Génesis

7 Taq Jacob xkʼoxaj riʼ, kowan xxiʼij riʼ chqä xchʼpü rkʼuʼx, rma riʼ xerjäch pa kaʼiʼ peraj jontir ri ye kʼo wä rkʼë: ri rsamajelaʼ, ri rkarneʼl, ri rwakx chqä ri rcamellos. 12 Rït xaʼij: ‹Kantzij na wä, rïn ütz nnaʼoj xtinbʼän awkʼë, chqä ri awijatzul xtinbʼän che rä kan achiʼel snayiʼ ye kʼo chuchiʼ mar, ri ma yakowin ta nawajlaj›». 13 Y chriʼ xkanaj wä qa ri aqʼaʼ riʼ. Chrij riʼ xermöl jojun chkë ri ye kʼo rkʼë rchë nuspaj che rä Esaú, ri rnmal: 14 200 ixoqiʼ taq kʼsïkʼ, 20 achij taq kʼsïkʼ, 200 ixoqiʼ taq karneʼl, 20 achij taq karneʼl, 15 30 ixoqiʼ taq camellos chqä kal, 40 ixoqiʼ taq wakx, 10 achij taq wakx, 20 ixoqiʼ taq bʼür chqä 10 achij taq bʼür. 16 Chrij riʼ xerjäch pa molaj ri chköp riʼ rchë xeryaʼ äl chkë rsamajelaʼ, chqä xuʼij chkë: «Kixnabʼiyaj äl chi nwäch rïn chqä tiyaʼ qa ikojöl rkʼë ri molaj ri bʼenäq äl chiwäch». 17 Chqä, xuʼij reʼ che rä rsamajel ri bʼenäq äl naʼäy: «We xtakʼül ri nnmal Esaú pa bʼey y nukʼutuj chawä ‹¿Achoq rkʼë najin yasamäj wä chqä akuchï yabʼä wä? ¿Achoq rchë jontir re chköp reʼ ri akʼwan?›, 18 rït kʼo chë naʼij che rä ‹Rchë Jacob, ri asamajel. Ya reʼ jun spanïk qakʼamon pä chawä rït Esaú, ri qajaw. Ryä chqä petenäq chqij röj›». 19 Ya riʼ chqä xuʼij che rä ri rkaʼn rsamajel, ri rox rsamajel chqä chkë jontir ri ye bʼenäq wä äl chkij ri molaj chköp. Ryä xuʼij chkë: «Ya riʼ kʼo chë niʼij che rä Esaú taq xtikʼül pa bʼey. 20 Chqä kʼo chë niʼij che rä: ‹Jacob, ri asamajel, petenäq chqij röj chqä›». Rma Jacob nuʼij wä reʼ pa ran: «We rkʼë re spanïk reʼ xkikowin xtinqasaj jbʼaʼ ryowal, rkʼë jbʼaʼ kan ütz rnaʼoj xtuʼän wkʼë taq xkirtzʼët».