Proverbios

14 Ri ixöq ri kan kʼo rnaʼoj achiʼel ta kan nuyäk rachoch, ye kʼa ri ixöq ri majun ta rnaʼoj kan rkʼë rqʼaʼ nuwulaj wä qa. 2 Ri winäq ri rkʼwan jun jïk kʼaslemal nuxiʼij riʼ chwäch Jehová, ye kʼa ri winäq ri ma chöj ta rbʼey rkʼwan xa nutzelaj Dios. 7 Ma tachbʼilaj ta jun winäq ri majun ta rnaʼoj rma majun ta jun ütz xtatamaj rkʼë. 15 Ri winäq ri majun ta rnaʼoj nunmaj jontir ri nbʼix che rä, ye kʼa ri winäq ri kan kʼo rnaʼoj nuchʼöbʼ na achkë nuʼän. 16 Ri winäq ajnaʼoj kan nuquʼ na achkë nuʼän chqä nuchajij riʼ rchë ma nuʼän ta ri itzelal, ye kʼa ri winäq ri xa nakanïk ma nuquʼ ta na achkë nuʼän chqä xa más chrij ryä nukʼuqbʼaʼ wä qa rkʼuʼx. 17 Ri winäq ri chanin npë ryowal xa majun ta rnaʼoj, ye kʼa ri winäq ri nuquʼ na ri yeruʼän kan ntzeläx. 23 Jontir rwäch samaj kʼo utzil nukʼäm pä pan awiʼ, ye kʼa we xa xuʼ yatzjon y majun ta naʼän, ma kan ta achkë xtjeʼ awkʼë. 30 Jun winäq ri ma chanin ta npë ryowal, kan nuyaʼ rkʼaslemal rchʼakul; ye kʼa taq xa itzel nunaʼ che rä jun chik, xa ryabʼil rbʼaqil nkanuj.