Biní lumutiña Bungiu ha gaganbadibaña lun

Ariñagati profeta Moisesi labinirubadiwa lan Bungiu ánhawa gaganbadi lun lugumadin (2 Lúrudu 10:13; 11:27). Mama ladüga wanufude luéi labeichuniwa Bungiu gaganbadi wabéi lun. Gaganbaditiwa lun ladüga buidu lan ligaburi ani ínchaha lumutiwa lira lun wasandirun ínsiñeni luagu luma lun mabusenrun wamá wadügün ni kata le adügüti lun lírudun. “Ladügǘniwa le lubeibei Bungiu, ligía ínsiñehabunibei lun” (1 Huan 5:3).

Kábati abiniruni wibiha ánhawa gaganbadi lun Bungiu? Ariha wamá biama.

1. ADÜGATI GAGANBADI WAMÁ LUN BUNGIU LUN LACHUUDUN WAU

Ariñagati Heowá: “Arufudaha numuti le buídubei bun, adundeha numutibu luéigiñe üma le lunbei bafalaruni” (ISAÍASI 48:17).

Bungiu Heowá adügübaliwa, subudi lumutiwa buidu ani ru lumuti adundehani le wemegeirubei woun. Anhein busén wabéi lun líderaguniwa anúadaha buidu, mosu wakutihani tidan Lererun ka lan labusenrubei Bungiu lun wadügüni ani adüga wameime.

2. ADÜGATI GAGANBADI WAMÁ LUN BUNGIU LUN GUNDA WAMÁ

“Fuleseiwatimatiña [o gúndaatimatiña] ha aganbubalin ani adüga haméi le lubeibei Bungiu” (LÚKASI 11:28).

Añahein saragu míñunu gürigia uguñe weyu ha gúndaatiña le tímatimaati ladüga gaganbadi hamá tun Lererun Bungiu. Ariha wamá aban sügǘ: gañi gáñiti meha aban wügüri le awinwandubei Esüpáña, wuribati meha lóuseruniña amu, íbini lani weiriou. Aban weyu, aba laliihani le labürüdübei profeta Moisesi luagu lubuidun ligaburi Hosé, le liráü Hakobu. Alugurúati meha Hosé kei idamuni, dawa ligía furisunrugun madurunga. Íbini ítara, darangilumémeti lóuserun Hosé gudemehabu ligía (Agumesehani, kapítulu 37 darí 45). Ariñagati wügüri ligía: “Ínchaha lumutina nasaminarun luagu ligaburi Hosé lun náyeihan igaburi kéiburi areiduni, gamadóuni luma ragüguaü unguaü. Adügati lira lun gúndaatima lan nibagari hama niduheñu”.

Tidan Lererun Bungiu, dariwati amu burí adundehani luáguti ida luba lan wóuseruniña amu. Wasigiruba afurendeira luagu lira lidan leweñegua arütíkulu.