Apocalipsis

21 Chrij riʼ xintzʼët jun kʼakʼakʼ kaj chqä jun kʼakʼakʼ Rwachʼlew, rma ri kaj chqä ri Rwachʼlew ri ye kʼo wä rbʼanon qa ma ye jun ta chik, y ri mar chqä majun ta chik. 2 Chqä xintzʼët ri loqʼoläj tinamït, ri Kʼakʼakʼ Jerusalén, ri najin nqä pä chkaj akuchï kʼo wä Dios, y ruweqon riʼ kan achiʼel nuwäq riʼ jun qʼopoj chpan rkʼlanen rchë ntzʼet rma rchjil. 3 Chrij riʼ, xinkʼoxaj jun chʼaʼäl ri petenäq akuchï nqʼatö wä tzij Dios y rkʼë rchqʼaʼ nuʼij: «¡Tatzʼetaʼ! Ri rachoch Dios kʼo chkikojöl ri winäq. Ryä xtjeʼ kikʼë ryeʼ y ryeʼ xkeʼok rtinamit, y Dios kan xtjeʼ kikʼë. 4 Y ryä xtsuʼ ryiʼal ri rnaqʼ kiwäch, y ma xtjeʼ ta chik kamïk, bʼis, oqʼej nixta tyowen. Jontir riʼ ma xkejeʼ ta chik». 5 Ri tzʼyül wä chpan ri trono xuʼij: «¡Tatzʼetaʼ! Najin nbʼän kʼakʼakʼ che rä jontir». Chqä xuʼij: «Keʼatzʼibʼaj re tzij reʼ, rma kan ütz nakʼuqbʼaʼ akʼuʼx chkij». 6 Chqä xuʼij reʼ chwä: «¡Ya riʼ ya xebʼanatäj yän! Yïn rïn ri Alfa chqä ri Omega, ri naʼäy chqä ri rkʼisbʼäl. Jontir ri nchaqiʼj kichiʼ, rïn xtinyaʼ ri yaʼ chkë ri nuyaʼ kʼaslemal, y ryeʼ ma xtkʼatzin ta xtkitöj ri yaʼ riʼ. 22 Majun ta jun templo xintzʼët chpan, rma Jehová Dios, ri kʼo ronojel uchqʼaʼ pa rqʼaʼ, chqä ri Aläj Karneʼl ya riʼ rtemplo. 23 Ri tinamït ma nkʼatzin ta chë ri Qʼij o ri Ikʼ nkiyaʼ saqïl pa rwiʼ, rma ri saqïl ri petenäq rkʼë Dios ya riʼ nsaqirsan ri tinamït y rkantil ya riʼ ri Aläj Karneʼl.