Génesis

7 Chrij riʼ, Jehová xuʼij che rä Noé: «Kixok chpan ri arca rït chqä ri afamilia, rma ntzʼeton chë, chkikojöl ri winäq, rït kan akʼwan jun jïk kʼaslemal. 2 Chkë jontir kiwäch chköp ri ye chʼajchʼöj kʼo chë yeʼakʼwaj äl 7 kaqän, chë achijaʼ chë ixoqiʼ. Ye kʼa chkë jontir kiwäch chköp ri ma ye chʼajchʼöj ta kʼo chë xuʼ kaʼiʼ kaqän yeʼakʼwaj äl, ri achij chqä ri ixöq. 3 Chkë ri chköp ri yexikʼan kʼo chqä chë yeʼakʼwaj äl 7 kaqän —chë achijaʼ chë ixoqiʼ— rchë chë ma nchup ta rwäch ri kijatzul chwäch le Rwachʼlew. 4 Tabʼanaʼ riʼ rma xa chpan 7 qʼij xtinbʼän chë xtpë jöbʼ chwäch le Rwachʼlew 40 qʼij chqä 40 aqʼaʼ, y xtinchüp kiwäch jontir ri kʼo kikʼaslemal ri xenbʼän ri ye kʼo chwäch le Rwachʼlew». 5 Y Noé kan xuʼän jontir ri xchlaʼej Jehová che rä. 6 Noé kʼo wä 600 rjnaʼ taq ri mamaʼ Qʼeqäl Jöbʼ xnujsaj rwäch le Rwachʼlew. 7 Ye kʼa taq majanä tpë ri mamaʼ Qʼeqäl Jöbʼ, Noé chqä rxjayil, ri rkʼajol chqä ri kixjayil xeʼok apü chpan ri arca. 8 Y ri chköp ri ye chʼajchʼöj, ri chköp ri ma ye chʼajchʼöj ta, ri chköp ri yexikʼan chqä jontir ri yeslon chwäch le Rwachʼlew 9 xebʼä akuchï kʼo wä Noé chqä pa kakaʼ xeʼok apü chpan ri arca, chë achij chë ixöq, kan achiʼel xuʼij Dios che rä Noé. 10 7 qʼij chrij riʼ xpë ri mamaʼ Qʼeqäl Jöbʼ chwäch le Rwachʼlew. 11 Taq Noé 600 wä rjnaʼ, ri qʼij 17 rchë ri rkaʼn ikʼ, ri qʼij riʼ xjaqatäj ri kaj chqä jontir ri yaʼ ri kʼo chkaj xqä pä chwäch le Rwachʼlew. 12 Y 40 qʼij chqä 40 aqʼaʼ kan mamaʼ jöbʼ xuʼän chwäch le Rwachʼlew. 13 Ri qʼij riʼ, Noé chqä rxjayil, ri oxiʼ rkʼajol —Sem, Cam chqä Jafet— chqä kixjayil xeʼok apü chpan ri arca. 14 Chqä kikʼë ryeʼ xeʼok apü jontir kiwäch chköp ri ye rchë pa qʼayis, ri ma ye rchë ta kʼechelaj, ri nkiqererej kiʼ chqä ri yexikʼan, jontir ri kʼo kixikʼ. 15 Y jontir kiwäch chköp ri kʼo kikʼaslemal xebʼä akuchï kʼo wä Noé chqä pa kakaʼ xeʼok apü chpan ri arca. 16 Chë achijaʼ chë ixoqiʼ chqä kan jalajöj kiwäch ri chköp xeʼok apü chpan ri arca, kan achiʼel xuʼij Dios che rä Noé. Chrij riʼ, Jehová xtzʼapij rchiʼ ri arca. 17 Y 40 qʼij xuʼän ri mamaʼ Qʼeqäl Jöbʼ chwäch le Rwachʼlew. Ri yaʼ xnmär chqä xuʼän chë ri arca xjoteʼ pa rwiʼ yaʼ chqä chë xbʼä pa rwiʼ yaʼ. 18 Ri yaʼ más xnmär chqä xnujsaj le Rwachʼlew. Ye kʼa ri arca kan xbʼä pa rwiʼ yaʼ. 19 Ri yaʼ kowan xnmär, rma riʼ xerküch jontir mamaʼ taq jyuʼ ri ye kʼo chuxeʼ ri kaj. 20 Ri yaʼ xqʼax jun 15 codos pa kiwiʼ ri jyuʼ. 21 Ke riʼ taq xekäm jontir ri kʼo wä kikʼaslemal ri ye kʼo chwäch le Rwachʼlew: ri chköp ri yexikʼan, ri chköp ma ye rchë ta kʼechelaj, ri chköp ri ye rchë pa qʼayis, ri chköp ri kan pa molaj nkikʼwaj kiʼ chqä jontir ri winäq. 22 Xekäm jontir ri ye kʼo wä chwäch le Rwachʼlew ri nkijqʼaj ri rxlaʼ yaʼ. 23 Dios xchüp kiwäch jontir ri kʼo wä kikʼaslemal chwäch le Rwachʼlew, yajün ri winäq, ri chköp, ri chköp ri nkiqererej kiʼ chqä ri chköp ri yexikʼan. Jontir xchup kiwäch. Xa xuʼ Noé chqä ri ye kʼo wä rkʼë ryä chpan ri arca xekʼaseʼ qa. 24 Y ri yaʼ 150 qʼij xrmeʼ chwäch le Rwachʼlew.