2 Pedro

3 Rïx nkʼatzin nqʼax chiwäch chë chpan ri rkʼisbʼäl taq qʼij xkejeʼ winäq ri xa xketzeʼen chrij rchʼaʼäl Dios, xa xuʼ xtkiʼän ri nqä chkiwäch ryeʼ 4 chqä xtkiʼij reʼ: «¿Akuchï kʼo wä ri najin nitzjoj rïx chë xtpë? Rma, kan pa kiqʼij qa ri katiʼt qamamaʼ, ri ye kamnäq chik, majun ta jun jalatajnäq. Kan achiʼel rbʼanon taq xebʼan ri winäq chwäch le Rwachʼlew kʼa ke riʼ na rbʼanon komä». 7 Ye kʼa rma ri bʼin pä, le kaj chqä le Rwachʼlew ri ye kʼo komä xa yeyoʼen apü rchë xtchup kiwäch pa qʼaqʼ; y riʼ xtbʼanatäj taq xtqʼat tzij pa kiwiʼ ri winäq ri majun ta rqʼij Dios chkiwäch. 8 Ye kʼa, qachʼalal, ma timestaj ta reʼ: mil jnaʼ chwäch Jehová achiʼel xa ta jun qʼij, y jun qʼij achiʼel ta mil jnaʼ. 9 Jehová ma najin ta nyalöj rchë nuʼän ri rtzjun, achiʼel nkiquʼ jojun winäq. Pa rkʼexel riʼ, ryä ma nikʼo ta rkʼuʼx iwkʼë rïx rma ma nrajoʼ ta chë kʼo ta jun nchup rwäch, xa kan nrajoʼ chë jontir nkitzolij kiʼ. 11 Rma kan ke reʼ rbʼanik xtchup rwäch jontir reʼ, ¡tiquʼ achkë inaʼoj nkʼatzin nikʼüt! Rkʼë ronojel ri yeʼiʼän nkʼatzin nikʼüt chë yïx loqʼoläj chqä chë niyaʼ rqʼij Dios, 12 loman niyoʼej chë xtbʼeqä rqʼij Jehová, taq ri kaj xtchup rwäch rma ri qʼaqʼ chqä taq xkeyiʼär jontir ri ye kʼo chwäch rma ri kʼatän. 13 Ye kʼa kʼo jun kʼakʼakʼ kaj chqä jun kʼakʼakʼ Rwachʼlew ri tzjun chqë, ri akuchï kan pa rbʼeyal xtbʼan che rä jontir. 14 Rma riʼ, wachʼalal, rma najin niyoʼej chë nbʼanatäj jontir reʼ, tibʼanaʼ jontir ri kʼo pan iqʼaʼ rchë chë pa rkʼisbʼäl ryä majun ta tzʼil nixta itzelal nrïl chiwij, chë kan ta ütz xkixurtzʼët chqä chë majun ta oyowal xtrïl chikojöl. 16 Ryä xtzjon chrij riʼ chkipan jontir ri rucartas. Ye kʼa, kʼo chqä xertzʼibʼaj qa ri kan kʼayewal yeqʼax. Rma riʼ ri ma xkikʼül ta jun kitjonik chqä ri xa kaʼiʼ kikʼuʼx kibʼanon chrij rchʼaʼäl Dios, xa yekijäl ri naʼoj riʼ, achiʼel nkiʼän rkʼë jontir ri Tzʼibʼatäl qa; y ya riʼ xa kamïk xtkʼäm pä chkij. 17 Rma riʼ qachʼalal, rma itaman chik ya reʼ, ma timestaj ta achkë nkʼatzin niʼän rchë ma xkixqʼol ta kimä ri xa nkiqʼäj rpixaʼ Dios achiʼel xbʼanatäj kikʼë ryeʼ, rchë ke riʼ ma xtuʼän ta kaʼiʼ ikʼuʼx.