Lucas

11 Taq xkixukʼwäx chkiwäch ye kʼïy winäq chqä chkiwäch ri qʼatbʼäl taq tzij, ma kixchʼpü ta chrij ri achkë rbʼanik xkixtzjon o achkë xtiʼij rchë xtitoʼ iwiʼ, 12 rma kan chpan ri hora riʼ ri loqʼoläj rchqʼaʼ Dios xtkʼüt chiwäch achkë kʼo chë xtiʼij». 15 Rma riʼ, xuʼij reʼ chkë: «Kan tijaqaʼ ri rnaqʼ iwäch chqä ma kixjakʼäkʼ ta, rma tapeʼ kan pa rkʼiyal ri achkë jun kʼo awkʼë, ma ya riʼ ta xtyaʼö akʼaslemal». 16 Taq xuʼij yän riʼ, xtzjoj ya reʼ chkë: «Kʼo jun bʼeyon achï kan kʼïy rwäch rtkoʼn xyaʼ. 17 Rma riʼ xuʼij qa ya reʼ pa ran: ‹¿Achkë xtinbʼän komä? Rïn majun ta akuchï xtinkʼöl wä jontir rwäch ntkoʼn›. 18 Chrij riʼ xuʼij: ‹Ya reʼ xtinbʼän: xkenwlaj ri jay akuchï yenkʼolon wä rwäch ntkoʼn y xkenbʼän chik nkʼaj más ye nmaʼq, y chriʼ xtinkʼöl wä jontir rwäch ntkoʼn y jontir ri kʼo wkʼë. 19 Y chrij riʼ xtinbʼij qa ya reʼ pa wan: «Kan kʼïy achkë jun nkʼolon chik rchë yirqʼiʼ kʼïy jnaʼ, rma riʼ xkinuxlan, xkiwaʼ, xtintäj nyaʼ y kiʼ nkʼuʼx xtinbʼän»›. 20 Ye kʼa Dios xuʼij che rä: ‹Xa majun anaʼoj, re aqʼaʼ reʼ xa xkakäm. Rma riʼ, ¿achoq che rä xtkanaj wä qa jontir ri xakʼöl?›. 21 Ke riʼ nbʼanatäj rkʼë ri winäq ri xa xuʼ rbʼeyomal ryä nukanuj, ye kʼa majun ta rbʼeyomal rkʼë Dios». 24 Keʼitzʼetaʼ ri chʼök: ryeʼ ma yetkonäj ta, ma nkesaj ta rwäch tkoʼn nixta nkikʼöl qa rwäch tkoʼn, ye kʼa Dios kan yertzüq. ¿Ma más ta komä iqʼij rïx chkiwäch ri ajxikʼ taq chköp? 25 ¿Kʼo komä jun chiwä rïx ri nkowin nkʼaseʼ jbʼaʼ chik xa rma nchʼpü rkʼuʼx? 27 Titzʼetaʼ achkë rbʼanik yekʼïy pä ri kotzʼiʼj pa jyuʼ. Ryeʼ ma yesamäj ta chqä ma yebʼatzʼin ta; ye kʼa nixta Salomón, ri janina wä rbʼeyomal, xkowin xwäq riʼ achiʼel jun chkë re kotzʼiʼj reʼ. 28 Rma riʼ, we Dios ke riʼ rbʼanik yerwäq ri kotzʼiʼj ri ye kʼo pa jyuʼ, ri komä ye kʼo y chwaʼq xa yeporöx, ¿ma más ta komä xtyaʼ itzyaq rïx, winäq ri nkʼatzin nikʼuqbʼaʼ más ikʼuʼx chrij Dios? 29 Rma riʼ ma tbʼä ta iwan chkanuxik ri achkë xtitäj o achkë xtiqüm, chqä ma kowan ta chik tchʼpü ikʼuʼx (ma kixmayon ta). 30 Rma yë ri winäq ri ma nkiyaʼ ta rqʼij Dios ri nkitäj kiqʼij chukanuxik jontir reʼ; ye kʼa ri Itataʼ ri kʼo chlaʼ chkaj rtaman chë rïx nkʼatzin jontir reʼ chiwä. 31 Rma riʼ, pa rkʼexel niʼän riʼ, ronojel mul tikanuj Rqʼatbʼäl Tzij Dios. We xtiʼän riʼ, xtyaʼöx jontir reʼ chiwä. 32 Ma tixiʼij ta iwiʼ, koʼöl molaj nkarneʼl, rma ri Itataʼ nrajoʼ nuyaʼ ri Rqʼatbʼäl Tzij chiwä. 49 Rïn xipë rchë nbʼenyaʼ qʼaqʼ chwäch Rwachʼlew, ye kʼa ¿achkë más nwajoʼ rïn si ya najin chik nkʼat ri qʼaqʼ riʼ? 53 Ri tataʼaj xtkatäj chrij rkʼajol y rkʼajol xtkatäj chrij ryä, ri teʼej xtkatäj chrij ral qʼopoj y ral qʼopoj xtkatäj chrij ryä, ri ralteʼ xtkatäj chrij raliʼ y raliʼ xtkatäj chrij ryä».