Génesis

15 Chrij riʼ Labán xuʼij che rä Jacob: «Tapeʼ yït wachʼalal, ¿achkë ta kʼa rbʼanik nyaʼ qʼij chawä chë yasamäj wkʼë ye kʼa majun ta nyaʼ chawä? Taʼij chwä, ¿jaruʼ nawajoʼ ntöj chawä?». 16 Labán ye kʼo wä kaʼiʼ rmiʼal: ri naʼäy, Lea rbʼiʼ, y ri más koʼöl, Raquel. 17 Lea ma kan ta más jaʼäl ntzuʼun. Ye kʼa Raquel kan jaʼäl wä ntzuʼun. 18 Rma Jacob xbʼä ran chrij Raquel, xuʼij che rä Labán: «Rïn nwajoʼ yisamäj 7 jnaʼ awkʼë rchë nayaʼ Raquel chwä, ri amiʼal más koʼöl». 19 Labán xuʼij che rä: «Más ütz nyaʼ chawä rït chwäch xa bʼa achkë chik jun achï. Kakanaj qa qkʼë aweʼ». 20 Y Jacob xsamäj 7 jnaʼ rchë nyaʼöx Raquel che rä, ye kʼa ryä xnaʼ chë achiʼel ta jojun taq qʼij ri xeqʼax rma janina wä nrajoʼ Raquel. 21 Pa rkʼisbʼäl, Jacob xuʼij che rä Labán: «Ya xbʼetzʼaqät ri tiempo. Tayaʼ pä ri wixjayil chqä tayaʼ qʼij chwä rchë yijeʼ qa rkʼë». 22 Rma riʼ, Labán xermöl jontir ri ye kʼo chunaqaj rachoch chqä xuʼän jun nmaqʼij. 23 Ye kʼa, taq xok qa aqʼaʼ, xkʼwaj äl Lea, ri rmiʼal, che rä Jacob rchë xjeʼ qa rkʼë. 24 Y, Labán xyaʼ jun chkë rsamajelaʼ che rä Lea ri rbʼiniʼan Zilpá rchë nsamäj rkʼë. 25 Ye kʼa, taq xseqär chkaʼn qʼij, Jacob xtzʼët chë xa yë Lea kʼo rkʼë. Rma riʼ, xuʼij che rä Labán: «¿Achkë rma xaʼän ya reʼ chwä? ¿Ma rma ta kʼa Raquel ri xisamäj awkʼë? ¿Achkë rma xinaqʼöl?». 26 Ye kʼa Labán xuʼij che rä: «Aweʼ ma rkʼulun ta chë yë ri qʼopoj más koʼöl nkʼleʼ naʼäy chwäch ri naʼäy qʼopoj. 27 Kajeʼ rkʼë Lea chpan rnmaqʼij ri nyalöj jun semana, y chrij riʼ xtinyaʼ chik re jun qʼopoj reʼ chawä, ye kʼa kʼo chë yasamäj chik 7 jnaʼ wkʼë». 28 Jacob xrajoʼ ri xbʼix che rä chqä xjeʼ rkʼë Lea chpan rnmaqʼij ri xyalöj jun semana. Chrij riʼ Labán xyaʼ Raquel che rä Jacob rchë xok rxjayil. 29 Y, Labán xyaʼ jun chkë rsamajelaʼ che rä Raquel ri rbʼiniʼan Bilhá rchë nsamäj rkʼë.