Génesis

3 Ye kʼa, chkë jontir ri chköp rchë pa qʼayis ri xeruʼän Jehová Dios, ri kumätz ya riʼ ri kʼo más rnaʼoj chkiwäch ri nkʼaj chik. Ryä xuʼij kʼa reʼ che rä ri ixöq: «¿Kantzij chë Dios xuʼij chiwä chë ma ütz ta nitäj kiwäch jontir ri cheʼ ri ye kʼo chwäch ri jardín?». 2 Ri ixöq xuʼij kʼa reʼ che rä: «Ütz nqatäj kiwäch ri cheʼ ri ye kʼo chwäch ri jardín. 3 Ye kʼa ri rwäch ri cheʼ ri kʼo pa rnikʼajal ri jardín, Dios xuʼij: ‹Ma titäj ta rwäch nixta tichäp apü. We xtiʼän riʼ, xkixkäm›». 4 Chrij riʼ, ri kumätz xuʼij kʼa che rä ri ixöq: «Ma xkixkäm ta. 5 Rma Dios rtaman chë ri qʼij ri xtitäj rwäch re cheʼ reʼ, xtjaqatäj iwäch chqä xkixok achiʼel Dios: xtitamaj ri ütz chqä ri ma ütz ta». 6 Chrij riʼ ri ixöq xtzʼët chë ri rwäch ri cheʼ riʼ kan ütz rchë ntej chqä kan xrayij apü rwäch. Ri cheʼ riʼ kan jaʼäl nqʼalajin. Rma riʼ ryä xchʼüp apü rwäch y xchäp rtjik. Chrij riʼ taq kʼo chik rkʼë rchjil, xyaʼ apü rwäch ri cheʼ riʼ che rä, y ryä chqä xtäj. 14 Rma riʼ Jehová Dios xuʼij reʼ che rä ri kumätz: «Rma xaʼän riʼ, yït rït ri más itzel chkikojöl ri chköp ri ma ye rchë ta kʼechelaj chqä ri ye rchë pa qʼayis. Xtaqererej awiʼ pan ilew y poqlaj xttok away chpan akʼaslemal. 15 Y xtinbʼän chë xtjeʼ chʼaʼoj chikojöl rïx, rït chqä ri ixöq, y chkojöl ri ajatzul rït chqä ri rjatzul ri ixöq. Ryä xtpaʼeʼ pa rwiʼ ri ajolon, y rït xtasök pa rtxil». 16 Y xuʼij reʼ che rä ri ixöq: «Xtinbʼän chë xtatäj más poqän taq xkajeʼ pa yabʼil chqä taq xtjeʼ awal. Rït kan xtarayij xkajeʼ qa rkʼë awachjil chqä kan kʼo chë xtaʼän ri xtuʼij ryä chawä».