1 Pedro

5 Rma riʼ, rma rïn chqä yïn ukʼwäy bʼey, y xintzʼët taq ri Cristo xtäj poqän, chqä yïn jun chkë ri xtyaʼöx utzil pa rwiʼ achiʼel bʼin qa chqë, nwajoʼ nkʼutuj re utzil reʼ chkë ri ukʼwäy taq bʼey ri ye kʼo iwkʼë: 2 Keʼichajij ri qachʼalal ri ye achiʼel rkarneʼl Dios ri yeryaʼon qa pan iqʼaʼ, kixok ukʼwäy bʼey pa kiwiʼ; ma tiʼän ta riʼ xa rma itaman chë ya riʼ kʼo chë niʼän, xa kan tikʼutuʼ chwäch Dios chë kan rkʼë ronojel iwan niʼän wä riʼ; chqä ma tiʼän ta riʼ xa rma kʼo niwajoʼ nichʼäk qa, xa kan tiyaʼ iwan chrij ri samaj riʼ. 3 Y ma tiʼän riʼ kan achiʼel ta yïx kajaw ri ye rchë chik Dios, xa kan tiyaʼ jun utziläj tzʼetbʼäl chkiwäch. 4 Y taq ri utziläj ajyuqʼ xtbʼeqʼalajin pä, rïx xtyaʼöx ri corona chiwä ri kan kowan rqʼij chqä ma nchaʼ ta chiʼ. 5 Ke riʼ chqä rïx achiʼaʼ ri kʼa más yïx kʼojolaʼ na chkiwäch nkʼaj chik, tinmaj kitzij ri kʼo más kijnaʼ chiwäch rïx. Ye kʼa, jontir rïx tiqasaj iwiʼ taq yixtzjon kikʼë nkʼaj chik, rma Dios kan itzel yertzʼët ri nkinaʼ kiʼ, ye kʼa kan nuyaʼ utzil pa kiwiʼ ri nkiqasaj kiʼ tapeʼ ma taqäl chkij nkikʼül ri utzil riʼ. 6 Rma riʼ, tiqasaj iwiʼ chwäch Dios, ri janina rchqʼaʼ, rchë ke riʼ ryä kan pa rqʼijul xtnmirsaj iqʼij. 7 Y tiyaʼ qa pa rqʼaʼ ryä ronojel ri nbʼanö chë nchʼpü ikʼuʼx, rma ryä kan nchʼpü pä chiwij. 8 ¡Kan tichʼobʼoʼ na ronojel ri yeʼiʼän chqä kixkʼaseʼ apü! Ri Diablo, ri ikʼulel, najin nsutiyan pä chiwij kan achiʼel nuʼän jun köj ri kan kuw nqʼajan rma najin nukanuj rway. 9 Ye kʼa kuw tipabʼaʼ iwiʼ chwäch chqä kan tikʼutuʼ chë kuw rbʼanon ri ikʼuqbʼäl kʼuʼx, rma itaman chë jontir ri qachʼalal najin chqä nkiqʼaxaj re kʼayewal reʼ. 10 Ye kʼa taq ya xtitäj yän jbʼaʼ poqän, ri Dios ri janina nqrajoʼ tapeʼ ma taqäl ta chqij chë nqrajoʼ, ri xixurchaʼ rchë niqʼät tzij rkʼë Cristo, ryä xkixurtjoj rchë xkixkowin xtiʼän ri samaj xtyaʼ pan iqʼaʼ. Ryä xtbʼanö chë kuw xkixpaʼeʼ, ryä xtyaʼö iwchqʼaʼ, ryä xtbʼanö chë majun ta xtslon iwchë.