Kátaña san lúnbaña houdin sielun?
Óunabagülei le tíchugubei Bíbülia
Anúadiraali Bungiu fiu kristiánugu úaraguatiña ha lúnbaña háguyugun sielu (1 Féduru 1:3, 4). Lárigiñe anúadiraaña lan, mosu hasigirun óusera kei kristiánugu, lunti giñe hereméme lan hafiñen. Anhein madügün hamá, ábame madüna hamaali lan heresibiruni alagan lun hawinwandun sielu (Éfesuna 5:5; Filipuna 3:12-14).
Kaba hadüga ñein?
Harúeihaba anuadirúaaña ha ani hafadirihaba úara luma Hesusu luagu milu irumu (Arufudúni 5:9, 10; 20:6). Hagíaba lílana arúeihani le siélubei (le unbei tagúara Bíbülia “iseri sielu”), ha lúnbaña harúeihan hawagu gürigia úaraguatiña ha lúnbaña hawinwandun ya ubouagu (o “iseri ubóu”). Hadügüba urúeigu ha lun hawinwandun gürigia lidan aban ubóu buin lau irichaü luma úaraguni, ítara kei labusenruni Bungiu lúmagiñe furumiñeti dan (Isaíasi 65:17; 2 Féduru 3:13).
Átiribaña ñüdün sielun?
Ariñagatu Bíbülia háguyuguba lan 144,000 gürigia lun hawinwandun sielu (Arufudúni 7:4). Lidan aban arufudúni, ariha lumuti apostolu Huan “mudún [Hesusu lárigiñe láguyugun] rara lábulugu wübü le Sión. Ñéinñanu san-bián-wein-gádürü-milu gürigia luma” (Arufudúni 14:1-3; Huan 1:29; 1 Féduru 1:19). Mini lan Wübü Sión uéiriguni le líchugubei Bungiu lun Hesusu kei houn 144,000 ha lúnbaña harúeihan úara luma sielu (Sálumu 2:6; Ebüréu 12:22).
Ha únbaña laguarúa “lánigu ha lanúadirubaña” lun harúeihan luma Kristu lidan Larúeihan Bungiu, subudiwatiña giñe kei “mudún míbetiña” (Arufudúni 17:14; Lúkasi 12:32, Traducción del Nuevo Mundo). Arufudati katei le mibe hamá dan le wagoubaguagüdüniña hama amu mudún, hameme lánigu Kristu (Huan 10:16).
Saminaü burí charati hawagu ha lúnbaña houdin sielun
Le hafiñerubei saragu gürigia: Hóudiba sun ha buídubaña sielun.
Le inarünibei: Füramaseti Bungiu hawinwanduba lan hiibe-agei gürigia buítiña ya ubouagu (Sálumu 37:11, 29, 34).
Ariñagati Hesusu: “Úagili ni aban amudeiruti sielun” (Huan 3:13). Furanguti larufuduni burí dimurei le midin hamá gürigia buítiña ha óunwegubaña lubaragiñe Hesusu sielun, kéiburi Abüraámü, Moisesi, Hobu luma Dawidi (Adügaü 2:29, 34). Hemenigitiña meha háguyuguba lan lun hawinwandun ya ubouagu (Hobu 14:13-15).
Wáwati lun águyuguni lun lawinwandúniwa sielu “furumiñeti ásaaruni lídangiñe óunweni” (Arufudúni 20:6). Mini lan le ñeinbei lan amu águyuguni, ani yaabei ubouagu.
Arufudahatu Bíbülia lidan lanme Larúeihan Bungiu “úaalime óunweni” (Arufudúni 21:3, 4). Chóuruti layanuhaña lan bérusu le luagu Ubóu le ídanbei wawinwanda ladüga úañahagili óunweni sielu.
Le hafiñerubei saragu gürigia: Gayaraati lanúadiruni gürigia anhein siéluba lubéi lawinwanda o ya lan ubouagu.
Le inarünibei: Bungiu anúadirubaliña kristiánugu úaraguatiña ha lúnbaña heresibiruni afayeiruahaü “le lunbei líchuguni” houn sielu, lidan amu dimurei, emenigini lun lawinwandúniwa sielu (Filipuna 3:14). Emenigini le, mama aban katei le lanúadirubei aban gürigia según le himei lubéi o le layumahabei (Matéu 20:20-23).
Le hafiñerubei saragu gürigia: Hóunrügüñein ha madünabaña lun lawinwandúniwa sielu lichugúa emenigini lun hawinwandun ya ubouagu.
Le inarünibei: Ariñagati Bungiu hawagu ha lúnbaña hawinwandun ubouagu “numutuniña”, “ha biní laañabaña Abureimei” (Isaíasi 65:21-23). Gachansinbaña gürigia ha lun hídehan lun lagunfulirun le labusenrubei Bungiu lúmagiñe furumiñeti dan: lun hawinwandun gürigia mafigountiña lidan paraísu ubouagu lun súnwandan (Agumesehani 1:28; Sálumu 115:16; Isaíasi 45:18).
Le hafiñerubei saragu gürigia: Yúsuati númeru 144,000 le áfuachubei tidan líburu Arufudúni kei hénpulu.
Le inarünibei: Lau sun anihein lan númeru le ayusurúti kei hénpulu tidan líburu Arufudúni, mama súngubei yúsuati kei hénpulu. Kéiburi “hiri duusu lani Kristu apostolugu” (Arufudúni 21:14). Ariha wamá amu burí katei le achoururagüdübalin woun mama lan aban hénpulu númeru 144,000.
Lidan Arufudúni 7:4 bürüwati “átiriñanu lan [ha anuadirúbaña lun hawinwandun sielu]: San-bián-wein-gádürü-milu”, lau lóufudagun, aba layanuhóun hawagu “saragu gürigia […]. Gíbetiña gürigia hagía darí lun siñá lan habahüdǘn”. Séfuwatiña giñe “saragu gürigia” ha (Arufudúni 7:9, 10). Lun hamuga layusurúña lan númeru 144,000 keisi hénpulu, úabei hamuga gunfurandawa lan layanuhóuña lan hawagu bián sétanu gürigia.a
Lanwoun lira, ariñawagúati hawagu 144,000: “Díreiwatiña […] hádangiñe gürigia kei furumiñeti idewesei lun Bungiu” (Arufudúni 14:4). Dimurei “furumiñeti idewesei” layanuhaña hawagu fiu gürigia ha anuadirútiña hádangiñe saragu gürigia. Furanguti larufuduni dimurei le layanuhóuña lan hawagu ha anúadirubaña lun harúeihan úara luma Kristu sielu hawagu saragu gürigia ha lúnbaña hawinwandun ya ubouagu (Arufudúni 5:10).
a Abürühati máisturu Robert Thomas libügürü númeru 144,000 le lídanbei Arufudúni 7:4: “Layanuhaña ya luagu aban númeru le iridúti furangu le mítaranbei luma le iridúbei lidan 7:9. Anhein gunfuranda wamá kei hénpulu, siñabei gunfuranda wamani ni aban lídangiñe númeru le tídanbei líburu to” (Arufudúni 1-7: An Exegetical Commentary, páhina 474).