Isaías

40 Ya reʼ nuʼij iDios rïx: «Tikʼuqbʼaʼ kikʼuʼx nsamajelaʼ; tikʼuqbʼaʼ kikʼuʼx». 3 Kʼo jun winäq ri kan rkʼë kuw rchʼaʼäl nuʼij reʼ pa tzʼiran ilew: «¡Tibʼanaʼ rbʼanik ri bʼey chwäch Jehová! Tibʼanaʼ jun jïk bʼey pa tzʼiran ilew chwäch ri qaDios. 4 Tnujsäx chë ilew kikojöl taq jyuʼ chqä keqasäx jontir ri koköj chqä nmaʼq taq jyuʼ. Ri bʼey ri kan lawaloʼ rbʼanon chqä rojyuʼ rwäch xtbʼan kibʼanik. 5 Y chrij riʼ kan xtqʼalajin rqʼij rkʼojlen Jehová, y jontir xketzʼetö rchë, rma kan yë Jehová xbʼin ya riʼ». 8 Ri qʼayis xa nchaqiʼj qa, ri kotzʼiʼj xa nmayamoʼ qa, ye kʼa ri rchʼaʼäl ri qaDios majun bʼëy xtchup ta rwäch». 10 Jehová, ri Nimaläj Qʼatöy Tzij, xtpë rkʼë rchqʼaʼ y kan xtqʼät tzij rkʼë rqʼaʼ. [...] 11 Xkerchajij ri rkarneʼl kan achiʼel nuʼän jun yuqʼunel. Rkʼë rqʼaʼ xkermöl wä ri rkarneʼl chqä chwarkʼuʼx xkerkʼwaj wä äl. Kan rkʼë ajowabʼäl xkerkʼwaj wä ri karneʼl ri kʼa najin na nkiyaʼ tzʼmäj chkë kal. 26 «Kixtzuʼun chkaj y titzʼetaʼ. ¿Achkë bʼanayon kichë jontir reʼ? Ya riʼ ri yernükʼ pä ri chʼumilaʼ taq yeresaj pä, yerjlaj chqä nuyaʼ kibʼiʼ konojel. Rma kan janina rchqʼaʼ, konojel yeʼel pä. 28 ¿Ma ataman ta rït reʼ? O, ¿ma akʼoxan ta? Jehová, ri xbʼanö ronojel ri kʼa näj kʼo wä che rä le Rwachʼlew, jun Dios ri majun bʼëy xtkäm ta. Ryä majun bʼëy nkos ta. Majun achoq chwäch nqʼax wä jontir ri rchʼobʼonik. 29 Ryä nuyaʼ rchqʼaʼ ri winäq kosnäq chqä ri winäq ri majun ta chik rchqʼaʼ. 30 Yajün ri akʼalaʼ yekos chqä nkʼis kichqʼaʼ, ri qʼopojiʼ kʼojolaʼ nkichaqʼij chqä kaqän y yetzaq, 31 ye kʼa ri nkikʼuqbʼaʼ kikʼuʼx chrij Jehová, kan xttzolin pä chik jmul kichqʼaʼ. Kan achiʼel ta xkejoteʼ chkaj achiʼel nuʼän jun águila. Xtkikʼäq anin y ma xkeqʼitäj ta; xkebʼiyïn y ma xkekos ta».