Romanos

5 Rma riʼ, rma kan jïk qakʼaslemal xtzʼet rma Dios rma xqakʼuqbʼaʼ qakʼuʼx chrij ryä, kan kiʼ qakʼuʼx tqabʼanaʼ rma kan jnan rbʼanon qawäch rkʼë Dios rma ri Qajaw Jesucristo. 2 Rma ryä röj xqakʼül re utzil reʼ, ri ma taqäl ta chqij nqakʼül, rma xqakʼuqbʼaʼ qakʼuʼx chrij Dios. Y kan kiʼ qakʼuʼx tqabʼanaʼ rma qayoʼen ri qʼij taq xtqjeʼ rkʼë Dios. 3 Chqä kan kiʼ qakʼuʼx tqabʼanaʼ taq nqqʼax chkipan kʼayewal, rma qataman chë ri kʼayewal nkiʼän chqë chë nqkochʼon; 4 y taq nqkochʼon, Dios kan kiʼ rkʼuʼx nuʼän qkʼë; y taq Dios kan kiʼ rkʼuʼx nuʼän qkʼë, röj ütz nqayaʼ chwäch qan chë kʼo utzil xtqïl chqawäch apü, 5 y ri qayoʼen apü kantzij xtbʼanatäj; rma ri loqʼoläj rchqʼaʼ Dios, ri xyaʼöx pä pa qawiʼ, röj qataman chë Dios nqrajoʼ. 8 Ye kʼa, Dios ke reʼ rbʼanik rkʼutun chqawäch che nqrajoʼ: taq kʼa kʼo na wä ri mak chqij, Cristo xkäm qmä röj. 10 Rma, si rma rkamik Rkʼajol Dios, röj jnan chik jmul xuʼän qawäch rkʼë Dios taq yoj rkʼulel na ryä, komä kan más na chik qayaʼon chwäch qan chë, rma rkʼaslemal Cristo, xtqkol rma komä ya jnan chik rbʼanon qawäch rkʼë Dios. 11 Y ma xa xuʼ ta riʼ, röj kan kiʼ qakʼuʼx chë Dios xqrkʼän chik jmul rma Qajaw Jesucristo, ri xbʼanö chë komä jnan chik jmul xuʼän qawäch rkʼë Dios. 12 Rma, xa rma jun achï, ri mak xok chwäch le Rwachʼlew, y rma ri mak xpë ri kamïk. Ke riʼ xbʼanatäj rma riʼ jontir winäq yekäm, rma jontir xa kʼo qa mak chkij... 14 Tapeʼ ke riʼ, ri kamïk xok achiʼel jun qʼatöy tzij ri kan pa rtiempo Adán kʼa pa rtiempo Moisés xqʼät tzij pa kiwiʼ jontir, yajün pa kiwiʼ ri winäq ri ma xemakun ta achiʼel xmakun Adán, ri xa jnan jbʼaʼ rkʼë ri kʼo wä chë npë. 19 Rma chë xa rma jun achï ri ma xnmaj ta tzij, ye kʼïy winäq xebʼeʼok ajmakiʼ, ke riʼ chqä, xa rma jun achï ri kan xnmaj tzij, ye kʼïy winäq xkekowin xtkikʼwaj jun chöj kʼaslemal chwäch Dios.