Íderagua lumutiwa Heowá afuluriha le ñein lubéi wounahóua

Ñǘdünti Mats tuma Ann-Catrin tidan Leskuela Galaadü lidan irumu 1979, ani lidan sun irumu le ásügürübei ounahóuatiña eseriwida Irán, Saire, Tansania, Maurisiu, Uganda luma Mianmarü. Íbiri Jack Redford, aban hádangiñe ha arufudahabaña tidan Leskuela Galaadü, ligía íchugubalin adundehani le houn, aban adundehani le lunbei meha lahuudun houn saragu lugundun hounahóuba meha eseriwida lidan ámuñegueinarügü ageiraü. Ígira wamá lun habahüdahani woun le hásügürübei.

Furumiñe, abahüdaha huméi woun ida liña lan hafurendeiruni inarüni.

Mats: Polonia meha lawinwanda núguchi lidan lidaani Libiaman Wuribu Wéiriti, ani arihati meha saragu mabusigari tidan Ligilisi katolika. Íbini ítara, súnwandan meha lariñagun: “Chouru numuti anuhoun lan aban relihión inarünitu lidan somu fulasu ubouagu”. Lau lásügürün dan, aba níchugun fe linarün lan núguchi. Héchutina meha agañeiha líburu lun naliihan, aban weyu, aba nagañeihan aban líburu díngutu to gíriboun La verdad que lleva a vida eterna. Achawaha lumuti tiri líburu to naritagun, ani aliiha numutu líburu to gúñounmeme ligía darí nagumuchunu. Larugan, aba níchugun fe darina lan inarüni.

Lúmagiñe gádürü-hati irumu 1972, aba níchaagun nungua lun naliihan saragu tídangiñe agumeiraguagüdüni to hadügüboun gefentiña luagu Heowá, aba nadariruni óunabagülei lun saragu álügüdahani le nadügübei tuagu Bíbülia. Aba nasandiragun nungua kei alugurahati le uágubei labahüdaha Hesusu, le lárigiñebei ladarirun aban pérüla le wéiriti lebegi, aba laluguruni sun le lúmabei lun lagañeihani pérüla ligía. Gayaraati nariñagun le lan nadügübei lun nagañeihani “pérüla” lánina inarüni, níchaagun nungua lun neseriwidun lun Heowá lubaragiñe nidin aturiaha tidan luban furendei íñuti lun surusia nan kei meha nabusenruni (Mat. 13:​45, 46). Aba nabadiseirun weyu 10 lidan duusu-hati, irumu 1972.

Lídanrügü aban irumu, aba giñe hánharun nagübürigu luma namulen lun inarüni ani aba habadiseirun. Lidan sedü-hati irumu 1973, aba nagumeserun eseriwida kei prekursoru. Lidan damuriguaü le ñein wabéi, anuhoun meha aban tubuidunmeraü prekursora ani buiti tumadagua luma Heowá gíritu Ann-Catrin. Aba wínsiñedagun wámagua ani lidan irumu 1975 aba wamarieidun. Gádürüñein meha irumu wau eseriwida Strömsund, aban lubuidun fulasu Suesia le haubei saragu gürigia ha busentiña haganwoundagüdüni hasubudin tuagu Bíbülia.

Ann-Catrin: Furendei lumuti núguchi inarüni murusun dan lubaragiñe lagumuchuni laturiahan tidan luban furendei íñuti Estocolmo. Ǘrüwarügügili meha hati nau dan le lagumeserunbei núguchi anaahana lidoun adamuridaguni luma lidoun apurichihani. Mínsiñeti meha katei le tun núguchu, aba tálugun lun tarufuduni iyeeni lan nege le harufudahabei gefentiña luagu Heowá. Lau sun lira, mibihin tumuti ani lau lásügürün dan, aba giñe tabadiseirún. Tareisi meha irumu nau dan le nabadiseirunbei ani dan meha le disisi lubéi irumu nau, aba nadügagun nungua prekursorame. Lárigiñebei neseriwidun Umeå, le ñein lubéi mégeiwa hamá apurichihatiña, aba niridún kei prekursora espechalitu.

Lárigiñebei namarieidun luma Mats, aba gachansin wamá lun warufudahani inarüni houn saragu gürigia. Aban hádangiñe, aban nibureintu gíritu Maivor, to ígirubalin chansi lun tagañeirun yebe saragu seinsu lidan huraraü lun gayaraabei lan taganwoundagüdüni teseriwidun lun Heowá, ani dan lárigiñe, aba tagumeserun eseriwida kei prekursora úara tuma namulelua. Biángubei hagía, ñǘdüntiña tidoun leskuela Galaadü lidan irumu 1984 ani heseriwiduña kei misionéra Ekuadóru.

Seriwihadün kei misionérugu lidan ámuñegueinarügü ageiraü ubouagu. Ka íderagubadün lun hafalaruni adundehani “afulurihabá le ñein lumuti bafidirúa”?

Mats: Inarüni aba lan wounahóun eseriwida lidan ámuñegueinarügü ageiraü. Lau sun lira, aban katei le íderagubaliwa súnwandan, wáfaagun lun “ragüñu” wamá luagu Hesusu adügei sun wayaraati lun wafalaruni, kei burí ǘnabuguni létima larufudubei (Kol. 2:​6, 7). Kei hénpulu, lubaragiñe wagurabahan lun héchudun íbirigu lun ligaburi wadügüni katei, aba wáfaagun lun gunfuranda wamani ka lan uagu hadügei katei lidan ítaga igaburi. Busentiwa meha gunfuranda wamani hechun luma ligaburi hasaminan. Eibu wáyeihani Hesusu, eibu wasandiragun woungua “kei tídibu wewe le abunúti laru duna”, ani ítara liña gayara lan wafulurihan lidan fulasu le ñein lubéi weseriwida (Sal. 1:​2, 3).

Ann-Catrin: Lun gayara lan tárügüdagun aban tídibu wewe tungua luma lun taweiridun lárigiñe tamufurún lidoun amu fulasu, megei tumuti weyu. Ligiaméme ladügübei Heowá: harugoungadagüdati wau (Sal. 84:11). Biní lumutiwa Heowá hau íbirigu ha arufudubaña ínsiñeni woun. Kei hénpulu, gíchigaditiña íbirigu ha lídanbaña liraüraü damuriguaü le ñein wabéi meha Teherán (Irán) kei lubúeingu Heowá ha lánina tidaani Bíbülia. Hínsiñeti hamuga woun lun yebe werederun Irán, lau sun lira, lidan sedü-hati irumu 1980, aba lamahadun Urúei lun wapurichihan, aba hariñagun woun lun wáfuridun lídangiñe ageiraü lau lóufudagun. Ábati wounahóun eseriwida lidan aban ageiraü Áfürika le meha subudiwabei kei Saire ani guenlé, Kongo líribei.

Dan le níchugunbei fe wounahóua lan eseriwida Áfürika, aba nayahuahan. Ladüga aganba nan gibe lan sandi ñein hama saragu hewe, ruti sun lira anufudei nun. Gama lumoun, añahein bián hádangiñe wamadagu seriwihaña meha ñein luagu saragu irumu aba hariñagun woun: “Midingubeigidün Áfürika, ka uagu hanufudeda? Manufudeda humá! Chouru wamuti hésebebadün lan ñein”. Hanarün meha wau, buiti hagaburi íbirigu Áfürika. Le linarün katei, sisi irumu lárigiñe, dan le lachülürünbei oura lun wáfuridun Áfürikagiñe ladüga lamahawadun lun apurichihani ñein, aba náhayachun ladüga sánsihali lan nisaminan ladüga namuriahaña lan yebe luma Heowá lun werederun eseriwida ñein.

Ka abiniruni resibi humaalibei lidan sun irumu le haubei eseriwida lun Heowá?

Mats: Aban lídangiñe katei le ñǘbuinbei nichügüwagun, lubuidun umadagu le nadügübei hama saragu misionérugu ha lídangiñetiña ámuñegueinarügü ageiraü. Aban giñe katei le rúhalibei saragu ugundani nun, wíchugun aturiahani houn saragu gürigia, anihein burí dan, 20 kada aban wádangiñe. Mabulieidun nubéi giñe ínsiñeni luma gíchigadi le harufudubei íbirigu áfürikana woun. Lidan awanha lubéi meha abisidahei damuriguaü le burí Sairebei, anihein meha dan aba wígirunu wagune turugabu haban íbirigu —tidan meha ugunei tuguya warumuga— ani súnwandan meha híchugun íbirigu hagía lóugiñe le hayaraabei (2 Ko. 8:3). Aban katei le naritagubei lau saragu ínsiñeni, au tuma Ann-Catrin, dan le wásügürübei ayanuha úara luagu le asuseredubei lidan weyu. Sagü weyu lubaragiñe woudin arumuga aba weteingiruni Heowá luagu sun le ladügübei wawagu.

Ann-Catrin: Aban katei le adügübei lun nagundaarun, nasubudiruniña íbirigu ha lídangiñetiña ámuñegueinarügü ageiraü ubouagu. Furendeihadiwa fiu iñeñein kei burí faransu, luganda, hererun pérüsiana luma suajili, ani arihaadiwa ámuñegueinarügü échuni. Ídehaadiwa lun warufudahan houn iseri íbirigu, adügaadiwa saragu umadagu buítiña ani gúndaatiwa giñe lau weseriwidun lun Heowá úara hama (Sof. 3:​9, TNM).

Ariha wamaali giñe sun burí katei buíduburiti le ladügübei Heowá. Sagü wánharun lun aban iseri dasi, sanditiwa anihein lan Heowá wouba wouba arufudei émeri woun. Arufudahaali saragu katei woun le maweiyasunbadiwa hamuga adügei lau wabafu guánarügü.

Ka burí lénrengunga úmabei hagagibudagua ani ida liña hararamun lun?

Mats: Lidan burí sun irumu le ásügürübei, gagibuguatiwa luma ámuñegueinarügü sandi kei burí malaria. Mosu meha tibugún Ann-Catrin saragu wéiyaasu, anihein meha dan lau lóufudagun. Ábanya katei le meha adiheridagüdübaliwa, aweiyadeina haña lan meha wagübürigu. Mosu nariñagun íderagua hamaadiwa lan wamulenu lau hetenirun houn wagübürigu lau gaguraasuni luma lau saragu ínsiñeni ani teinki wamutiña saragu luagu sun le hadügübei (1 Tim. 5:4). Lau sun lira, anihein meha dan wuriba lan wasandiragun woungua lugundun siñá lan wadügün saragu dísegiñe lun wíderaguniña wagübürigu.

Ann-Catrin: Lidan irumu 1983, lidan awanha lan meha eseriwida Kongo aba ladagarun kólera nuagu. Aba lariñagun surusia lun Mats: “Sagaboun lídangiñe ageiraü lau lóufudagun!”. Larugan, aba wáhamarun lun Suesióun tidan aban awión to anaahaboun ílagu, lugundun tuguyarügüñoun meha wadarirun.

Mats: Íbini ariñaga lan meha surusia mareidagunharu lan Ann-Catrin, gama lumoun, aba tareidagun. Lau sun lira, ayahuahatiwa meha saragu ladüga samina wamá wígiraali lan misionérugu wamá. Aban irumu lárigiñe, aba gayaraahali lan wagiribudun Kongoun, aba wagumeserun eseriwida lidan aban liraüraü damuriguaü le ñein lubéi layanuhóua suajili lidan fulasu le gíribei Lubumbashi.

Ann-Catrin: Lidan awanha lan eseriwida Lubumbashi, aba nadageinadun, lau sun lira, féridi numuti irahü. Íbini masaminarun wamá lun agübürigu wamá, adügati nagadeiragun lun nasandirun aban lanarime íruni. Gama lumoun, aba labiniruniwa Heowá lau aban katei le magurabun wamuti. Aba wagumeserun íchiga aturiahani tídangiñeti Bíbülia sügǘ lau amu dan. Lídanrügü fiu hati aba haganwoundun íbirigu lúmagiñe 35 hamá darí lun 70, ani aba giñe haganwoundun achülürütiña lidoun adamuridaguni lúmagiñe 40 lan achülürütiña darí lun 220 lan. Aba wíchaagun woungua apurichiha, ani ruti saragu gurasu woun wasandiruni labiniruñadiwa lan Heowá. Íbini ítara, sun oura wau aritagua luagu wasaani ani ayanuha wagía luagu, ani memeniha wanigi warihini le lunbei ladügüni Heowá lun lagaranihan lun igarigu le wasandirubei.

Mats: Dan lárigiñe, aba tagumeserun Ann-Catrin asandira aban lanarime lubucha uagu. Lídanmeme dan ligía aba ladagarun kánserü nurageirugu ani mosu meha nibugún lau lóufudagun. Gama lumoun, au, hóuchaguadina, ánhounti Ann-Catrin, anuhamémegua adügei sun tiyaraati lidan teseriwidun lun Heowá.

Subudi wamuti mámarügüñadiwa lan wagía gaturobulin. Lárigiñebei lanarime háfarawagun gürigia Ruanda lidan irumu 1994, ñǘdüntiwa abisidahaña saragu íbirigu ha lídanbaña fulasu le ñein habéi gürigia ha anurahabaña hageiragiñe. Dan le warihinbalin afiñeni, awanduni luma gíchigadi le harufudubei íbirigu ha, aba gunfuranda wamani gabafu lan Heowá lun lágüdahaniña lubúeingu, meberesenga le asusereduti (Sal. 55:22).

Ann-Catrin: Gagibuguatiwa giñe luma amu turobuli lidan irumu 2007, dan le wagiribudunbei lídangiñe tederegerún sukursáli to Ugandaboun. Dan wóudiña lubéi Nairobi (Kenia) úara hama kei burí 25 misionérugu hama betelitagu, ligía tiabin aban ugunei abugucha tuagun ugunei to anügübaliwa lubaragiñebei wachülürün luagu láfadaragun Kenia. Hilagubeiti le abugahabei hama seingü íbirigu oura ligía, ani murusun oura lárigiñe, aba giñe tounwen aban íbiri háspitalirugu. Wayumahaña lachülürün oura lunya warihiniña wamadagu! (Hob. 14:​13-15).

Lau lásügürün dan, aba nareidagun lídangiñe buleseiti le nibihibei lidan danaguaü ligía. Lanwoun lira, ladüga lamiselu le, nuguya luma Mats haganagua, aba ladagarun aban sandi wawagu le adügübei lun mederaguagüdün lan wasaminan. Anihein burí dan aba nagagudun áriebu lau saragu anufudei ani aba táhüchühan nanigi. Aban katei le íderagubaliwa saragu, wafurieidun lun Heowá luma waliihan fiu bérusu le hínsiñetimabei woun luma wararamagun asaminara luagu. Íderagua lumutiwa giñe wáluahan ídemuei hama surusiagu. Furendeihadiwa ahandilihei turobuli le, ani amuriahatiwa luma Heowá lun líderaguniwa íchiga gurasu houn ha agagibudagubaña luma turobuli líbeina le.

Dan le hayanuhanbei luagu ida liña lan hagagibudagun luma turobuli aba hariñagun luagu góunigi lanün Heowá kamá hamuga le “gañéin huguya”, gayaraati san hafuranguagüdüni woun ka lan mini lubéi dimurei le?

Mats: Anihein aba ariñawagúni lidan suajili le ariñagubei “Tumebebwa kama mayai mabichi”, mini lan lira, “góunigiwa wamá kamá le gañéin wagía”. Ítara kei hóunigirunu burí gürigia hanügünu gañéin luéi tabouchagun, góunigi láadiwa Heowá lau saragu ínsiñeni lidan sun dasi le resibi wamaalibei. Súnwandan líchuguni Heowá le wemegeirubei woun, íbini lóugiñe le wemegeirubei. Kei hénpulu, ariha wamaali ínsiñeni luma ídemuei le líchugubei Heowá woun lau ligaburi lóuseruniwa Musu Úaraguati.

Ann-Catrin: Le lariñagubei Mats luagu ligaburi lóunigiruniwa Heowá, haritaguagüda lumutina luagu aban katei le asuseredubei woun. Aban weyu, aba hagúarun nun awisarana barüwa lan núguchi háspitalirugu, komora lan. Ani sun liña buga lóuchadagun Mats lídangiñe malaria ani maseinsuntiwa lun waweiyasuhan Suesioun. Ligía aba lubéi wasaminarun walugurunu wakarün. Sódini, aba hagúarun bián íbirigu woun. Furumiñe, aba hagúarun aban feru maríeitiña woun ha íchugubaña fe luagu wásügürün ani busentiña hagañeihan aban lídangiñe paséi. Aba giñe tagúarun aban íbiri derebuguharu woun to ariñaguboun anihein lan murusun seinsu areidañu tuma lidan aban tiraüraü gafu lau abürüdǘni “houn ha emegeirubalin”. Lidan murusun oura, aba líderaguniwa Heowá lun wibihini paséi le wemegeirubei (Ebü. 13:6).

Ka furendei humaalibei lidan 50 irumu le haubei eseriwida lun Heowá?

Ann-Catrin: Furendeihadina inarüni lan le lariñagubei Isaíasi 30:​15, luagu lídanbei lan darangilaü luma emenigini were. Dan le wafiñerun luagu Heowá, ítara liña kamá hamuga le lageindaguña Heowá waweigiñe (2 Kro. 20:​15, 17). Kei rúguaadiwa lan woungua sunsuinagubei eseriwida lun Heowá, biní láadiwa saragu, resibihadiwa saragu katei le maweiyasunbadiwa hamuga ibihei lun hamuga rugua wamá woungua awadigimarida lun ubóu le.

Mats: Katei súdiniti le furendei náalibei, mosu lan nafiñerun luagu Heowá lidan furumiñeguarügü sügǘ, ítararügüba narihini le lunbei ladügüni lun líderagunina (Sal. 37:5). Ítara kei füramase lani, súnwandan aniheingubeiñein lan warugabu. Ani subudi wamuti anihein lan Heowá íderaguawa lidan awanha lan eseriwida Betelirugu Mianmarü.

Ayumahatiwa tídangiñe sun wanigi lun heresibiruni sun íbirigu nibureintiña ha busenbaña haganwoundagüdüni heseriwidun lun Heowá ligiaméme ínsiñeni le arufuda láalibei Bungiu woun. Ani chouru wamuti luagu hibihibei lan ánhaña ígira lun líderaguniña Heowá afuluriha ñein lumuti hafidirúa.