Esdras

1 Chpan ri naʼäy jnaʼ ri xqʼät tzij Ciro, ri qʼatöy tzij rchë Persia, Jehová xksaj Ciro rchë chë ryä xuʼij chë tyaʼöx jun rtzjol chwäch ronojel ri rtinamit rchë chë nbʼanatäj ri rtzij Jehová ri xuʼij qa Jeremías. Ri rtzjol riʼ —ri xtzʼibʼäx qa chqä— nuʼij: 2 «Ya reʼ ri nuʼij Ciro, ri qʼatöy tzij rchë Persia: ‹Jehová, ri Dios rchë ri kaj, pa nqʼaʼ rïn yeryaʼon wä jontir ri qʼatbʼäl taq tzij ri ye kʼo chwäch le Rwachʼlew y pa nqʼaʼ rïn ryaʼon wä rchë nyäk jun rachoch pa Jerusalén, ri kʼo pa Judá. 3 Ri ye kʼo chikojöl rïx ri ye rchë rtinamit Dios, tjeʼ ta kʼa kiDios kikʼë chqä kejoteʼ kʼa Jerusalén —ri kʼo pa Judá— y tkiyakaʼ chik jmul ri rachoch Jehová, ri rDios Israel. Ryä ri kʼaslïk Dios, ri kʼo wä rachoch pa Jerusalén. 4 Y xa bʼa achkë ri kʼo pa jun chik tinamït, xa bʼa achkë na kʼa tinamït riʼ, ttoʼöx kimä ri rvecinos. Tkiyaʼ äl ri oro, ri plata, ri chköp chqä xa bʼa achkë nkʼatzin che rä. Chqä ütz tkiyaʼ äl ri spanïk ri nkajoʼ nkiyaʼ che rä ri rachoch ri kʼaslïk Dios, ri kʼo wä Jerusalén›». 5 Taq xkikʼoxaj riʼ, ri ye ukʼwayon bʼey chkiwäch ri winäq ri rjatzul qa Judá chqä Benjamín, ri sacerdotes chqä ri levitas —y jontir ri xyaʼöx pa kan rma ri kʼaslïk Dios rchë yetzolin— xkimöl ronojel ri nkʼatzin chkë rchë yejoteʼ chqä rchë nkiyäk chik jmul ri rachoch Jehová, ri kʼo wä Jerusalén. 6 Y ri kivecinos xekiyaʼ äl oro, plata, chköp chqä nkʼaj chik ri kan kʼo kajäl y xa bʼa achkë chik jun ri nkʼatzin, chqä xekiyaʼ äl kʼïy spanïk.