Génesis

45 Rma riʼ, José ma xkowin ta chik xqʼät ri nunaʼ chkiwäch ri rsamajelaʼ. Rma riʼ rkʼë kuw rchʼaʼäl xuʼij: «¡Keʼel äl jontir ri ye kʼo aweʼ!». Y taq majun wä chik jun chkë ri rsamajelaʼ kʼo rkʼë, ryä xkʼüt riʼ chkiwäch ri rchʼalal. 2 Y ri egipcios chqä ronojel ri ye kʼo pa rachoch Faraón kan xkikʼoxaj ri roqʼej José, rma kan kowan kuw xoqʼ. 3 José kʼa riʼ xuʼij chkë ri rchʼalal: «Rïn yïn José. ¿Kʼa kʼäs na ri ntataʼ?». Ye kʼa ri rchʼalal majun xekowin ta xkiʼij che rä, rma kan janina xsach kikʼuʼx xa rma José. 4 José xuʼij kʼa chkë ri rchʼalal: «Kixjelun pä wkʼë tibʼanaʼ utzil». Rma riʼ, ri rchʼalal xejelun rkʼë. Kʼa riʼ xuʼij chkë: «Rïn yïn José, ri iwachʼalal, ri xikʼayij rïx chkë ri egipcios. 5 Ye kʼa komä ma itzel ta tinaʼ chqä ma kixchʼojin ta chiwäch xa rma xinikʼayij pä pa kiqʼaʼ ri egipcios; rma yë Dios ri xitaqö pä chiwäch rïx rchë chë ri winäq nkïl kikʼaslemal. 6 Ya reʼ kʼa ri rkaʼn jnaʼ ri kʼo wayjal chwäch ri tinamït, y kʼa kʼo na 5 jnaʼ ri majun xttikö rwäch ri ilew chqä majun rwäch xtyaʼ ta ri ilew. 7 Rma riʼ Dios xirtäq pä chiwäch rïx rchë ma yixkʼis ta chwäch le Rwachʼlew chqä rchë niwïl ikʼaslemal rma jun nimaläj kolotajïk. 8 Rma kʼa riʼ, ma yïx ta rïx ri xinitaqö pa aweʼ, xa yë ri kʼaslïk Dios ri xbʼanö riʼ. Ryä xuʼän chë xjeʼ nqʼij chpan ri rqʼatbʼäl tzij faraón rchë nbʼij che rä achkë más ütz nuʼän, rchë nkʼwaj bʼey pa rachoch chqä rchë yinok qʼatöy tzij pa rwiʼ ronojel ri tinamït Egipto. 9 Kixtzolin yän kʼa rkʼë ri ntataʼ, y kʼo chë niʼij che rä: ‹Ya reʼ ri nuʼij José, ri akʼajol: «Dios xuʼän qʼatöy tzij chwä pa rwiʼ ri tinamït Egipto. Katampä wkʼë. Ma kayalöj ta. 10 Y xkajeʼ pa tinamït Gosén, ri akuchï rït, ri awalkʼwal, ri awïy amam, ri akarneʼl, ri awakx chqä ronojel ri kʼo awkʼë xkejeʼ naqaj chwä rïn. 11 Y rïn xtinyaʼ away chriʼ, rma kʼa kʼo na 5 jnaʼ ri xtjeʼ wayjal. Xa xuʼ ke riʼ, rït chqä ri ye kʼo pan awachoch chqä ronojel ri kʼo awkʼë ma xkixkanaj ta pa mebʼaʼïl»›. 12 Rïx chqä Benjamín, ri nchaqʼ, kan rkʼë ri rnaqʼ iwäch najin nitzʼët chë kan yïn rïn ri najin ntzjon iwkʼë. 13 Y titzjoj che rä ri ntataʼ ronojel ri nqʼij kʼo aweʼ Egipto chqä ronojel ri itzʼeton. Komä kan kixbʼiyïn kʼa chqä tikʼamaʼ pä ri ntataʼ aweʼ». 14 José xqʼetej kʼa Benjamín, ri rchaqʼ, chqä xchäp oqʼej; y Benjamín, xqʼetej José y xchäp chqä oqʼej. 15 Y ryä xtzʼmaj kichiʼ ronojel ri rchʼalal y taq yerqʼeten, xchäp oqʼej kikʼë; chrij riʼ ri rchʼalal xetzjon rkʼë.