Génesis

3 Chrij riʼ, Dios xkʼut riʼ chwäch Abimélec chpan jun achïkʼ y xuʼij che rä: «Kan tayaʼ chwäch awan chë xkakäm rma ri ixöq ri xatäq rkʼamarik, rma ryä ya kʼlan chik». 4 Ye kʼa, Abimélec majanä wä tjeʼ qa rkʼë Sara. Rma riʼ ryä xkʼutuj che rä Dios: «Jehová, ¿xtachüp komä rwäch jun tinamït ri ma ajmak ta? 5 ¿Ma xuʼij ta komä Abrahán chwä ‹ryä xa wanaʼ›? ¿Y ma xuʼij ta komä Sara chwä ‹ryä xa nxbʼal›? Rïn ma chubʼanik ta ri xinbʼän». 6 Rma riʼ, chpan ri achïkʼ riʼ, ri kʼaslïk Dios xuʼij che rä: «Rïn ntaman chë rït ma chubʼanik ta xaʼän. Rma riʼ ma xinyaʼ ta qʼij chë xamakun chi nwäch y ma xinyaʼ ta qʼij chë xajeʼ qa rkʼë. 7 Y komä tatzolij äl rxjayil ri achï, rma ri achiʼ riʼ jun profeta. Ryä xtchʼö wkʼë rïn pan awiʼ rït, rchë ke riʼ ma xkakäm ta. Ye kʼa we ma xtatzolij ta äl ri ixöq, kan chöj nbʼij chawä chë rït chqä ri awinaq xkixkäm».