Génesis

34 Ye kʼa Dina —ri rmiʼal Jacob ri xjeʼ rkʼë Lea— nqä wä chwäch nbʼä chkichʼbʼexik ri qʼopojiʼ ri ye kʼo pa tinamït. 2 Kʼo jun qʼij, ryä xtzʼët rma Siquem, ri rkʼajol jun heveo ri rbʼiniʼan Hamor, jun chkë ri qʼatöy taq tzij ri kʼo wä chpan ri tinamït riʼ. Siquem xkʼwaj äl Dina chqä xwär rkʼë, tapeʼ Dina ma xrajoʼ ta. 7 Ye kʼa ri rkʼajol Jacob xkitamaj ri xbʼanatäj y chanin xetzolin pä pa jyuʼ. Ryeʼ janina wä katajnäq kiyowal rma Siquem xqasaj rqʼij Israel taq xwär rkʼë ri rmiʼal Jacob, rma re bʼanobʼäl reʼ kan ma ütz ta wä. 25 Ye kʼa pa rox qʼij, taq janina wä bʼenäq rkïy chkë, Simeón y Leví —ri kaʼiʼ rkʼajol Jacob, chqä kixbʼal Dina—, xkikʼwaj äl ri kiespada y xebʼä pa tinamït. Taq xeʼapon chriʼ, xekikamsaj jontir ri achiʼaʼ. Ri winäq ri ye kʼo wä chpan ri tinamït riʼ ma kinaʼen ta wä chë xtbʼanatäj riʼ kikʼë. 30 Taq Jacob xtamaj ri xbʼanatäj, xuʼij reʼ che rä Simeón chqä Leví: «Kan jun nüm kʼayewal xiyaʼ chwij. Xa imak rïx, ri cananeos chqä ri perizitas, ri ye kʼo chpan re tinamït reʼ, kan itzel xtkinaʼ chwä. Röj xa yoj jbʼaʼ ok. Kantzij na wä chë ryeʼ xtkitün kichqʼaʼ rchë xkepë chwij, y xkinkikamsaj rïn chqä jontir ri ye kʼo pa wachoch».