Ka mini lubéi badisei?

Óunabagülei le tíchugubei Bíbülia

Dan le labadiseirúniwa aban gürigia, aba labuluchagüdǘniwa dúnarugun lárigiñe aba lasagarún.a Ayanuhatu Bíbülia hawagu saragu gürigia ha abadiseirúbaña (Adügaü 2:41). Anihein labadiseirun Hesusu hadan, le abuluchagüdüwabei lidan duna Hordán (Matéu 3:13, 16). Fiu irumu lárigiñe, badiseiwati aban wügüri etiopíana dan le layarafadunbei lun aban fulasu le ñein lubéi saragu duna, yarafa lun üma dan le laweiyasuhanbei (Adügaü 8:​36-40).

Arufudahati Hesusu anhein lan busén lubéi aban gürigia ladügagun lungua lánime disipulu, mosu labadiseirun (Matéu 28:19, 20). Afuranguagüda lumuti apostolu Féduru arufudahani le woun (1 Féduru 3:21).

Lidan ariñahani le, lounabúba álügüdahani burí le:

• Ka mini lubéi badisei?

• Arufudahatu san Bíbülia mosu lan habadiseirun irahüñü ha figigiña?

• Ka mini lubéi dimurei badisei humaña lidan liri Úguchili, Isaani luma lidan liri sífiri sandu?

• Aban san figóu lunya labadiseirun aban gürigia?

• Amu burí badisei le uágubei tayanuha Bíbülia

• Saminaü burí charati luáguti badisei kristiánu

Ka mini lubéi badisei?

Dan le labadiseirun aban gürigia larufuduñein hagibugiñe amu, asakürihaali lan lídangiñe lifigoun ani ariñaga laali lan lun Bungiu ladügübei lan lubalinti íbini laganagua lénrengunga. Mini lan lira, gaganbadibei lan lun Bungiu luma lun Hesusu súnwandan. Badisei, ligía furumiñeti katei le lunbei ladügüni aban gürigia lun lawinwandun lun súnwandan.

Dan le labuluchagüdǘniwa aban gürigia sunsuinagubei lidoun duna, mini lan asansiruni le adüga láalibei lidan libagari. Tidan Bíbülia, góubaguagüdawati badisei luma ábunahani (Rómana 6:4; Kolosana 2:12). Dan le lebelurun gürigia lidoun duna, ítara liña kamá hamuga lóunweña binadu ligaburi labagaridun ani dan le láfuridun dúnarugugiñe, ítara liña kamá hamuga lagumeseruña aban iseri ibagari keisi kristiánu le deregeguaali lungua lun Bungiu.

Arufudahatu san Bíbülia mosu lan habadiseirún irahüñü ha figigiña?

Tidan Bíbülia, úagubeiti saminaü ani marufudahantu mosu lan habadiseirúniwa irahüñü figigiña.b Ariñagatu lubaragiñe lan labadiseirún aban gürigia mosu ladügün fiu katei. Kei hénpulu, mosu gunfuranda lani fiu arufudahani súdiniti le tídanbei Lererun Bungiu ani winwan ligíame úara luma le lafurendeirubei. Mosu giñe lasakürihan lídangiñe lifigoun luma lun lederegeragun lungua lidan furíei lun Bungiu (Adügaü 2:38, 41; 8:12). Siñati hadügüni irahüñü figigiña ni aban lídangiñe katei burí le.

Ka mini lubéi dimurei badisei humaña lidan liri Úguchili, Isaani luma lidan liri sífiri sandu?

Ru lumuti Hesusu gumadi le houn lani disipulugu: “Heiba lubeiti áluaha gürigia ha lílana sun néchani ani ábame híderaguniña lun nani hamá disipulugu. Badisei humaña lidan liri Úguchili, liri Isaani luma lidan liri sífiri sandu. Arufudaha humá houn lun gaganbadi hamá lun sun le nariñagubei hun” (Matéu 28:19, 20, TNM). Lau labadiseirun aban gürigia lidan liri Úguchili luma lidan liri Isaani, arufudati anha lan lun hagumadin luma lun habara. Ani dan le labadiseirun aban gürigia lidan liri sífiri sandu, arufudati gunfuranda lani ida liña lan layusuruni Bungiu lani sífiri sandu lun lagunfuliruni lugundan. Kei hénpulu, yusu lumuti Féduru dimurei lidan liri lubaragiñe meha lareidaguagüdüni aban wügüri méibugunti lúmagiñe lágurahoun. Aba lariñagun apostolu Féduru lun: “Lidan liri Hesukrístu le Nasarétüna, saraba, béibuga” (Adügaü 3:6). Ka uagu layusurei Féduru dimurei le? Lugundun ánhati lun lubara Kristu ani ariñagati lau lan lubafu Hesukrístu ladügei milaguru le.

• Le mini lubéi “Úguchili” mini lan Heowác Bungiu, le adügübaliwa ani ligía Bungiu létima gabafubei (Agumesehani 17:1; Arufudúni 4:11).

• Le mini lubéi “Isaani” mini lan Hesukrístu, le íchugubalin libagari wawagu (Rómana 6:23). Lun wasalbarun mosu gunfuranda wamani ka lan ligaradanboun Hesukrístu lidan le labusenrubei Bungiu ladügün houn gürigia ani anha wagíame lun (Huan 14:6; 20:31; Adügaü 4:8-12).

• Le mini lubéi “sífiri sandu”, lubafu Bungiu o erei le layusurubei lun lagunfuliruni lugundan.d Yusu lumuti Bungiu lani sífiri sandu lun ladügüni sun le aniheinbei, lun líchugun ibagari, lun líchugun ariñahani houn lani profetagu luma houn amu gürigia lun líchugun erei houn, gayara láamuga hadügüni lubalinti (Agumesehani 1:2; Hobu 33:4; Rómana 15:18, 19). Yusu lumuti Bungiu lani sífiri sandu lun lasubudiragüdüni lisaminan houn fiu wügüriña ha abürühabarun Bíbülia (2 Féduru 1:21).

Aban san figóu lunya labadiseirun aban gürigia?

Eibu lásügürün dan, sansi hamuti gürigia hani relihión. Lau sun lira, anhein busén lubéi aban gürigia le badiseihalibei lunya labadiseirun, lafigouhaña san lau ladügüni lira? Hariñaguña hamuga fiu gürigia anha lan, ladüga ligaburi gunfuranda hamani Éfesuna 4:5, le ñein lubéi lariñaga anihein lan “aban Aburemei, aban afiñeni, aban badisei”. Gama lumoun, según bérusu le úati mini lan siñati lan labadiseirunya aban gürigia. Ida liña wasubudiruni?

Dimurei burí le lubaragiñebei bérusu le luma le lárigiñebei. Lidan bérusu burí le lubaragiñebei Éfesuna 4:5, layanuhaña Pábulu luagu súdiniti lan úarani. Mosu úara hamá kristiánugu inarünitiña lidan le hafiñerubei (Éfesuna 4:1-3, 16). Ñeinbei úarani haganagua, anhein hafalara ligiaméme Aburemei, Hesukrístu; ani anhein ligiaméme lubéi hafiñen, lidan amu dimurei lun ábanmeme lan ligaburi gunfuranda hamani le tarufudahabei Bíbülia; ani anhein gúnfuli habéi lau le tariñagubei Bíbülia luagu le mégeiwabei lun habadiseirun.

Kei hénpulu, ínchaha lumutiña apostolu Pábulu fiu gürigia ha meha badiseihaña lunya habadiseirun. Lugundun lubaragiñe habadiseirun úati meha gunfuranda hamani buidu buidu le tarufudahabei Bíbülia (Adügaü 19:1-5).

Badisei le buídubei ligibugiñe Bungiu. Anhein busén wabéi lun lánharun Bungiu lun wabadiseirun, mosu wafurendeirun ani gunfuranda wameime le tarufudahabei Bíbülia (1 Timotéu 2:3, 4). Anhein badisei lubéi aban gürigia lárigiñebei lafurendeirun ariñahani le múaranti luma le tariñagubei Bíbülia, mebegiti badisei ligía ligibugiñe lagu Bungiu (Huan 4:23, 24). Háfuga adüga lani gürigia ligía lau sun taruman lanigi, gama lumoun “mama kei lubudubu” (Rómana 10:2). Lun lánharun Bungiu lun aban gürigia mosu lafurendeiruni inarüni le tídanbei Bíbülia, falaleime lidan libagari, deregegua ligíame lungua lun Bungiu, ábayameti labadiseirun. Ítarati, mámabei aban figóu lunya labadiseirun. Lubaragiñe lira, buídubei ligibugiñe lagu Bungiu.

Amu burí badisei le uágubei tayanuha Bíbülia

Tidan Bíbülia ayanuhóuati luagu burí badisei le ámubei luéi le meha hadügübei lubúeingu Kristu ha meha abuluchagüdünbáliña gürigia dúnarugun. Ariha wama fiu hénpulu lídangiñe:

Badisei le meha ladügübei Huan le Abadiseihabei.e Dandu huríu hama gürigia ha adügagubaña houngua huríume ha meha ñǘdünbaña lun labadiseiruniña Huan, adüga hamuti lun harufuduni asakürihaaña lan ladüga maganbadi hamá lun Lilurudun Moisesi (lúrudu burí le líchugubei Bungiu lun Moisesi lun hafalaruni ísraelina). Íderagua lumutiña meha badisei le ladügübei Huan gürigia lun hasubudiruni Hesusu le Nasarétüna luma lun hánharun lun keisi Mesíasi (Lúkasi 1:13-17; 3:2, 3; Adügaü 19:4).

Labadiseirun Hesusu. Aba labadiseiruni Huan le Abadiseihabei Hesusu. Lau sun lira, mítaranti badisei le kei le líbiri badisei. Ka uagu? Ladüga mafigounti Hesusu ani machara ligía (1 Féduru 2:21, 22). Memegeirunti meha lasakürihan ni lun larufuduni “luagu harumaaru tan [l]anigi ligibugiñe Bungiu” (1 Féduru 3:21). Le linarün katei, aba labadiseirun lun larufuduni aranseeli lan lun ladügüni lugundan Bungiu lun ligía lan Kristu o Mesíasi le füramasewaalibei luma lun lederegeruni libagari wawagu (Ebüréu 10:7-10).

Badisei lau sífiri sandu. Dandu Huan le Abadiseihabei kei Hesusu ayanuhatiña luagu badisei lau sífiri sandu (Matéu 3:11; Lúkasi 3:16; Adügaü 1:1-5). Mítaranti badisei le kei badisei lidan liri sífiri sandu (Matéu 28:19). Ka uagu?

Fiúrügüñanu hádangiñe lubúeingu Hesusu abadiseirúa lau sífiri sandu. Anuadirúaaña kristiánugu ha lau sífiri sandu lun houdin eseriwida úara luma Kristu sielu ani seriwi hagía kei fádirigu ha lúnbaña harúeihan ligibuagu Ubóuf (1 Féduru 1:3, 4; Arufudúni 5:9, 10). Lábugiñe harúeihan, harúeihaba hawagu saragu míñunu gürigia úaraguatiña ha hemenigitiña lun hawinwandun lidan aban paraísu lun súnwandan ya ubouagu (Matéu 5:5; Lúkasi 23:43).

Badisei lidan aban luma Kristu Hesusu luma badisei lidan lounwen. Ha abadiseirúbaña lau sífiri sandu badiseitiña giñe lidan “aban luma Kristu” (Rómana 6:3). Ligíati, resibi hamuti kristiánugu anuadirúaaña ha afalarubalin Hesusu badisei le, lidan amu dimurei, ha lúnbaña harúeihan luma Hesusu sielu. Aba lidan hamá aban luma Hesusu, Hesusu lichügüdinabei damuriguaü kristiánu ani hagía ítara haña kei lúgubu (1 Korintuna 12:12, 13, 27; Kolosana 1:18).

Badiseitiña giñe kristiánugu anuadirúaaña “lidan lounwen [Hesusu]” (Rómana 6:3, 4). Áyeiha hamuti Hesusu, ladüga adügatiña saragu sákürifisiu lidan habagari lau gaganbadi hamá lun Bungiu, ani aba hánharun luagu mawinwandunbaña lan ubouagu. Gumuti lagunfulirun habadiseirun lidan lounwen Kristu dan le hounwen ani aba háguyuguagüdüniwa lun hawinwandun sielu (Rómana 6:5; 1 Korintuna 15:42-44).

Labadiseirún lau watu gemeti. Ariñagati Huan le Abadiseihabei: “Ánheinti le [Hesusu] lunbei liabin nárigiñe, gabafutimaati nuéi ani madünatina ni lun naragachunu ligeidin luéi. Labadiseirubadün lau sífiri sandu luma lau watu gemeti. Anuheinharu chóbuli lúhaburugu lun larumadahani türigu. Labudahabei türigu lun labuachuni tidoun lagei, ánheinti life türigu, lágudubei lidan aban watu le siñati leñeguchún” (Matéu 3:11, 12, TNM). Arufudati dimurei burí le, amu lan badisei lau watu gemeti luéi badisei lau sífiri sandu. Kati mini lubéi dimurei burí le?

Le mini lubéi türigu, gürigia ha aganbubalin Hesusu ani adüga haméi le lariñagubei houn. Gayaraati aban hamá hádangiñe ha abadiseirúbaña lau sífiri sandu. Le mini lubéi sagadi le mábeihali, gürigia ha maganbadibaña lun Hesusu. Habadiseirúba lau watu gemeti, mini lan hagünrinchawaguba lan lun sun dan (Matéu 3:7-12; Lúkasi 3:16, 17).