2 Crónicas

31 Taq xkiʼän yän jontir riʼ, jontir ri israelitas ri ye kʼo wä chriʼ xebʼä äl chkipan ri tinamït ri ye kʼo Judá y xekiwulaj ri tzʼaq yepabʼan rchë nyaʼöx kiqʼij dioses chwäch, xekiqasaj ri cheʼ ri yebʼanon loqʼoläj chkë, xekiwulaj ri altares ri ye kʼo pa kiwiʼ ri jyuʼ chqä jontir ri altares ri ye kʼo Judá y Benjamín chqä Efraín y Manasés. Ryeʼ xkichüp rwäch jontir riʼ. Chrij riʼ, jontir ri israelitas xetzolin chpan kitinamit, jontir xetzolin chkachoch. 4 Chqä, ryä xuʼij chkë ri israelitas ri ye kʼo wä Jerusalén chë tkiyaʼ chkë ri sacerdotes chqä ri levitas ri kʼo chë nyaʼöx chkë, rchë ke riʼ ryeʼ nkiʼän jontir ri rbʼin Jehová chkë chpan rpixaʼ. 5 Taq xkikʼoxaj riʼ, ri israelitas xkiyaʼ ri naʼäy taq rwäch trigo chqä cebada; xkiyaʼ ri vino chqä ri aceite ri kʼa xkiʼän chqä ri ryiʼal kabʼ ri kʼa xkesaj, y kan pa rkʼiyal rwäch tkoʼn xkiyaʼ; ryeʼ xkikʼäm pä ri décimo peraj rchë jontir riʼ, y kan pa rkʼiyal xkikʼäm pä. 6 Y ri aj Israel chqä Judá ri ye kʼo wä chkipan ri tinamït ri ye kʼo Judá xkikʼäm pä chqä ri décimo peraj rchë ri molaj kiwakx chqä kikarneʼl, y ri décimo peraj rchë jontir ri xejach chqä xebʼan loqʼoläj chkë rchë nyaʼöx che rä Jehová ri kiDios. Ryeʼ xkikʼäm pä jontir riʼ chqä kan pa molaj xekimulbʼaʼ. 9 Ezequías xkʼutuj chkë ri sacerdotes chqä ri levitas chrij ri spanïk ri yekimulbʼan, 10 y Azarías, ri sacerdote ri kʼo más rqʼij chqä rjatzul Sadoc, xuʼij reʼ che rä: «Kan xa xuʼ xekʼamöx pä ri diezmos chpan rachoch Jehová, jontir najin yewaʼ chqä nnuj kipan, y kan kʼïy ntotäj na qa, rma Jehová ryaʼon utzil pa rwiʼ rtinamit, y jontir ya reʼ ri xtotäj qa».