau liñun lilurudun Heowá luáguti agamariduni lau úaraguni (Ebü. 13:4). Ru lumuti apostolu Pábulu adundehani le woun: “Ígira huméi sun le higaburibei le láninabei ubóu le”. Lau dimurei le ínchaha lumutiwa apostolu Pábulu lun wóuserun lau úaraguni gayara láamuga wadisedun luéi luriban ayumahani. Kei hénpulu, marihintiwa ani madügün wagía ni kata le gayaraabei lanügüniwa lidoun magíaguni (Kol. 3:5; Hob. 31:1). Ani dan le wóuchawagun máhatiwa lun furumiñeguarügü saminaü le gayaraabei lagadeiruni wamadagua luma Bungiu.

7. Ka katei lunbei wadügüni, ani ka uagu?

⁷ Busenti Heowá lun gaganbadi wamá ‘tau sun wanigi’ (Rom. 6:17). Súnwandan barüti ladundehan saragu buiti woun ani siñati wasansiruni lilurudun Heowá (Isa. 48:17, 18; 1 Ko. 6:9, 10). Busentiwa wadügüni sun wayaraati lun wagundaaragüdüni Heowá luma lun aban lan wagaburi kei ligaburi abürühati sálumu le ariñagubei: “Rúguaadina nungua tau sun nanigi lun nagunfuliruni bilurudun, lun súnwandan darí lumoun lagumuhóun” (Sal. 119:112). Subudi wamuti lóuchuba lan Satanási lun ledebilidagüdüni úaraguni le warufudubei lun Heowá. Ka burí sádara layusuruboun?

KA SÁDARA LAYUSURUBOUN MAFIA LUN LEDEBILIDAGÜDÜNI ÚARAGUNI LE WARUFUDUBEI LUN HEOWÁ?

8. Ida liña layusuruni Mafia éibaahouni lun ledebilidagüdüni úaraguni le warufudubei lun Heowá?

⁸ Éibaahouni. Agayuahati Mafia wawagun dandu luagu wágubu kei luagu wasaminan lun ledebilidagüdüni úaraguni le warufudubei lun Heowá. Le labusenrubei libihin lun lagünrinchaguni wamadagua luma Heowá (1 Fe. 5:8). Síadiwatiña kristiánugu lánina furumiñeti sígulu buleseiwa hagía ani áfarawagua hagía hilagubei ladüga úaraguni le harufudubei (Adü. 5:27, 28, 40; 7:54-60). Uguñe weyu yusu lumuti giñe Mafia éibaahouni. Arufuda lumuti furundei le, lau ligaburi houserún wábirigu ha awinwandubaña Rusia hama ha awinwandubaña lidan amu burí ageiraü. Ani saragu hádangiñe wábirigu hagagibudaguña luma ámuñegueinarügü luwuyeri éibaahouni.

9. Afuranguagüda huméi lau aban hénpulu ka lan uagu lunti lubéi agagudúañu wamá tuéi sádara to aramudaguatu.

⁹ Ladügüdarun wawagu lábugiñegua. Mama éibaaharügü lumutiwa Mafia, yúsuti giñe sádara to aramudaguatu (Efe. 6:11). Ariha waméi le asuseredubei lun Bob, wéiriti meha lisandi ani mégeiti meha libugún. Ariñagati houn surusiagu mabusenrun lan lichugún hitaü luagu. Ábati lariñagun surusia lun míchugunbei lan hitaü luagu. Gama lumoun, guñoun lubaragiñe libugún lárigiñe houdin liduheñu aba lidin amu surusia arihei Bob. Ariñagati lun másiña lan míchubaña lan hitaü luagu, lau sun lira aniheinbei lan hitaü hama luéidügü hemegeiruni. Másiñati samina lan surusia le lasansirubei lan Bob lisaminan ladüga úaaña lan buga liduheñu Bob ñein. Lau sun lira úaraguati Bob ani ariñagati máhabei lan lun hitaü meberesenga le asusereduti.

10. Ka uagu dencha lubéi ligaburi hasaminan gürigia ha meseriwidunbaña lun Heowá? (1 Korintuna 3:19, 20).

¹⁰ Ligaburi hasaminarun gürigia. Ánhawa agumesera asaminara kei gürigia ubouaguna gayaraabei ladügün katei le lun wíchuguni wanagan luagun Heowá luma lun wadüraaguni liñun lilurudun (aliiha huméi 1 Korintuna 3:19, 20). Liibe-agei dan, ádaha lumutiwa “lichú aau le lánina ubóu le” lun maganbadi wamá lun Heowá. Ariha waméi le asuseredubei lun damuriguaü le Pérügamubei luma lun le Tiatirabei. Añahein meha kristiánugu ígiraguagüdatiña houngua lun échuni le meha geyegubei hau, kéiburi magíaguni luma láhudurawagun houn guáriua. Ererehati Hesusu lun bián damuriguaü le ladüga hánharun lun magíaguni ñein (Aruf. 2:14, 20). Uguñe weyu másiñati houchun gürigia ha geyegubaña wau lun wánharun lun ligaburi hasaminan. Másiñati hálugun hádangiñe waduheñu o gürigia ha wasubudiragun hínchahaniwa lun wíchugun ugundani wóuniwagua luma lun wadüraaguni lilurudun Heowá. Háfuga hariñagun woun mariban lan wíchugun ugundani wóuniwagua luma luagu sügühali lan lúrudu le tídanbei Bíbülia.

11. Ka katei moun lubéi lun wadügüni?

¹¹ Anihein dan másiñati wasaminarun lunti lan furangutima lan adundehani le burí líchugubei Heowá woun. Másiñati busenbadiwa lan wadügün somu katei le gayaraabei ladügün lun woudin “yagürounméme luéi le bürüwañubei” (1 Ko. 4:6). Lidan meha lidaani Hesusu héiguatiña meha ha alidihabarun relihión lidoun figóu le. Aba meha híchugun lanwoun Lúrudu ani gumadi le meha hasagahabei houngua aban méhati ihürügu lira houn sun gürigia (Mat. 23:4). Ánheinti Heowá ruti adundehani furanguti woun tídangiñe Lererun luma tídangiñe lóundarun. Memegeirunti wíchugun ni kata lanwoun (Ari. 3:5-7). Ligíati mídintiwa yagürounméme luéi le bürüwañubei tidan Bíbülia michu wamuti giñe le wasaminarubei lanwoun.

12. Ida liña layusurun Mafia saminaü le mama inarüniti?

¹² Saminaü mabuidunti. Yusu lumuti Satanási “arufudahani málati”, luma “échuni luma burí ligaburi haritagun gürigia lánina ubóu le” lun leyeeduniña luma lun lafanreinraguagüdüniña gürigia (Kol. 2:8). Kéiburi, lidan furumiñeti sígulu yusu lumuti hasaminan wügüriña luma ámuya saminaü ubouaguna, harufudahan huríu le mébunabei tidan Bíbülia, lúmati afiñeni luáguti lunti lan hafalaruni kristiánugu Lilurudun Moisesi. Aban meha saminaü mabuidunti lira ladüga adügati meha lun meteni hamá lun lichú aau inarüniti le ñǘbuinbei lúmagiñe Heowá. Uguñe weyu yúsuti Satanási radiu, bigibigitu luma Interneti o katei líbeina lira lun laburuchaguagüdün ariñahani luma ñunsu le mama inarüniti le ñǘbuinbei hámagiñe polítiku. Lidan lidaani sandi COVID-19 buruguagüdatiña saragu ariñahani le mama inarüniti.c Gefentiña luagu Heowá ha afalarubalin adundehani le tíchugubei lóundarun Heowá mábürühantiña lidoun turobuli ni lidoun saragu idiheri le ñeinhin lubéi hábürüha saragu gürigia ha íchugubaña arigei lun burí ariñahani mabuidunti (Mat. 24:45).

13. Ka uagu moun lumuti lubéi wígirun lun ua lan ni kata eberesehawa luéi wadügüni le buídubei ?

¹³ Katei le gayaraabei ladireiruni wasaminan. Moun lumuti wadireiruni warihin luéi “katei le buídubei” (Fili. 1:9, 10). Katei le adireirubalin wasaminan gidá lumuti wadaani, direi lumuti giñe wasaminan luéi wetenirun lun katei le súdinitimabei. Gayaraati giñe ladügün katei le lánina sagü weyu kéiburi eiga, ata, wásügürün dan lidan isebáhari luma lidan wadagimanu lun lúnrügü lan katei le wetenira lidan wabagari (Luk. 21:34, 35). Lanwoun lira kamanitimahali sigenei luáguti le hemegeirubei gürigia luma luáguti polítika. Moun lumuti lun wígirun lun ladireiruni katei le wasaminan. Le lunbei wadügüni lun midin wamá luéigiñe lóubadina ni aban ni lidan wasaminan. Yusu lumutu Satanási seingü sádara to lun ledebilidagüdüni wabusenrun wadügüni buiti le anúadira wamaalibei tidan wanigi. Ariha waméi le gayaraabei líderaguniwa lun wagagibudagun luma katei le luma lun úaragua wamá.

KA LUNBEI WADÜGÜNI LUN ÚARAGUA WAMÁ?

14. Kaba íderaguawa lun werederun luéigiñe lóubadina Heowá luma lun úaragua wamá lun?

¹⁴ Samina wamá ka lan uagu wederegerei wabagari lun Bungiu ani badisei wagía. Wadügünbalin lira ladüga busén wamá woudin luéigiñe lóubadina Heowá. Haritagua huméi ka lan íderagubadün achoururei anihán lan inarüni. Aba hasubudiruni Heowá, ani aban harihini kei Húguchi Bungiu le siélubei inebe ligía hun ani hínsiñe ligía hun. Ábati laganwoundun hafiñen luagu ani ínchaha lumutün katei le lun hasakürihan lídangiñe hifigoun. Aba hígiruni hadügüni katei le mínsiñebei lun Heowá ábati hagumeserun adügei katei le hínsiñebei lun. Aba hasandirun aban óunwenbu awalidaguni lau harihini luagu feruduna laadün lan Bungiu (Sal. 32:1, 2). Ábati hagumeserun abasiiha adamuridagua ani aba giñe hayanuhan houn amu luagu lubuidun burí katei le hafurendeirubei. Guentó kei ábanhadün lan kristiánu le deregeguaali lungua lun Bungiu ani badisei huguya héibuguña luéigiñe lémeri ibagari ani aranseedün lun mígirun humani (Mat. 7:13, 14).

15. Ida liña líderaguniwa waturiahanu Lererun Bungiu ani ráramagua wagía asaminara luagu le waturiahabei?

¹⁵ Aturiaha wamóun Lererun Bungiu ani ráramagua wamá asaminara luagu le waturiahabei. Aban tídibu wewe mégeitu lun lidin tílagüle guribini lun gayaraabei lan derebugu tan. Ítarameme, mégeitiwa giñe lun derebugu lan wafiñen tuagu Lererun Bungiu lun gayaraabei lan wakipurun úaraguni. Eibu aweirideina lan tídibu wewe ábuneina liña tílagüle ani árügüdeina ligía lau lere lidan múa. Dan le waturiahanu Lererun Bungiu ani ráramagua wagía asaminara luagu le waturiahabei ábatima lederebugudun wafiñen, aba wachoururuni larufudahan lan Bungiu buídutimabei (Kol. 2:6, 7). Ráramagua wamá asaminara hawagu lubúeingu Heowá ha lánina binadu dan ha asagarubaña buiti lídangiñe ladundehan, leweridihan luma lóunigiruniña. Kéiburi dan le letenirunbei Esekiéli buidu buidu lun aban ánheli lidan aban arufudúni dan meha le lamisurahanbarun ánheli ligía ténpulu. Derebugüda lumuti arufudúni le lafiñen Esekiéli, ani arufudahati giñe woun ida luba lan inebe lan lilurudun Heowá woun luáguti áhuduraguni inarüniti (Ese. 40:1-4; 43:10-12).d Íderagua lumutiwa giñe saragu lun wasagarun dan lun waturiahan luáguti katei huliliti le tídanbei Lererun Bungiu luma lun wararamagun asaminara luagu.

16. Ka íderagubalin Bob lun úaragua lan? (Sálumu 112:7).

¹⁶ Úaragua tan wanigi. Lidan aban uremu, ariñagati urúei Dawidi luagu maweiyasunbei lan ígirei línsiñehabu Bungiu. Ariñagati lidan uremu ligía: “Aranseñutiña nanigi, Nubungiute” (Sal. 57:7). Gayaraati giñe úaragua tan wanigi ani afiñen wagíame luagu Heowá sunsuinagubei (aliiha huméi Sálumu 112:7). Gararaguaya wamá luagun likesin Bob, le uágubei wayanuha lidan párafu 9. Ka íderagubalin lun úaragua lan? Dan le hariñagunbei lun ñeinbei lan hitaü luéidügü hayusuruni, aba lóunabun, anhein ítara luba lubéi nídiba yáagiñe. Ariñagati Bob: “Chouru numuti le nariñagubei ani manufudetina luéi le lunbei lasuseredun”.

17. Ka wafurendeirubei lídangiñe lásügürün Bob? (Ariha humóun giñe iyawaü)

¹⁷ Magurabahanti Bob lun háspitalirugu lan lun gayaraabei lan larufudun úaraguni. Subudi laali kaba lan ladüga lubaragiñe lebelurun háspitalirugu. Furumiñe, le labusenrubei lun lagundaaragüdüni Heowá tídangiñe sun lanigi. Libiaman, aturiaha lumuti le tariñagubei Bíbülia tuma wani agumeiraguagüdüni to ayanuhaboun luagu sagüráu lan ibagari luma hitaü. Lagumuhóun, chouru lumuti meha líchuguba lan Heowá lafayeiruaha anhein agunfulira lau lilurudun. Ítara kei Bob, gayaraati úaragua wamá danme le wagagibudagun luma furumiñeguarügü óuchawaguni le ñǘbuinti.

18. Ka larufudahabei lani Barakü hénpulu woun? (Ariha huméi giñe dibuhu le luágubei tidáü garüdia).

¹⁸ Afiñe wamá luagu Heowá. Samina wamá luagu aguseragüdüti Barakü luma luagu lubuidun lidin lun lau lafalaruni ladundehan Heowá. Dan meha ligía, maranserungiña meha ísüraelina lun houdin awuribuha. Úati meha ni aban idaüdinaü hama ni arufun. Íbini ítara aba lariñagun Heowá lun Barakü lun lidin awuribuha luma Sísara luma hama lisudaranigu ha kananna, ha meha gíbeboun áruma hama (Ali. 5:8). Ariñagatu Débora, to profeta lun Barakü lun lararirun luéigiñe wübü Taworu lun gayaraabei lan lagagibudagun luma Sísara luma hama lisudaranigu ha tídanbaña 900 karü. Íbini buídutima lan téibaagun karü lidan fulasu wayati, gaganbaditi Barakü. Lidan añaha lan súdaragu ararira luéigiñe wübü, aba lóunahan Heowá aban lanarime huya. Aba táhürüdagun karü lidan baribarabu ani aba ladügün Heowá lun lagañeiruni Barakü wuribu (Ali. 4:1-7, 10, 13-16). Gayaraati giñe lariñawagúniwa ligiaméme wawagu: Ladügüba Heowá lun wagañeirun ánhawa afiñera luagu ani sigí wameime adundehani le tíchugubei lóundarun woun (2 Lur. 31:6).

ÚARAGUA WAMÁ SÚNWANDAN

19. Ka uagu busén hubéi hasigirun arufuda úaraguni?

¹⁹ Sun anihagua lanme ubóu le lunti wasigirun áfaagua lun úaragua wamá (1 Tim. 6:11, 12; 2 Fe. 3:17). Mígira wamá lun ladügün éibaahouni, ni ladügüdarúniwa wawagu lábugiñegua, ni ligaburi hasaminan gürigia, ni saminaü mama inarüniti lun ladireirun wasaminan luéi le súdinitimabei (Efe. 4:14). Ítarameme wamá deregüdagu lidan wafiñen ani aranseñu súnwandan lun hínsiñe lan Heowá woun luma lun gaganbadi wamá lun lilurudun. Ani ítarameme, lunti giñe aranseñu wamá lun gunfuranda wamaniña amu luma lun wadügüni asansiruni le mégeiwabei. Lidan leweñegua aturiahani warihibei ida luba lan wáyeihani Heowá luma Hesusu ha gufunrandatimabaliña amu.