1 Corintios

4 Tapeʼ ye kʼo jalajöj kiwäch spanïk, xa jun nyaʼö pä jontir riʼ, y ya riʼ ri loqʼoläj rchqʼaʼ Dios; 5 y tapeʼ ye kʼo jalajöj kiwäch samaj, xa jun Qajaw kʼo; 6 y tapeʼ jalajöj rbʼanik nsamäj ri loqʼoläj rchqʼaʼ Dios, xa jun Dios ri nsmajin ronojel riʼ pa kiwiʼ jontir. 7 Ye kʼa, chijujnal rïx nsamäj ri loqʼoläj rchqʼaʼ Dios pan iwiʼ rchë jontir niwïl utzil. 8 Rma ri loqʼoläj uchqʼaʼ riʼ, jun chiwä rïx nukʼül ri spanïk ri nkowin nuʼän chë kan rkʼë naʼoj ntzjon wä; che rä jun chik, ri loqʼoläj uchqʼaʼ riʼ nuʼän chë kan rkʼë etamabʼäl ntzjon wä; 9 che rä jun chik, ri loqʼoläj uchqʼaʼ riʼ nuʼän chë njeʼ rkʼuqbʼäl kʼuʼx; che rä jun chik, kan yë ri loqʼoläj uchqʼaʼ riʼ nbʼanö chë nkowin yerknaj ri nkʼaj chik; 10 che rä jun chik, rchë yeruʼän milagros; che rä jun chik, rchë yeruʼij apü profecías; che rä jun chik, rchë nutzʼët akuchï ye petenäq wä xa bʼa achkë naʼoj; che rä jun chik, rchë ntzjon pa jalajöj taq chʼaʼäl, y che rä jun chik, rchë yerqʼaxaj ri tzij pa jun chik chʼaʼäl. 11 Ye kʼa jontir reʼ xa xuʼ ri loqʼoläj rchqʼaʼ Dios nbʼanö chë yebʼanatäj, y kan nuyaʼ pan iwiʼ chijujnal rïx kan achiʼel nrajoʼ ryä. 12 Rma, achiʼel ri chʼakulaj xa jun, ye kʼa kan kʼïy peraj kʼo che rä, y jontir ri peraj rchë ri chʼakulaj riʼ, tapeʼ ye kʼïy, xa jun chʼakulaj nkiʼän, ke riʼ chqä rbʼanon ri Cristo. 14 Rma ri chʼakulaj, ma bʼanon ta rkʼë xa xuʼ jun peraj, xa kan kʼïy kikʼwan kiʼ. 15 Xa ta ri ajqanaj nuʼij «Rma ma yïn ta qʼabʼaj, ma yïn ta jun peraj rchë ri chʼakulaj», ma rma ta riʼ ma ta ntok jun peraj rchë ri chʼakulaj. 16 Y xa ta ri xkinaj nuʼij «Rma ma yïn ta rnaqʼ wachaj, ma yïn ta jun peraj rchë ri chʼakulaj», ma rma ta riʼ ma ta ntok jun peraj rchë ri chʼakulaj. 17 Xa ta jontir ri chʼakulaj rnaqʼ wachaj ta, ¿akuchï ta komä kʼo wä ri xkinaj? Xa ta jontir xkinaj ta, ¿akuchï ta komä kʼo wä ri qatzaʼn? 18 Ye kʼa Dios xeryaʼ ri peraj riʼ chpan ri chʼakulaj kan achiʼel xqä chwäch ryä. 19 Xa ta jnan jontir ri peraj, ¿akuchï ta komä kʼo wä ri chʼakulaj? 20 Ye kʼa, tapeʼ kan kʼïy kikʼwan kiʼ, xa jun chʼakulaj rbʼanon. 21 Ri rnaqʼ wachaj ma ütz ta nuʼij che rä ri qʼabʼaj «Ma yakʼatzin ta chwä», o ri jolomäj ma ütz ta nuʼij chkë ri ajqanaj «Ma yixkʼatzin ta chwä». 22 Pa rkʼexel riʼ, ri peraj rchë ri chʼakulaj ri achiʼel ta majun más kichqʼaʼ, kan yekʼatzin wä; 23 y ri peraj rchë ri chʼakulaj ri majun kan ta más kiqʼij chqawäch röj, xa ya riʼ ri más jaʼäl yeqawäq. Ke riʼ ri peraj ri ma kan ta ye jaʼäl, xa ya riʼ ri nqayaʼ más kejqalen; 24 ye kʼa ri peraj ri kan ye jaʼäl, majun nkʼatzin ta chkë. Ye kʼa, Dios xuʼän ri chʼakulaj y xyaʼ más rqʼij ri peraj ri nkʼatzin wä nyaʼöx más rqʼij, 25 rchë ke riʼ ma xtkijäch ta kiʼ ri peraj rchë ri chʼakulaj, pa rkʼexel riʼ, xa kan xtkichajij wä kiʼ chkiwäch. 28 Y Dios ke reʼ rbʼanik xqryaʼ qa pa congregación: naʼäy xeryaʼ ri apóstoles, rkaʼn, ri profetas, rox, ri yekʼutü rchʼaʼäl Dios; chrij riʼ ri yebʼanö milagros, y chrij riʼ ri yeknan (yeqʼoman) ri yawaʼiʼ, ri yeyaʼö kitoʼik nkʼaj chik, ri kitaman nkikʼwaj bʼey chqä ri yetzjon jalajöj chʼaʼäl.