Génesis

4 Ye kʼa ri ma kʼo ta chë nitäj ya riʼ ri tiʼäj rkʼë rkʼaslemal, ntel chë tzij, rkʼë kïkʼ. 8 Chrij riʼ, Dios xuʼij che rä Noé chqä chkë rkʼajol: 9 «Komä njkibʼaʼ ntzij iwkʼë rïx, kikʼë ri ijatzul 10 chqä kikʼë jontir ri kʼo kikʼaslemal ri xeʼel pä iwkʼë rïx chpan ri arca —ri chköp ri yexikʼan, ri nkʼaj chik chköp chqä jontir ri kʼo kikʼaslemal ri ye kʼo chwäch le Rwachʼlew ri ye kʼo iwkʼë rïx—, ntel chë tzij, kikʼë jontir ri kʼo kikʼaslemal chwäch le Rwachʼlew. 11 Ya reʼ ri jikibʼäl tzij ri nbʼän iwkʼë rïx: majun bʼëy chik xtinkʼäm pä jun mamaʼ qʼeqäl jöbʼ rchë nchüp kiwäch jontir ri kʼo kikʼaslemal nixta rchë ntzʼlaʼ le Rwachʼlew». 12 Chrij riʼ, Dios xuʼij reʼ: «Ya reʼ retal ri jikibʼäl tzij ri najin nbʼän iwkʼë rïx chqä kikʼë jontir ri kʼo kikʼaslemal ri ye kʼo iwkʼë rïx, ri xtqʼalajin chkiwäch jontir ri ijatzul ri xkeʼaläx chkipan ri jnaʼ xkepë: 13 rïn nyaʼ warcoíris pa sutzʼ. Ya reʼ xttok retal ri jikibʼäl tzij ri najin nbʼän rkʼë le Rwachʼlew. 14 Ronojel mul ri xtinyaʼ pä sutzʼ pa rwiʼ le Rwachʼlew, ri arcoíris kan xtbʼeqʼalajin pä chpan ri sutzʼ. 15 Taq xtbʼanatäj riʼ, rïn xtnatäj pä chwä ri jikibʼäl tzij xinbʼän iwkʼë rïx chqä kikʼë jontir ri kʼo kikʼaslemal. Ri yaʼ majun bʼëy chik xkebʼeʼok jun mamaʼ qʼeqäl jöbʼ rchë nuchüp rwäch jontir ri kʼo kikʼaslemal chwäch le Rwachʼlew. 16 Taq ri arcoíris xtbʼeqʼalajin pä chpan ri sutzʼ, rïn kan xtintzʼët riʼ chqä xtnatäj pä chwä ri jikibʼäl tzij, ri majun bʼëy xtkʼis ta, ri xinbʼän rïn kikʼë jontir ri kʼo kikʼaslemal chwäch le Rwachʼlew».