Lucas

10 Chrij riʼ Jesús xerchaʼ chik 70 winäq y ye kakaʼ xuʼän äl chkë rchë xertäq äl chkipan jontir ri tinamït ri akuchï xtbʼä wä ryä chqä. 2 Ryä xuʼij ya reʼ chkë: «Kan kʼïy rwäch tkoʼn kʼo, ye kʼa xa ye jbʼaʼ ok samajelaʼ ye kʼo. Rma riʼ tiʼij che rä Rajaw ri tkoʼn chë ttaqaʼ pä más rsamajelaʼ rchë nkimöl rwäch rtkoʼn. 7 [...] rma ri samajel kʼo chë nyaʼöx rajäl rqʼij. [...] 20 Ye kʼa, ma ttel ta ikʼuʼx rma ri itzel taq espíritus nkinmaj itzij, pa rkʼexel riʼ xa kan ttel ikʼuʼx rma xtzʼibʼäx qa ibʼiʼ chlaʼ chkaj». 21 Taq xuʼij yän riʼ, ri loqʼoläj rchqʼaʼ Dios xuʼän che rä chë kowan kiʼ rkʼuʼx xnaʼ chqä xuʼij: «Chkiwäch jontir re winäq reʼ nyaʼ aqʼij Tat, Rajaw ri kaj chqä le Rwachʼlew, rma awewan jontir reʼ chkiwäch ri winäq ri kan kʼo kinaʼoj y xaqʼalajsaj chkiwäch ri akʼalaʼ. Tat, rït kan ke riʼ xawajoʼ xaʼän che rä». 22 Ryä chqä xuʼij: «Ri Ntataʼ ryaʼon qa jontir pa nqʼaʼ. Majun ta jun ri kan rtaman nwäch rïn, xa xuʼ ri Ntataʼ. Chqä majun ta jun ri kan rtaman rwäch ri Ntataʼ, xa xuʼ rïn y achoq chkë xtinwajoʼ xtintzjoj wä». 25 Chrij riʼ, jun achï ri kan kʼïy rtaman chrij Rpixaʼ Moisés xpaʼeʼ qʼanäj y, xa xuʼ rchë nutzʼët achkë nuʼij Jesús, xkʼutuj reʼ che rä: «Tijonel, ¿achkë kʼo chë nbʼän rchë nwïl ri kʼaslemal ri majun bʼëy xtkʼis ta?». 26 Ryä xuʼij reʼ che rä: «¿Achkë tzʼibʼatäl chpan ri Pixaʼ? ¿Achkë askʼin chpan?». 27 Ri achï riʼ xuʼij che rä: «‹Tawajoʼ Jehová ri aDios rkʼë ronojel awan, rkʼë ronojel akʼaslemal, rkʼë ronojel awchqʼaʼ chqä rkʼë ronojel achʼobʼonik› chqä ‹keʼawajoʼ ri winäq kan achiʼel nawajoʼ awiʼ rït›». 28 Jesús xuʼij reʼ che rä: «Kan ütz ri xaʼij pä; ma tayaʼ ta qa rbʼanik riʼ, ke riʼ xtawïl ri kʼaslemal ri majun bʼëy xtkʼis ta». 29 Ye kʼa, rma nrajoʼ wä nukʼüt chë rkʼwan jun jïk kʼaslemal, ri achï riʼ xkʼutuj reʼ che rä Jesús: «Y ¿achkë winäq ri qäs kʼo chë yenwajoʼ?». 33 Ye kʼa jun achï aj Samaria, ri bʼenäq wä äl chpan ri bʼey riʼ, xapon akuchï kʼo wä ri achï riʼ y, taq xtzʼët, kan xpoqonaj rwäch. 34 Rma riʼ xjelun apü rkʼë, xyaʼ aceite chqä vino akuchï sokotajnäq wä chqä xpïs rkʼë jun tzyäq. Chrij riʼ xyaʼ äl chrij rbʼür, xkʼwaj äl chpan jun jay ri akuchï nkixqanej kiʼ ri winäq y xchajij. 35 Chkaʼn qʼij xyaʼ kaʼiʼ denarios che rä ri rajaw ri jay chqä xuʼij che rä: ‹Tachajij y, we kʼa kʼo na más päq xtakʼïs chrij, rïn xtintöj chawä taq xkitzolin pä›. 36 ¿Achkë chkë re oxiʼ winäq reʼ naʼij rït chë xrajoʼ ri achï ri xqä pa kiqʼaʼ ri alqʼomaʼ?». 37 Ryä xuʼij che rä: «Ri achï ri kan ütz rnaʼoj xuʼän rkʼë». Rma riʼ, Jesús xuʼij che rä: «Jät y ya riʼ chqä tabʼanaʼ rït». 38 Y taq ye bʼenäq wä pa bʼey, Jesús xok apü pa jun tinamït. Chriʼ, xkanaj qa pa rachoch jun ixöq ri rbʼiniʼan Marta. 39 Ryä kʼo wä jun rchʼalal ri rbʼiniʼan María, ri xtzʼyeʼ qa chraqän ri Ajaw rchë nukʼoxaj ri nuʼij. 40 Ye kʼa Marta kan bʼenäq wä ran chrij ri rsamaj. Rma riʼ, xjelun apü rkʼë Jesús chqä xuʼij che rä: «Ajaw, ¿ütz komä natzʼët rït chë ri wachʼalal xiryaʼ qa nyonïl rchë nbʼän ronojel? Taʼij che rä chë tpë wkʼë y kirtoʼ». 41 Ye kʼa Jesús xuʼij che rä: «Marta, Marta, kowan najin yachʼpü chrij jontir ri najin yeʼaʼän, 42 ye kʼa ma kan ta kʼïy nkʼatzin, o rkʼë jbʼaʼ xa xuʼ jun. Ye kʼa María xchaʼ nuʼän ri más ütz y majun xtbʼin che rä chë ma tuʼän ta riʼ».